Úrskurður yfirskattanefndar nr. 569/2012
Úrskurður nr. 569/2012
ÚRSKURÐUR YFIRSKATTANEFNDAR
Ár 2012, miðvikudaginn 14. nóvember, er tekið fyrir mál nr. 220/2012; krafa skattrannsóknarstjóra ríkisins um að A, kt. [...], verði gerð sekt vegna meintra brota á skattalögum. Í málinu úrskurða Ólafur Ólafsson, Anna Dóra Helgadóttir og Sverrir Örn Björnsson. Upp er kveðinn svofelldur
ú r s k u r ð u r :
I.
Með bréfi, dags. 28. júní 2012, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. [...], fyrir brot á lögum nr. 50/1988, um virðisaukaskatt, með áorðnum breytingum, framin vegna rekstraráranna 2006, 2007 og 2008.
Í bréfi skattrannsóknarstjóra ríkisins segir:
„A er gefið að sök eftirfarandi:
Vanræksla á skilum á virðisaukaskattsskýrslum. Vanframtalin skattskyld velta og útskattur.
A er gefið að sök, að því er best verður séð af ásetningi, en í það minnsta af stórkostlegu hirðuleysi, að hafa vanrækt að standa skil á virðisaukaskattsskýrslum til skattstjórans í Reykjavík vegna allra uppgjörstímabila rekstrarárin 2006, 2007 og 2008. Með framangreindri háttsemi vanframtaldi A skattskylda veltu og útskatt framangreind uppgjörstímabil. Samkvæmt niðurstöðu skattrannsóknarstjóra ríkisins nemur vanframtalin skattskyld velta samtals kr. 17.861.455 og vanframtalinn útskattur samtals kr. 4.376.059. Mögulegur innskattur nemur samtals kr. 44.491.
Sundurliðast vanframtalin skattskyld velta og virðisaukaskattur svo sem hér greinir:
|
Rekstrarár |
Uppgjörstímabil |
Vanframtalin skattskyld velta | Vanframtalinn útskattur | Mögulegur innskattur |
| 2006 | jan.– feb. | 817.832 | 200.370 | 6.082 |
| 2006 | mars – apríl | 792.794 | 194.236 | 2.245 |
| 2006 | maí – júní | 921.127 | 225.677 | 4.400 |
| 2006 | júlí – ágúst | 769.350 | 188.493 | 0 |
| 2006 | sept. – okt. | 1.065.671 | 261.091 | 0 |
| 2006 | nóv. – des. | 891.242 | 218.354 | 8.449 |
| Samtals kr. | 5.258.016 | 1.288.221 | 21.176 | |
| 2007 | jan.– feb. | 751.152 | 184.033 | 0 |
| 2007 | mars – apríl | 1.296.204 | 317.570 | 2.350 |
| 2007 | maí – júní | 992.856 | 243.250 | 2.374 |
| 2007 | júlí – ágúst | 827.354 | 202.701 | 14.099 |
| 2007 | sept. – okt. | 1.138.777 | 279.000 | 278 |
| 2007 | nóv. – des. | 999.480 | 244.872 | 2.234 |
| Samtals kr. | 6.005.823 | 1.471.426 | 21.335 | |
| 2008 | jan.– feb. | 838.624 | 205.462 | 0 |
| 2008 | mars – apríl | 1.580.812 | 387.298 | 0 |
| 2008 | maí – júní | 1.434.551 | 351.464 | 0 |
| 2008 | júlí – ágúst | 730.924 | 179.076 | 0 |
| 2008 | sept. – okt. | 1.521.143 | 372.680 | 1.980 |
| 2008 | nóv. – des. | 491.562 | 120.432 | 0 |
| Samtals kr. | 6.597.616 | 1.616.412 | 1.980 | |
| Samtals öll árin kr. | 17.861.455 | 4.376.059 | 44.491 |
Sú háttsemi A sem hér hefur verið lýst brýtur í bága við ákvæði 1. mgr. 15. gr. og 1. mgr. 24. gr. sbr. aðalreglur 1. gr., 2. gr., 1. tl. 1. mgr. 3. gr., 1. mgr. 11. gr., 1. mgr. 13. gr., 1. mgr. 14. gr. og 19. gr. laga nr. 50/1988, um virðisaukaskatt, með áorðnum breytingum.
