Farmflytjendur, sem flytja vörur frá útlöndum og tollmiðlarar geta fengið leyfi til reksturs afgreiðslugeymslu. Heimilt er að geyma ótollafgreiddar vörur fyrir rekstraraðilann sjálfan og aðra aðila, í allt að 6 mánuði frá komu flutningsfars til landsins. Ótollafgreiddar vörur eru að jafnaði ekki geymdar lengi í þessum geymslum heldur afgreiddar til notkunar innan lands eða til varanlegrar geymslu á öðrum geymslusvæðum.

Að uppfylltum skilyrðum 1-3. og 5.-7. töluliða 1. málsgreinar 91. greinar tollalaga númer 88/2005 getur Tollstjóri heimilað lögaðilum að reka afgreiðslugeymslu fyrir ótollafgreidda vörur.

Er rekin af lögaðila sem veita öðrum þá þjónustu sem felst í starfsemi tollvörugeymslu, þar sem geyma má ótollafgreiddar vörur án tímatakmarkana, taka út einstaka sendingarhluta og óveruleg aðvinnsla vöru er heimil, svo sem umpökkun, merking, samsetning, prófun og þrif, enda verði hvorki úttekt né aðvinnsla til þess að tollflokkun vöru breytist.

Heimilt er að flytja innlendar vörur í tollvörugeymslu ef þær eru ætlaðar til nota við aðvinnslu sem heimil er í geymslunni . Einnig er heimilt að flytja innlenda framleiðsluvöru til útflutnings í tollvörugeymslu þegar heimil er endurgreiðsla verðjöfnunargjalda eða greiðsla verðjöfnunar við útflutning vöru.

Einnig er heimilt að geyma tollafgreiddar vörur í tollvörugeymslu að fengnu leyfi tollstjórans í Reykjavík í sama rými og ótollafgreiddar vörur.  Það þarf þó að vera skýrt aðgreint hvort um ótollafgreidda vöru er að ræða eða ekki samkvæmt birgðabókhaldi tollvörugeymslunnar.

Að uppfylltum skilyrðum 1. málsgreinar 91. greinar tollalaga númer 88/2005 getur Tollstjóri heimilað lögaðilum að reka tollvörugeymslu fyrir ótollafgreidda vörur.

Í tollfrjálsri forðageymslu má geyma má vistir, búnað og annan forða fyrir för í utanlandsferðum, auk varnings sem ætlaður er til sölu um borð í þeim. Í tollfrjálsar forðageymslur má flytja ótollafgreiddar vörur, vörur úr birgðum skipa eða flugvéla og innlendar framleiðsluvörur. Úr tollfrjálsri forðageymslu má aðeins selja og flytja vörur sem hæfilegan birgðaforða í far sem er í utanlandsferðum.

Að uppfylltum skilyrðum 1.-8. töluliða 1. málsgreinar 91. greinar tollalaga númer 88/2005 getur Tollstjóri heimilað lögaðilum að reka tollfrjálsar forðageymslur í tollhöfn þar sem geyma má vistir, útbúnað og annan forða fyrir för í utanlandsferðum auk varnings sem boðinn er til sölu um borð.

Tollfrjálsar verslanir eru reknar í flugstöðvum eða höfnum. Leyfið nær jafnframt til reksturs tollfrjálsrar birgðageymslu fyrir vörur til sölu í verslun leyfishafa. Eingöngu er heimilt að selja farþegum og áhöfnum millilandafara á leið úr landi vörur úr tollfrjálsri verslun. Tollstjóri getur þó heimilað leyfishafa að selja farþegum og áhöfnum millilandafara við komu til landsins vörur úr tollfrjálsri verslun. Slík verslun þarf að vera sérstaklega afmörkuð og eingöngu aðgengileg fyrir farþega og áhafnir sem koma til landsins.

Að uppfylltum skilyrðum 1.-3. og 6-9. töluliða 1. málsgreinar 91. greinar tollalaga númer 88/2005 getur Tollstjóri heimilað lögaðilum að reka tollfrjálsar verslanir í flugstöðvum eða höfnum.

Á frísvæði er heimil aðvinnsla á ótollafgreiddum vörum og innlendum framleiðsluvörum umfram þá aðvinnslu sem er heimil í tollvörugeymslum. Leyfi má aðeins veita þeim sem starfa í þeim tilgangi að veita öðrum þjá þjónustu sem felst í rekstri frísvæðis. Leyfishöfum sjálfum er óheimilt að stunda iðnaðarframleiðslu, verslun, umboðssölu, heildsölu eða smásölu á frísvæðinu.

Heimilt er að flytja ótollafgreiddar vörur inn á frísvæði úr fari , afgreiðslugeymslu eða tollvörugeymslu. Einnig er heimilt að flytja innlendar vörur inn á frísvæðið er þær eru ætlaðar til nota við iðnaðarframleiðslu sem heimil er á frísvæðinu.

Að uppfylltum skilyrðum 1. málsgreinar 91. greinar tollalaga númer 88/2005 getur Tollstjóri heimilað lögaðilum að reka frísvæði.

Hlutverk slíkra geymslna er einungis að geyma ótollafgreiddar vörur þar til þær eru fluttar aftur af landi brott. Vörur sem fluttar eru í slíkar geymslur eru aldrei tollafgreiddar hér á landi. Umflutningsvörur hafa það sérstaka eðli að þær eru ekki ætlaðar til sölu eða ráðstöfunar innan lands. Einungis heimilt að veita þeim leyfi sem starfa í þeim tilgangi að veita öðrum þá þjónustu sem felst í rekstri umflutningsgeymslu. Leyfishöfum sjálfum er óheimilt að geyma þar vörur eða stunda þar iðnaðarframleiðslu, verslun, umboðssölu, heildsölu eða smásölu.

Heimilt er að flytja ótollafgreiddar vörur í geymslurnar úr fari eða afgreiðslugeymslu.  Einnig er heimilt að flytja innlendar vörur í geymsluna ef að þeim er ætlað að viðhalda óbreyttu ástandi umflutningsvörunnar eða varna umflutningsvöru skemmdum. Iðnaðarframleiðsla og önnur aðvinnsla vöru er óheimil. Óheimilt er að flytja vörur sem þegar eru komnar í umflutningsgeymslu á annað geymslusvæði fyrir ótollafgreiddar vörur. Þá er einnig óheimilt að afhenda vörur úr umflutningsgeymslu til notkunar innan lands.

Að uppfylltum skilyrðum 1-9. töluliða 1. málsgreinar 91. greinar tollalaga númer 88/2005 getur Tollstjóri heimilað lögaðilum að reka umflutningsgeymslu.