Gistináttaskattur

Almennt um gistináttaskatt

Gistináttaskattur er sérstakur skattur sem lagður er á hverja selda gistináttaeiningu. Slík eining er skilgreind sem leiga á gistiaðstöðu í allt að einn sólarhring. Með gistiaðstöðu er átt við herbergi, húsnæði eða svæði sem leigt er út í þeim tilgangi að þar sé dvalið yfir nótt, að svefnaðstaða sé fyrir hendi eða hægt sé að koma henni fyrir og leigan sé almennt til skemmri tíma en eins mánaðar.

Skatturinn skal lagður á af hálfu rekstraraðila hótela, gistiheimila, tjaldsvæða og annarra sem veita slíka þjónustu.

Fjárhæð gistináttaskatts

Fyrir sölu á gistiaðstöðu skal frá áramótum innheimta gistináttaskatt sem hér segir:

Fyrir hótel, gistiheimili og aðra gististaði sem hafa rekstrarleyfi í flokki II–IV samkvæmt lögum um veitingastaði, gististaði og skemmtanahald - 800 kr.
Fyrir gistiaðstöðu á tjaldstæði og vegna stæða fyrir húsbíla, tjaldvagna, fellihýsi og hjólhýsi - 400 kr.
Fyrir hvern dvalargest um borð í skemmtiferðaskipi. Sjá nánari upplýsingar um skemmtiferðaskip

Skil á gistináttaskatti eru rafræn. Með rafrænum skilum stofnast krafa í heimabanka við skil skýrslu.

Gistináttaeining

Gistináttaeining er leiga á gistiaðstöðu (gistirými) í allt að einn sólarhring. Gistirýmið er húsnæði eða svæði sem leigt er út í þeim tilgangi að þar sé dvalið yfir nótt, svefnaðstaða sé fyrir hendi eða hægt sé að koma henni fyrir og leigan sé almennt til skemmri tíma en eins mánaðar, svo sem hús, íbúðir og herbergi. Afmarka verður hverju sinni það gistirými sem verið er að leigja út. Almennt er ekki miðað við einstakling, en gistirýmið er þó í ákveðnum tilvikum afmarkað við svefnrými fyrir hvern einstakling fyrir sig. Tilhögun greiðslu ræður ekki úrslitum í þessu sambandi.

Hótel

Herbergi á hótelum teljast til gistináttaeininga í þessu sambandi. Ef hótel leigja út íbúðir teljast þær hver og ein gistináttaeining.

Gistiheimili

Herbergi sem leigð eru sérstaklega út teljast til gistináttaeininga. Ef hvert rúm/svefnpokapláss er leigt út sérstaklega telst hvert og eitt þeirra gistináttaeining. Ef gistiheimili er leigt út í heilu lagi er um eina gistináttaeiningu að ræða. Í slíkum tilvikum er þannig ekki miðað við fjölda gistirýma, þótt almennt séu þau leigð út sérstaklega.

Íbúðir og orlofshús

Hver íbúð telst gistináttaeining ef hún er leigð út í einu lagi. Ef fleiri en ein íbúð er í húsnæði telst hver íbúð fyrir sig sem gistináttaeining sem miða skal skattlagninguna við. Á það einnig við þó að báðar eða allar íbúðirnar í húsnæðinu séu leigðar sama aðila. Ef herbergi í íbúð eru leigð sérstaklega telst hvert herbergi gistináttaeining.

Tjaldsvæði

Á tjaldsvæðum er stæðið undir hvert tjald gistirýmið. Stæði fyrir húsbíla, tjaldvagna, fellihýsi og hjólhýsi eru með sama hætti það gistirými sem miða ber innheimtu gistináttaskatts við. Tjaldsvæði í heild sinni telst ekki gistirými í þessu sambandi.

Skemmtiferðaskip

Frá 1. janúar 2024 ber rekstraraðilum skemmtiferðaskipa að standa skil á gistináttaskatti vegna seldra gistináttaeininga á meðan það dvelur í höfn hér á landi eða annars staðar á tollsvæði ríkisins.

Nánari upplýsingar

Uppgjör og gjalddagar

Rafræn skil á gistináttaskatti eru gerð á þjónustuvef Skattsins. Þegar skýrslu er skilað stofnast krafa sem hægt er að greiða í vefbanka gjaldanda. Á skattur.is er einnig hægt að gera leiðréttingar og fá yfirlit. Þeir sem eru í rafrænum skilum fá sendar áminningar um eindaga í tölvupósti, auk orðsendinga og annarra tilkynninga.

Uppgjörstímabil og gjalddagar gistináttaskatts

Uppgjörstímabil gistináttaskatts hjá virðisaukaskattsskyldum aðilum, þ.e. rekstraraðila hótela, gistiheimila, tjaldstæða og skemmtiferðaskipa sem notuð eru í virðisaukaskattsskylda starfsemi, eru tveir mánuðir:

Tímabil	Gjalddagi
janúar- febrúar	5. apríl
mars -apríl	5. júní
maí -júní	5. ágúst
júlí - ágúst	5. október
september - október	5. desember
nóvember - desember	5. febrúar

Gjalddagi er fimmti dagur annars mánaðar eftir lok uppgjörstímabils. Beri gjalddaga upp á helgidag eða almennan frídag færist hann yfir á næsta virka dag á eftir.

