Ökutækjastyrkur

.

Almennt

Með ökutækjastyrk er átt við þær greiðslur sem launþegi fær frá launagreiðanda fyrir að nota eigin bifreið í þágu launagreiðandans og sjálfur borið kostnað af. Hér getur bæði verið um að ræða að greidd sé föst mánaðarleg eða árleg fjárhæð eða að greitt sé samkvæmt kílómetragjaldi fyrir hvern ekinn kílómetra samkvæmt akstursdagbók eða akstursskýrslu.

Frádráttur kostnaðar á móti ökutækjastyrk

Frádrátt á móti ökutækjastyrk má færa samkvæmt sérstökum reglum ef bifreið launþega hefur sannanlega verið notuð vegna aksturs í þágu vinnuveitanda. Frádrátt má ekki færa á móti ökutækjastyrk sem var greiddur vegna ferða launþegans milli heimilis og vinnustaðar eða vegna annarra nota af bifreiðinni sem teljast til eigin nota hans. Frádráttur getur ekki verið hærri en ökutækjastyrkurinn.

Frádráttur er eingöngu heimill ef bæði eftirfarandi skilyrði eru uppfyllt:

  1. Fyrir liggi skriflegur afnotasamningur þar sem aksturserindum er skilmerkilega lýst.
  2. Færð hafi verið akstursdagbók eða akstursskýrsla, þ.m.t. á rafrænu formi, þar sem skráð er hver ferð, dagsetning, ekin vegalengd, aksturserindi, kílómetragjald, nafn og kennitala launamanns og einkennisnúmer viðkomandi ökutækis. Einnig þarf að liggja fyrir hver er heildarakstur bifreiðar á hverju ári. Færa skal þessi gögn reglulega og skulu þau vera aðgengileg skattyfirvöldum þegar þau óska þess.

Frádráttur er aldrei heimill á móti ökutækjastyrk sem greiddur er vegna nota í þágu launþegans sjálfs, s.s. vegna aksturs milli heimilis og vinnustaðar. Aki launamaður hins vegar beint frá heimili sínu til annars vinnustaðar en hins venjulega að beiðni launagreiðanda getur verið heimilt að færa frádrátt á móti greiðslum fyrir slík afnot ökutækis, enda séu þau afnot beinlínis tengd starfi launamannsins en ekki fólgin í því einu að komast á vinnustað.

Frádráttur

Staðgreiðsla skatts af ökutækjastyrk

Ökutækjastyrkur sem greiddur er sem föst mánaðarleg eða árleg fjárhæð er staðgreiðsluskyldur. Ef um er að ræða ökutækjastyrk sem greiddur er samkvæmt akstursdagbók (sundurliðuðum gögnum) fyrir hvern ekinn kílómetra og fjárhæðin er í samræmi við ákvörðun ferðakostnaðarnefndar ríkisins á hverjum tíma, má halda þeim ökutækjastyrk utan staðgreiðslu.

.

Ítarefni

Hvar finn ég reglurnar?

Eyðublöð

Þessi síða notar vefkökur. Lesa meira Loka kökum