Endurgreiðsla virðisaukaskatts til opinberra aðila
Ríki, sveitarfélög og stofnanir þeirra fá endurgreiddan virðisaukaskatt sem þau greiða af tilteknum aðföngum, svo sem sorphreinsun, ræstingu, snjómokstri, björgunarstörfum og öryggisgæslu, samræmdri neyðarsímsvörun og sérfræðiþjónustu.
Sækja um endurgreiðslu
Sótt er um endurgreiðslur með rafrænum hætti á þjónustuvef Skattsins. Innskráning er gerð með aðalveflykli eða skilalykli fagaðila.
Opna umsókn | Beiðni um endurgreiðslu virðisaukaskatts til opinberra aðila |
Endurgreiðslubeiðni skal byggjast á fullnægjandi sölureikningum.
Gögn með umsókn
Með umsókn um endurgreiðslu skal fylgja hreyfingalisti yfir reikningana sem umsóknin grundvallast á. Hreyfingarlistinn skal innihalda:
- nafn og kennitölu seljanda
- dagsetningu reikninga
- fjárhæð umbeðinnar endurgreiðslu
- heildarsöluverð veittrar þjónustu eða seldrar vöru
- stutta lýsingu á því selda
Seljandi þjónustunnar verður að vera skráður á virðisaukaskattsskrá (vera með opið VSK-númer) á þeim tíma sem vinnan er innt af hendi. Gott er að kanna áður en reikningur er greiddur að þetta skilyrði sé uppfyllt.
Athuga hvort seljandi sé með opið VSK-númer
Umsókn vegna eldri tímabila
Hægt er að sækja um endurgreiðslur í sex ár talið frá því að endurgreiðsluréttur stofnaðist.
Endurgreiðslutímabil og afgreiðsla umsókna
|
Tímabil: |
tb. |
Skiladagur umsóknar og gagna |
|---|---|---|
|
janúar- febrúar |
8 |
1. apríl |
|
mars -apríl |
16 |
1. júní |
|
maí -júní |
24 |
1. ágúst |
|
júlí - ágúst |
32 |
1. október |
|
september - október |
40 |
1. desember |
|
nóvember - desember |
48 |
1. febrúar |
Afgreiðslutími er 15 dagar frá lokum skilafrests. Athugið þó að skilafrestur framlengist ef ríkisskattstjóri getur, vegna atvika sem rekja má til umsækjanda, ekki gert nauðsynlegar athuganir á gögnunum sem beiðnin byggir á.
Endurgreiðslubeiðnir sem berast eftir lok skilafrests eru afgreiddar með umsókn næsta tímabils.
Endurgreiðsla má aðeins fara fram að ákvörðun um virðisaukaskatt viðkomandi opinbers aðila liggi fyrir.
Þjónusta sem endurgreitt er vegna
Sorphreinsun
Endurgreitt er vegna sorphreinsunar. Það á við um:
- söfnun
- flutning
- urðun og eyðingu sorps og annars úrgangs, þar með talið brotamálma
Virðisaukaskattur vegna endurvinnslu fellur ekki hér undir.
Einnig er endurgreitt vegna leigu eða kaupa á sorpgámum vegna staðbundinnar sorphirðu.
Ræsting
Endurgreitt er vegna kaupa á ræstingu ásamt hreingerningarefnum sem notuð eru við hana. Með ræstingu er átt við bæði venjulega ræstingu og hreingerningu innan húss, þar með talið teppahreinsun og gluggaþvottur innan dyra. Ekki er endurgreitt vegna hreinsunar utan dyra.
Snjómokstur
Endurgreitt er vegna snjómoksturs og snjó- og hálkueyðingar með salti eða sandi. Einnig er endurgreitt vegna flutnings á snjó þegar aðstæður eru þannig að ekki er unnt eða nægilegt að ryðja snjó til hliðar heldur sé nauðsynlegt að flytja hann í burtu.
Björgunarstörf og öryggisgæsla vegna náttúruhamfara og almannavarna.
Endurgreitt er vegna kostnaðar sem opinber aðili verður fyrir vegna björgunarstarfa sem miða að því að koma í veg fyrir að meiri eyðilegging verði af sama atburði eða að eyðilegging vegna sama atburðar haldi áfram á þeim tíma sem náttúruhamfarir standa yfir eða í órofa tengslum við þær.
Ekki er endurgreitt vegna forvarnaraðgerða né aðgerða vegna afleiðinga náttúruhamfara, þannig er ekki endurgreitt vegna kostnaðar við viðgerðir.
Þjónusta sérfræðinga
Endurgreitt er vegna kaupa á þjónustu verkfræðinga, tæknifræðinga, arkitekta, lögfræðinga, löggiltra endurskoðenda, tölvunarfræðinga og annarra sérfræðinga er almennt þjóna atvinnulífinu og lokið hafa háskólanámi eða sambærilegu langskólanámi eða starfa sannanlega á sviði fyrrgreindra aðila og veita sambærilega þjónustu.
Ekki er endurgreitt vegna þeirrar þjónustu sérfræðinga sem ekki er í tengslum við sérfræðimenntun þeirra.
Þjónusta vaktstöðva vegna samræmdrar neyðarsímsvörunar
Endurgreitt er vegna þjónustu samræmdrar neyðarsímsvörunar og öðru því nauðsynlega tengdu.
Ítarefni
Hvar finn ég reglurnar?
Endurgreiðslur til opinberra aðila – 2. mgr. 42. gr. laga nr. 50/1988, um virðisaukaskatt
Reglugerð um virðisaukaskatt af skattskyldri starfsemi opinberra aðila – Reglugerð nr. 248/1990
Fullgildir sölureikningar samkvæmt 4. gr. reglugerðar um bókhald og tekjuskráningu virðisaukaskattsskyldra aðila – Reglugerð nr. 50/1993
Eyðublöð
RSK 10.23 - Beiðni um endurgreiðslu virðisaukaskatts vegna kaupa sveitarfélags eða ríkisstofnunar á þjónustu.