Varðar framanlýst háttsemi A sekt samkvæmt 1. mgr. 40. gr. laga nr. 50/1988, um virðisaukaskatt, með áorðnum breytingum.
Þess er krafist að A verði með úrskurði yfirskattanefndar gert að sæta sekt í samræmi við framangreint.“
Af hálfu skattrannsóknarstjóra ríkisins er málavöxtum lýst í greinargerð, dags. 28. júní 2012, sem fylgdi kröfugerðinni.
II.
Með bréfi yfirskattanefndar, dags. 6. júlí 2012, var gjaldanda veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hann vildi ekki hlíta því að yfirskattanefnd afgreiddi mál hans og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 4. mgr. 41. gr. laga nr. 50/1988, um virðisaukaskatt. Engar athugasemdir hafa borist frá gjaldanda.
III.
1. Með bréfi skattrannsóknarstjóra ríkisins, dags. 28. júní 2012, er gerð sú krafa að gjaldanda, A, verði gerð sekt samkvæmt þargreindum ákvæðum 40. gr. laga nr. 50/1988, um virðisaukaskatt. Gjaldandi hefur átt þess kost að koma að vörnum fyrir yfirskattanefnd í tilefni af sektarkröfu skattrannsóknarstjóra ríkisins, en engar athugasemdir hafa borist. Þar sem gjaldandi hefur ekki gert athugasemdir við meðferð máls þessa fyrir yfirskattanefnd verður að líta svo á að hann mæli því ekki í gegn að það sæti sektarmeðferð fyrir nefndinni.
2. Sektarkrafa skattrannsóknarstjóra ríkisins í máli þessu er byggð á niðurstöðum rannsóknar embættisins á bókhaldi og skattskilum gjaldanda vegna rekstraráranna 2006, 2007 og 2008, sbr. skýrslu um rannsóknina, dags. 28. október 2011, þar sem fram kom að á rannsóknartímabilinu hefði gjaldandi starfað sjálfstætt við bifreiðaviðgerðir. Rannsókn skattrannsóknarstjóra ríkisins hófst formlega hinn 11. maí 2011 og beindist að virðisaukaskattsskilum gjaldanda. Var rannsóknin einkum byggð á upplýsingum sem fram komu við skýrslutökur af gjaldanda 1. og 23. september 2011, bókhaldsgögnum gjaldanda, bankaupplýsingum og upplýsingum úr upplýsingakerfum ríkisskattstjóra. Með bréfi, dags. 11. október 2011, sendi skattrannsóknarstjóri gjaldanda skýrslu um rannsóknina sem þá lá fyrir, dags. 10. október 2011, og gaf honum kost á að tjá sig um efni hennar. Að fengnum athugasemdum tilnefnds verjanda gjaldanda með bréfi, dags. 25. október 2011, tók skattrannsóknarstjóri ríkisins saman nýja skýrslu um rannsóknina, dags. 28. október 2011, sem var efnislega samhljóða hinni fyrri að viðbættum kafla um lok rannsóknarinnar þar sem tekið var fram að framkomin andmæli þættu ekki gefa tilefni til breytinga á skýrslunni.
Í skýrslu skattrannsóknarstjóra ríkisins, dags. 28. október 2011, voru helstu niðurstöður rannsóknarinnar dregnar saman með svofelldum hætti:
„Niðurstöður rannsóknar á bókhaldi og virðisaukaskattsskilum vegna rekstraráranna 2006 til og með 2008 eru:
·1 Ekki hafa verið staðin skil á virðisaukaskattsskýrslum vegna uppgjörstímabila rekstraráranna 2006 til og með 2008.
·2 Bókhald hefur ekki verið fært.
·3 Skattskyld velta og útskattur eru vantalin.“
Þá gerði skattrannsóknarstjóri ríkisins tölulega grein fyrir niðurstöðum rannsóknarinnar í töflu í niðurlagi skýrslu sinnar. Þar kom fram að skattskyld velta gjaldanda væri vantalin um 5.258.016 kr. rekstrarárið 2006, um 6.005.823 kr. rekstrarárið 2007 og um 6.597.616 kr. rekstrarárið 2008. Þá væri útskattur vantalinn um samtals 4.376.059 kr. greind ár en mögulegur innskattur næmi samtals 44.491 kr.
