Olíugjald
Greiða skal olíugjald af gas-, stein- og díselolíu sem nothæf er sem eldsneyti á ökutæki. Olíugjaldið er 75,40 kr. á hvern lítra af olíu og ofan á það leggst virðisaukaskattur.
Undanþága (lituð olía)
Olía er undanþegin gjaldskyldu í eftirfarandi tilvikum þegar í hana hefur verið bætt litar- og merkiefnum (nefnd lituð olía):
- Til nota á skip og báta.
- Til húshitunar og hitunar almenningssundlauga.
- Til nota í iðnaði og á vinnuvélar.
- Til nota á dráttarvélar.
- Til raforkuframleiðslu.
- Til nota á ökutæki sem ætluð eru til sérstakra nota.
- Til nota á beltabifreiðar og námuökutæki sem eingöngu eru notuð utan vega eða á lokuðum vinnusvæðum.
- Til nota á bifreiðir í eigu björgunarsveita.
Misnotkun á litaðri olíu - sektir
Komi í ljós að notuð sé lituð olía á ökutæki sem ekki hefur til þess heimild (sjá upptalningu á undanþágum hér að ofan) varðar það sektum samkvæmt eftirfarandi töflu:
| Heildarþyngd ökutækis: | Fjárhæð sektar: |
|---|---|
| 0 – 3.500 kg | 300.000 kr. |
| 3.501 – 10.000 kg | 750.000 kr. |
| 10.001 – 15.000 kg | 1.125.000 kr. |
| 15.001 – 20.000 kg | 1.500.000 kr. |
| 20.001 kg og þyngri | 1.875.000 kr. |
Við ítrekuð brot er heimilt að tvöfalda sektarfjárhæð. Sé sekt greidd innan 14 daga lækkar hún um 20%.
Ítarefni
Hvar finn ég reglurnar?
Gjaldskylda, fjárhæð og almennt um undanþágur - 1. - 12. gr. laga nr. 87/2004, um olíugjald og kílómetragjald
Skilyrði undanþágu um greiðslu olíugjalds - reglugerð nr. 274/2006, um skilyrði undanþágu frá greiðslu olíugjalds og um greiðslu sérstaks kílómetragjalds
Kæruheimild, eftirlit og refsiábyrgðir - III. kafla laga nr. 87/2004, um olíugjald og kílómetragjald
