Bifreiðagjald

Gjaldskylda og greiðsla bifreiðagjalds

Bifreiðagjald er lagt á öll vélknúin ökutæki sem skráð eru hér á landi að uppfylltum eftirfarandi skilyrðum. Orkugjafi ökutækis skiptir ekki máli.

Ökutækjum sem ætluð eru til fólks- eða vöruflutninga, á þremur hjólum og fleirum, eru a.m.k. 400 kg að eigin þyngd og hönnuð til hraðari aksturs en 30 km/klst.
Ökutækjum sem draga önnur ökutæki og hönnuð eru til hraðari aksturs en 30 km/klst.
Ökutækjum sem ætluð eru til fólks- eða vöruflutninga eða til að draga annað ökutæki og eru búin beltum og/eða stýrimeiðum/stýrihjólum og a.m.k. 400 kg að eigin þyngd.
Bifhjólum sem hvorki telst bifreið né torfærutæki, eru aðallega ætlað til fólks- eða vöruflutninga, eru á tveimur hjólum eða fleiri, með eða án hliðarvagns og eru a.m.k. 400 kg að eigin þyngd.

Skráður eigandi ber ábyrgð á greiðslu gjaldsins. Bifreiðagjald er greitt í hlutfalli við skráningartíma, en gjald fyrir nýskráða bifreið fellur í eindaga 15 dögum eftir nýskráningu.

Fjárhæð bifreiðagjalds

Bifreiðagjald miðast við skráða losun koltvísýrings (CO2) ökutækis, en hún er mæld í grömmum á hvern ekinn kílómetra. Tveir staðlar eru fyrir mælingu á losun koltvísýrings

NEDC – Evrópska aksturslotan
WLTP – Samræmd prófunaraðferð

Gjald fyrir ökutæki 3.500 kg eða léttari

Bifreiðagjald er 20.500 kr. á hvoru gjaldtímabili. Sé losun CO₂ umfram ákveðin mörk hækkar gjaldið um tiltekna fjárhæð fyrir hvert gramm CO₂-losunar:

Staðall	CO₂-losun gr/km	Fjárhæð
NEDC	umfram 168 g/km	181 kr.
WLTP	umfram 204 g/km	149 kr.
Bæði NEDC og WLTP	umfram 204 g/km (miðað við WLTP)	149 kr.

Liggi upplýsingar um skráða losun koltvísýrings ekki fyrir er hún reiknuð með eftirfarandi reikningsaðferð:

(0,12g x eigin þyngd í kg) + 50g

Gjald fyrir ökutæki þyngri en 3.500 kg

Bifreiðagjald bifreiða þyngri en 3.500 kg er:

71.160 kr. grunngjald
Aukalega 2,99 kr. fyrir hvert kíló umfram 3.500 kg.

Bifreiðagjald getur þó að hámarki orðið 111.340 kr. á hvoru gjaldtímabili.

Eigendaskipti

Við eigendaskipti er bifreiðagjald endurgreitt til seljanda í hlutfalli við þann tíma sem eftir er af gjaldtímabilinu og flyst gjaldskylda jafnframt frá þeim tíma yfir á kaupanda vegna þess sem eftir er af gjaldtímabilinu, með eindaga 15 dögum síðar. Miðað er við skráða dagsetningu eigendaskipta í ökutækjaskrá Samgöngustofu.

Óheimilt er að skrá eigendaskipti að bifreið nema gjaldfallið bifreiðagjald hafi verið greitt. Ef tilkynnt er um eigendaskipti án greiðslu bifreiðagjalds fara eigendaskipti í bið.

Með því að skrá inn dagsetningu eigendaskipta í reiknivél bifreiðagjalds er hægt að sjá skiptingu gjaldsins milli seljanda og kaupanda.

Skilagjald (áður úrvinnslugjald)

Skráður eigandi gjaldskylds ökutækis skal á hverju gjaldtímabili greiða skilagjald að fjárhæð 900 kr. fyrir hvert gjaldskylt ökutæki sitt. Með gjaldskyldu ökutæki er átt við ökutæki sem gjaldskyld eru samkvæmt lögum um bifreiðagjald. Einnig er skilagjald lagt á þær bifreiðar eru sérstaklega undanþegin greiðslu bifreiðagjalds. Þannig leggst skilagjald t.d. á ökutæki með skráningarnúmer í innlögn og á ökutæki í eigu bótaþega og björgunarsveita.

Gjaldskylda fellur niður frá og með upphafi fyrsta gjaldtímabils eftir að greitt hefur verið skilagjald af ökutækinu í full 15 ár og fyrir bifreiðir sem eru eldri en 25 ára í upphafi gjaldárs.