Af hálfu skattrannsóknarstjóra ríkisins var mál gjaldanda sent ríkisskattstjóra til meðferðar, sbr. 5. mgr. 39. gr. laga nr. 50/1988, um virðisaukaskatt, sbr. bréf skattrannsóknarstjóra ríkisins, dags. 1. nóvember 2011. Á grundvelli rannsóknar skattrannsóknarstjóra ríkisins og í framhaldi af bréfi til gjaldanda, dags. 4. janúar 2012, sem gjaldandi svaraði ekki, endurákvarðaði ríkisskattstjóri með úrskurði, dags. 3. febrúar 2012, virðisaukaskatt gjaldanda árin 2006, 2007 og 2008. Samkvæmt úrskurðinum var skattskyld velta ákvörðuð 5.258.016 kr. rekstrarárið 2006, 6.005.823 kr. rekstrarárið 2007 og 6.597.616 kr. rekstrarárið 2008, og kom fram að þær fjárhæðir væru í samræmi við niðurstöður skattrannsóknarstjóra ríkisins. Að teknu tilliti til innskatts, sem ríkisskattstjóri ákvarðaði 21.176 kr. árið 2006, 21.335 kr. árið 2007 og 1.980 kr. árið 2008, varð virðisaukaskattur til greiðslu 1.276.038 kr. árið 2006, 1.450.092 kr. árið 2007 og 1.614.435 kr. árið 2008 auk álags samkvæmt 1. og 2. mgr. 27. gr. laga nr. 50/1988. Gjaldandi nýtti sér ekki heimilaðar málskotsleiðir vegna þessa úrskurðar ríkisskattstjóra.
3. Fram kemur í skýrslu skattrannsóknarstjóra ríkisins, dags. 28. október 2011, að gjaldandi hafi ekki staðið skil á virðisaukaskattsskýrslum vegna uppgjörstímabila á árunum 2006, 2007 og 2008. Er í þessu sambandi rakinn sá framburður gjaldanda við skýrslutökur 1. og 23. september 2011 að reiði gjaldanda út í kerfið hefði valdið því að hann hætti að skila virðisaukaskattsskýrslum. Þá kemur fram að gjaldandi hafi ekki fært eða látið færa bókhald vegna starfsemi sinnar. Fyrirliggjandi séu sölureikningar gjaldanda með númeraröðunum 82-100 og 1-70 og sé númeraröðin samfelld.
Í skýrslu skattrannsóknarstjóra ríkisins er gerð grein fyrir rannsókn á skattskyldri veltu og útskatti gjaldanda. Við skýrslutökur 1. og 23. september 2011 voru útgefnir sölureikningar gjaldanda rekstrarárin 2006, 2007 og 2008 lagðir fyrir hann og staðfesti gjaldandi að hann hefði gefið þá út og að hann teldi að þeir hefðu allir fengist greiddir nema reikningar á X ehf., en sá aðili hefði orðið gjaldþrota. Gjaldandi kvaðst ekki vita fjárhæð kröfunnar, en hann hefði ekki gripið til innheimtuaðgerða vegna þessa. Í skýrslu skattrannsóknarstjóra ríkisins kemur fram að við rannsókn málsins hafi komið í ljós greiðslur allra sölureikninga gjaldanda nema hvað innborganir frá X ehf. hafi verið 179.474 kr. lægri en sölureikningar. Krafa gjaldanda á X ehf. teljist ekki vera töpuð, enda hafi innheimtuaðgerðir ekki verið reyndar að fullu. Þá er þess getið í skýrslunni að komið hafi í ljós við afstemmingu á viðskiptum gjald Y ehf. að innborganir hafi verið hærri en útgefnir sölureikningar. Samkvæmt tölvupósti frá Y ehf. hafi fyrirtækið greitt gjaldanda fyrir vinnu, en ekki hafi tekist að fá afhentan sölureikning vegna hennar. Við skýrslutöku af gjaldanda 23. september 2011 kom fram frumrit reiknings gjaldanda á Y ehf. og staðfesti gjaldandi við skýrslutökuna að hafa skrifað umræddan reikning. Kvaðst gjaldandi aðspurður hafa trassað að láta Y ehf. fá sölureikninginn. Í skýrslunni er rakið að innborganir umfram fjárhæðir útgefinna sölureikninga séu færðar sem tekjur á þeirri dagsetningu sem þær hafi borist. Vegna þess hækki skattskyld velta um 87.998 kr. og útskattur um 21.561 kr. uppgjörstímabilið júlí-ágúst 2006 svo og hækki skattskyld velta um 48.192 kr. og útskattur um 11.808 kr. uppgjörstímabilið september-október 2006. Að öðru leyti eru niðurstöður í skýrslunni um fjárhæð skattskyldrar veltu gjaldanda á árunum 2006, 2007 og 2008 byggðar á fyrirliggjandi sölureikningum gjaldanda.
