Frestun staðgreiðsluskila og skila á tryggingagjaldi
Launagreiðendum í Grindavík sem eiga við verulega rekstrarörðugleika að stríða vegna tekjufalls í kjölfar náttúruhamfara er heimilt að sækja um frest á skilum á afdreginni staðgreiðslu og tryggingagjaldi.
Mögulegt er að sækja um frestun á eftirfarandi gjalddögum:
- 1. desember 2023 (vegna launa í nóvember 2023)
- 1. janúar 2024 (vegna launa í desember 2023)
- 1. febrúar 2024 (vegna launa í janúar 2024)
Til viðbótar má einnig sækja um frestun á þremur af eftirfarandi gjalddögum
- 1. mars (vegna launa í febrúar 2024)
- 1. apríl (vegna launa í mars 2024)
- 1. maí (vegna launa í apríl 2024)
- 1. júní (vegna launa í maí 2024)
- 1. júlí (vegna launa í júní 2024)
Nýr gjalddagi og eindagi verður 15. janúar 2025.
Skilyrði
Til viðbótar við formskilyrði um rekstrarörðugleika og starfsemi í Grindavík þarf umsækjandi að uppfylla eftirfarandi skilyrði.
- Skattaðili er ekki í vanskilum með opinber gjöld, skatta og skattsektir sem komnar voru á eindaga fyrir 31. ágúst 2023.
- Álagðir skattar og gjöld byggjast ekki á áætlunum vegna vanskila á skattframtölum og skýrslum, þar með töldum staðgreiðsluskilagreinum og virðisaukaskattsskýrslum, til Skattsins síðustu þrjú ár áður en umsókn barst eða síðan starfsemi hófst.
- Jafnframt er það skilyrði sett að arði verði ekki úthlutað eða eigin hlutir keyptir á árinu 2024 eða úttekt eigenda innan ársins 2024 fari umfram reiknað endurgjald þeirra.
Umsókn
Óski launagreiðandi eftir að fresta þeim greiðslum sem undir lögin falla er hægt að fara inn á þjónustusíðu viðkomandi launagreiðanda á skattur.is og fylla þar út umsókn um frestunina. Umsókn þarf að berast í síðasta lagi á eindaga hvers mánaðar fyrir sig.
Viðbótarfrestun
Þegar kemur fram í janúar 2025 verður heimilt að óska eftir skiptingu á þeim greiðslum sem frestað var þannig að gjalddagar og eindagar verði:
- 15. september 2025
- 15. október 2025
- 17. nóvember 2025
- 15. desember 2025
Umsókn um aukinn frest skal beina til Skattsins á því formi sem hann ákveður eigi síðar en 10. janúar 2025.
Ítarefni
Hvar finn ég reglurnar
Frestun staðgreiðsluskila og skilum á tryggingagjaldi - 17. gr. laga nr. 102/2023 sem bætti ákvæði til bráðabirgða við lög 45/1987 um staðgreiðslu opinberra gjalda.