Skýrslu um fjölda farþega skemmtiferðaskips í innanlandssiglingum á uppgjörstímabilinu á að skila rafrænt á þjónustuvef Skattsins ásamt því að og standa skil á greiðslu skattsins til innheimtumanns ríkissjóðs.

Uppgjör innviðagjalds vegna skemmtiferðaskipa í millilandasiglingum

Uppgjörstímabil innviðagjalds telst vera sá tími sem skipið er innan tollsvæðis Íslands hverju sinni. Gjalddagi er sjö dögum eftir að skip yfirgefur tollsvæði Íslands.

Nánari upplýsingar

Undanþágur

Ekki skal innheimta gistináttaskatt í eftirfarandi tilvikum:

við sölu gistingar sem ekki ber virðisaukaskatt samkvæmt lögum um virðisaukaskatt, nema í tilviki skemmtiferðaskipa.
við sölu gistingar til dvalargesta um borð í skemmtiferðaskipi ef skipið leggst að höfn og fyrir liggur með sannanlegum hætti að skipið hafi verið í nauðum statt vegna áreksturs, sjóskemmda, veikinda eða ófriðar.
fyrir gistiaðstöðu sem áhöfn skipsins og annað starfsfólk þess hefur til umráða um borð í skipinu.

Heimagisting

Heimagisting er gisting gegn endurgjaldi á lögheimili einstaklings eða í einni annarri fasteign sem hann hefur til persónulegra nota og er í hans eigu. Hún fellur undir rekstrarleyfi í flokki I samkvæmt lögum um veitingastaði, gististaði og skemmtanahald.

Séu skilyrði heimagistingar uppfyllt ber ekki að leggja gistináttaskatt á sölu gistináttaeininga. Skilyrðin eru m.a.

að aðili hafi leyfi til reksturs slíkrar gistingar
að fjöldi seldra gistinátta á almanaksári sé ekki umfram 90 daga
að heildarsöluverð gistinátta sé ekki umfram 2.000.000 kr. á almanaksári

Uppfylli aðili ekki framangreind skilyrði, og að því gefnu að honum beri að skrá starfsemi sína á virðisaukaskattsskrá, ber honum að innheimta gistináttaskatt af seldum gistináttaeiningum og standa skil á honum í ríkissjóð.

Skráning á stofnskrá gistináttaskatts

Hverjum þeim sem skattskyldur er samkvæmt lögum um gistináttaskatt ber að tilkynna starfsemi sína áður en hún hefst til skráningar hjá ríkisskattstjóra á stofnskrá gistináttaskatts.

Á tilkynningu um gistináttaskattsskylda starfsemi skal tilgreina:

upphafsdag starfsemi
lokadag starfsemi (ef við á)
fjölda gistirýma sundurliðað eftir tegund gistiaðstöðu

Opna skráningu á þjónustuvef Skattsins

Endurskráning

Þeir aðilar sem voru á stofnskrá gistináttaskatts áður en hann var afnuminn tímabundið þurfa að skrá sig á hana að nýju.

Fjöldi gistirýma

Við tilkynningu inn á stofnskrá gistináttaskatts skal skrá heildarfjölda gistirýma sem í boði eru, sundurliðað eftir flokkum, svo sem fjölda húsa í útleigu eða fjölda herbergja í útleigu.

Hús, íbúðir og sumarbústaðir

Þegar hús, íbúðir, sumarbústaðir eða aðrar sambærilegar einingar sem leigðar eru út í heilu lagi þarf ekki að skrá fjölda gistirýma, aðeins fjölda húsa.

Tjaldsvæði

Gera þarf grein fyrir áætluðum hámarksfjölda tjaldstæða eða gistináttaeininga á tjaldsvæði. Stæði undir tjaldvagna, fellihýsi og húsbíla falla hér undir. Ef fjöldi tjaldstæða liggur ekki fyrir skal færa hér fjölda tjalda sem mest hefur verið á tjaldstæðinu í einu.

Svefnpokapláss

Í tilviki skála, farfuglaheimila og annarra staða sem bjóða gistingu í stökum rúmum og svefnpokaplássum skal færa heildarfjölda rúma og svefnpokaplássa sem eru til útleigu.

Tilgreina skal heildarfjölda annarra gistirýma en húsa, herbergja, tjaldstæða, rúma og svefnpokaplássa. Jafnframt skal tilgreina hvers eðlis þau eru.

Gistináttaskattur við afbókun

Þegar gistináttaeining er seld en síðar afbókuð skal gistináttaskattur falla niður.

Hafi gistináttaskattur verið innheimtur hjá þeim sem afbókar eininguna, skal hann endurgreiddur til kaupanda.

Ekki skiptir máli hvort seljandi haldi eftir hluta eða öllu andvirði greiðslunnar. Hafi seljandi innheimt gistináttaskattinn og ógerlegt er að koma við endurgreiðslu til kaupanda, skal seljandi þó skila þeim gistináttaskatti í ríkissjóð.