Í kafla um rannsókn á innskatti gjaldanda er greint frá því að gjaldandi hafi afhent gögn vegna innskatts 30. maí 2011. Við skýrslutöku hinn 23. september 2011 hafi gjaldandi staðfest að gögnin væru vegna rekstrar síns. Í skýrslunni er greint frá því að samkvæmt gögnum þessum nemi innskattur samtals 44.491 kr., en hluti framlagðra gagna (að fjárhæð 47.025 kr.) hafi ekki borið virðisaukaskatt eða hafi ekki verið talin innskattsbær þar sem þau hafi ekki verið tilkomin vegna tekjuöflunar gjaldanda. Hafi gjaldandi ekki gert athugasemdir vegna þessa. Þá er tekið fram í skýrslunni að gjaldandi hafi við skýrslutöku hinn 23. september 2011 afhent viðskiptamannayfirlit yfir innkaup sín hjá Z ehf. og Þ ehf., en viðskiptamannayfirlit frá Q hf. hafi einnig borist í tölvupósti 28. september 2011. Hafi gjaldandi sagt vera um að ræða úttektir vegna atvinnu sinnar sem og úttektir vina og ættingja, en hann hafi ekki getað sagt til um það hversu stór hluti úttektanna væru vegna vinnu sinnar. Miðað við fyrirliggjandi gögn og upplýsingar hafi skattrannsóknarstjóri ekki forsendur til að meta hvaða gjöld, sem tilgreind séu á yfirlitunum, séu vegna starfsemi gjaldanda og sé því ekki tekið tillit til þeirra við mat á mögulegum innskatti.
4. Gjaldandi hefur sem fyrr segir ekki gert athugasemdir í tilefni af sektarkröfu skattrannsóknarstjóra ríkisins og við skýrslutökur, sem fram fóru hjá skattrannsóknarstjóra vegna rannsóknar málsins, kom fram viðurkenning gjaldanda á því að hann hefði ekki staðið skil á virðisaukaskattsskýrslum og innheimtum virðisaukaskatti árin 2006, 2007 og 2008. Í máli því, sem hér er til meðferðar, er um að tefla kröfugerð um ákvörðun sektar á hendur gjaldanda samkvæmt þar tilgreindum ákvæðum 40. gr. laga nr. 50/1988, um virðisaukaskatt, sem gera ráð fyrir því að sektarákvörðun sé bundin þeirri skattfjárhæð sem undan var dregin. Verður því að taka afstöðu til þess hvort skattrannsóknarstjóri ríkisins hafi með skattrannsókn sinni sýnt fram á hverju skattfjárhæð, sem undan var dregin, hafi að minnsta kosti numið. Allan vafa í því sambandi verður að meta gjaldanda í hag, sbr. grundvallarreglu 108. gr. laga nr. 88/2008, um meðferð sakamála.
