Tollflokkun

Athygli er vakin á mikilvægi þess að vanda vel til tollflokkunar, einnig er vakin athygli á því réttaröryggi sem innflytjendum er boðið upp á með möguleikanum um að óska bindandi álits um tollflokkun vöru.

Ef tollflokkun er rétt tryggir það:

Greiðslu réttra aðflutningsgjalda (tollur og virðisaukaskattur)
Nákvæmari tölur við hagskýrslugerð í tengslum við inn- og útflutning
Vitneskju um þörf á leyfum við inn- og útflutning

Sé tollflokkun röng er hætta á að:

Fyrirtæki verði gert að greiða aukin aðflutningsgjöld við endurákvörðun auk dráttarvaxta frá tollafgreiðsludegi vörunnar
Tollafgreiðsla vörunnar kann að tefjast
Hugsanlegt er að varan verði gerð upptæk og fyrirtækinu gert að greiða sekt

Fyrirtæki sem sendir Skattinum aðflutningsskýrslu um vöru með rammaskeyti um gagnaflutningsnet vegna SMT-/VEF-tollafgreiðslu ber ábyrgð á því að upplýsingar, sem þar eru veittar, séu réttar. Það sama á við afhendi fyrirtækið skriflega aðflutningsskýrslu eða veiti upplýsingar með öðrum hætti vegna tollafgreiðslu vöru.

Enn fremur ber hann ábyrgð á að um sé að ræða allar þær upplýsingar sem eiga að koma fram vegna tollafgreiðslunnar og að þær séu byggðar á þeim tollskjölum sem hefði átt að leggja fram með aðflutningsskýrslu ef vöru hefði ekki verið ráðstafað til SMT-tollafgreiðslu.

Til að tollflokka vörur er nauðsynlegt að nota tollskrána.

Bindandi álit

Með því að óska bindandi álits Skattsins um tollflokkun vöru er innflytjandi að tryggja sér það fyrirfram að tollflokkun vörunnar sé rétt og í samræmi við lög og túlkun tollyfirvalda.

Réttaröryggið fyrir innflytjanda felst í því að ákvörðun embættisins um bindandi tollflokkun vöru er bæði bindandi fyrir tollyfirvöld og innflytjanda.

Innflytjandi þarf því ekki að eiga von á því að tollyfirvöld endurákvarði aðflutningsgjöld vegna innflutnings þar sem fengist hefur bindandi tollflokkun vöru. Innflytjandinn veit því þá þegar við innflutning vörunnar hvaða gjöld teljast vera réttilega álögð gjöld á umrædda vöru lögum samkvæmt.

Hvernig óskað er bindandi álits

Ef óskað er bindandi álits um tollflokkun vöru þarf að senda skriflega beiðni.

Beiðni þurfa að fylgja þau gögn sem nauðsynleg eru til þess að unnt sé að ákveða tollflokkun vöru. Sem dæmi um fylgigögn mætti nefna:

teikningu
mynd
vörulýsingu
bækling
sýnishorn af vöru

Beiðni um bindandi álit verður svarað skriflega, innan 30 daga frá því beiðni barst eða frá því gagnaöflun lýkur.

Kæruleið

Unnt er að kæra ákvörðun Skattsins um bindandi tollflokkun til yfirskattanefndar.

Skatturinn getur afturkallað ákvörðun sína um bindandi tollflokkun að eigin frumkvæði. Tilkynna ber aðila sem óskað hefur bindandi tollflokkunar um afturköllun ákvörðunar.