Úrvinnslugjald

Úrvinnslugjald 15.000 kr. skal leggja á hvert gjaldskylt ökutæki við nýskráningu.

Undanþága vegna greiðslna frá Tryggingastofnun

Bifreiðar í eigu þeirra sem fá eftirfarandi greiðslur frá Tryggingastofnun eru undanþegnar bifreiðagjaldi:

Örorkustyrk
Örorkulífeyri
Hlutaörorkulífeyri
Sjúkra- og endurhæfingargreiðsur
Bensínstyrk
Umönnunargreiðslna vegna örorku barna

Heimilt er að fella niður af einni bifreið í eigu einstaklings og ef einstaklingur á fleiri en eina bifreið nær niðurfellingin til þyngstu bifreiðar í eigu hvers og eins.

Viðkomandi þarf að vera skráður eigandi eða umráðamaður samkvæmt eignarleigusamningi til að hægt sé að fella niður bifreiðagjald. Ekki er nóg að bifreið sé skráð á maka.

Skilagjald, sem lagt er á samhliða bifreiðagjaldi, fellur ekki niður.

Umsókn um niðurfellingu

Alla jafna fellur bifreiðagjald sjálfkrafa niður. Ekki þarf að sækja um.

Komi sú staða upp að bifreiðagjald fellur ekki sjálfkrafa niður eða fella þarf niður bifreiðagjald eftir eigendaskipti, innlögn númera eða annað þarf að sækja um niðurfellingu með því að fyllta út eyðublað RSK 15.23 og:

senda í tölvupósti á netfangið trukkur@skatturinn.is
eða koma með það útfyllt í næstu afgreiðslu Skattsins
eða senda í pósti til Skattsins, Katrínartúni 6, 101 Reykjavík

Undanþágur frá greiðslu bifreiðagjalds

Bifreiðir sem uppfylla neðangreind skilyrði skulu undanþegnar bifreiðagjaldi:

Bifreiðir í eigu þeirra sem njóta örorkustyrks, örorkulífeyris, hlutaörorkulífeyris, sjúkra- og endurhæfingargreiðslna, bensínstyrks eða umönnunargreiðslna vegna örorku barna (þó einungis ein bifreið fyrir hvern rétthafa).
Bifreiðir í eigu björgunarsveita.
Bifreiðir sem eru eldri en 25 ára í upphafi gjaldárs.
Bifreiðir sem eru með skráningarnúmer í innlögn hjá skráningaraðila og er bifreiðagjald fellt niður í hlutfalli við þann tíma sem númer eru í innlögn svo og ónýtar bifreiðir, sem sannanlega hafa ekki verið í notkun á gjaldtímabilinu.
Bifreiðir sem tímabundið hafa verið fluttar úr landi. Framvísa ber útflutnings- og innflutningsskýrslum til sönnunar á tímabundnum útflutningi.
Ökutæki sem framleidd eru og skráð með metan eða metanól sem aðalorkugjafa eða hefur verið breytt þannig að þau geti nýtt metan og breytingin hlotið vottun skoðunarstöðvar skulu greiða lágmarks bifreiðagjald.
Ökutæki sem samkvæmt skilgreiningu umferðarlaga eru knúin vetni eða rafhreyfli að öllu leyti skulu greiða lágmarks bifreiðagjald.

Gjaldtímabil, gjalddagar og eindagar

Gjaldtímabil eru tvö, 1. janúar til 30. júní og 1. júlí til 31. desember.

Gjalddagi vegna fyrra tímabils er 1. janúar og eindagi 15. febrúar. Gjalddagi vegna seinna tímabils er 1. júlí og eindagi 15. ágúst.

Álagning, innheimta og endurgreiðslur

Álagning og innheimta er í höndum Skattsins og annast hann jafnframt allar beiðnir um endurgreiðslur og leiðréttingar. Þeim sem njóta örorkubóta/umönnunarbóta og telja sig eiga rétt á niðurfellingu bifreiðagjalds er bent á að fylla út eyðublað RSK 15.23. Eyðublaðið má senda útfyllt á netfangið trukkur@skatturinn.is eða koma með það útfyllt í næstu afgreiðslu Skattsins.

Kæruleið

Greiðanda bifreiðagjalds er heimilt að kæra til ríkisskattstjóra álagningu bifreiðagjalds innan 30 daga frá því að gjaldið var ákvarðað. Úrskurðir ríkisskattstjóra eru kæranlegir til yfirskattanefndar.