Eins og rakið er að framan eru tölulegar niðurstöður samkvæmt rannsókn skattrannsóknarstjóra ríkisins á skattskilum gjaldanda vegna áranna 2006, 2007 og 2008 byggðar á útgefnum sölureikningum gjaldanda, sem hann afhenti skattrannsóknarstjóra vegna rannsóknar málsins, og gögnum um innborganir frá Y ehf. Greindir sölureikningar eru að fjárhæð 6.376.678 kr. rekstrarárið 2006, 7.477.249 kr. rekstrarárið 2007 og 8.214.028 kr. rekstrarárið 2008, en innborganir frá Y ehf. námu 169.559 kr. rekstrarárið 2006. Reiknaðist skattskyld velta gjaldanda í samræmi við framangreint 5.258.016 kr. rekstrarárið 2006, 6.005.823 kr. rekstrarárið 2007 og 6.597.616 kr. rekstrarárið 2008 og útskattur 1.288.221 kr. árið 2006, 1.471.426 kr. árið 2007 og 1.616.412 kr. árið 2008. Eru þetta þær fjárhæðir sem tilgreindar eru sem tölulegar niðurstöður rannsóknarinnar um vantalda skattskylda veltu og virðisaukaskatt (útskatt). Umræddir sölureikningar voru lagðir fyrir gjaldanda við skýrslutökur hjá skattrannsóknarstjóra ríkisins 1. og 23. september 2011 og staðfesti gjaldandi að hafa gefið sölureikningana út og vefengdi hann ekki að þeir hefðu fengist greiddir að frátöldum hluta sölureikninga frá X ehf. Samkvæmt tiltækum gögnum var bú umrædds aðila tekið til gjaldþrotaskipta 3. desember 2009. Að svo vöxnu og þar sem óumdeilt er að gjaldandi fékk fyrrgreinda kröfu sína ekki greidda þykir rétt að lækka vanframtalda veltu og útskatt gjaldanda með tilliti til hennar, þ.e. veltu um 144.156 kr. og útskatt um 35.318 kr., vegna ársins 2008. Þá staðfesti gjaldandi við skýrslutöku hinn 23. september 2011 að hafa þegið umræddar greiðslur frá Y ehf. vegna vinnu. Samkvæmt þessu og að virtum gögnum málsins þykir ekkert komið fram sem gefur tilefni til annars en að miða við þær fjárhæðir innheimts virðisaukaskatts sem gögn málsins bera með sér, með því fráviki sem fyrr greinir vegna X ehf. Samkvæmt því verður miðað við vantalinn útskatt að fjárhæð 1.288.221 kr. árið 2006, 1.471.426 kr. árið 2007 og 1.581.094 kr. árið 2008. Af hálfu gjaldanda hefur ekkert komið fram um frekari tilefni til frádráttar innskatts en reiknað var með í skýrslu skattrannsóknarstjóra ríkisins. Verður því byggt á niðurstöðum rannsóknarskýrslu um þann þátt málsins.
Fullsannað þykir samkvæmt því sem að framan er rakið og að öðru leyti með stoð í gögnum málsins, m.a. framburði gjaldanda við skýrslutöku hjá skattrannsóknarstjóra ríkisins, að gjaldandi, sem skyldur var til þess að standa skil á virðisaukaskatti, sbr. 1. mgr. 15. gr. og 1. og 2. mgr. 24. gr. laga nr. 50/1988, hafi á saknæman hátt vanrækt að standa skil á virðisaukaskattsskýrslum öll uppgjörstímabil áranna 2006, 2007 og 2008 og þannig vanrækt að gera grein fyrir virðisaukaskatti til greiðslu samtals að fjárhæð 4.296.250 kr. umrædd uppgjörstímabil, sbr. sundurliðun í kröfubréfi skattrannsóknarstjóra ríkisins. Varðar þetta gjaldanda sekt samkvæmt 1. mgr. 40. gr. laga nr. 50/1988, um virðisaukaskatt, sbr. 3. gr. laga nr. 42/1995.
Ákvarða ber gjaldanda, A, sekt samkvæmt framangreindum ákvæðum 1. mgr. 40. gr. laga nr. 50/1988, sbr. 3. gr. laga nr. 42/1995, vegna vanrækslu á skilum virðisaukaskatts og virðisaukaskattsskýrslna sem að framan greinir. Samkvæmt breytingum á refsiákvæðum skattalaga, sem gerðar voru með lögum nr. 42/1995 og tóku gildi 9. mars 1995, skal sekt aldrei vera lægri en sem nemur tvöfaldri þeirri skattfjárhæð sem undan var dregin, þó að teknu tilliti til álags. Líta ber til þess að gjaldandi gekkst greiðlega við brotum sínum. Að þessu virtu og að teknu tilliti til álags samkvæmt 2. mgr. 27. gr. laga nr. 50/1988 þykir sekt gjaldanda hæfilega ákveðin 8.200.000 kr. til ríkissjóðs.
Úrskurðarorð:
Gjaldandi, A, greiði sekt að fjárhæð 8.200.000 kr. til ríkissjóðs.
