Úrskurður yfirskattanefndar nr. 79/2018
Úrskurður nr. 79/2018
ÚRSKURÐUR YFIRSKATTANEFNDAR
Ár 2018, miðvikudaginn 25. apríl, er tekið fyrir mál nr. 185/2017; krafa skattrannsóknarstjóra ríkisins um að A, kt. […], verði gerð sekt vegna meintra brota á skattalögum. Í málinu úrskurða Sverrir Örn Björnsson, Þórarinn Egill Þórarinsson og Bjarnveig Eiríksdóttir. Upp er kveðinn svofelldur
ú r s k u r ð u r :
I.
Með bréfi, dags. 21. desember 2017, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. […], fyrir brot á lögum nr. 50/1988, um virðisaukaskatt, með áorðnum breytingum, framin vegna rekstraráranna 2012 og 2013.
Í bréfi skattrannsóknarstjóra ríkisins segir:
„A er gefið að sök eftirfarandi:
A er gefið að sök, að því er best verður séð af ásetningi, en í það minnsta af stórkostlegu hirðuleysi, að hafa vanrækt að standa skil á virðisaukaskattsskýrslum til skattyfirvalda vegna uppgjörstímabilanna júlí – ágúst, september – október og nóvember – desember rekstrarárið 2012 og vegna allra uppgjörstímabila rekstrarárið 2013 og vanframtelja með því skattskylda veltu og virðisaukaskatt. Samkvæmt rannsókn skattrannsóknarstjóra ríkisins nemur vanframtalin skattskyld velta samtals kr. 8.957.691 og vanframtalinn útskattur samtals kr. 2.284.211.
Sundurliðast vanframtalin skattskyld velta og virðisaukaskattur svo sem hér greinir:
| Rekstrarár | Uppgjörstímabil | Vanframtalin skattskyld velta | Vanframtalinn útskattur |
| 2012 | júlí – ágúst | 439.960 | 112.190 |
| 2012 | sept. – okt. | 1.033.865 | 263.635 |
| 2012 | nóv. – des. | 1.015.936 | 259.064 |
| Samtals kr. | 2.489.761 | 634.889 | |
| 2013 | jan. – feb. | 672.342 | 171.447 |
| 2013 | mars – apríl | 989.044 | 252.206 |
| 2013 | maí – júní | 1.232.637 | 314.323 |
| 2013 | júlí – ágúst | 1.316.150 | 335.618 |
| 2013 | sept. – okt. | 889.101 | 226.721 |
| 2013 | nóv. – des. | 1.368.656 | 349.007 |
| Samtals kr. |
|
6.467.930 | 1.649.322 |
| Samtals bæði árin kr. | 8.957.691 | 2.284.211 | |
Sú háttsemi A sem hér hefur verið lýst brýtur í bága við ákvæði 1. mgr. 15. gr. og 1. mgr. 24. gr. sbr. aðalreglur 1. gr., 2. gr., 1. tl. 1. mgr. 3. gr., 1. mgr. 11. gr., 1. mgr. 13. gr., 1. mgr. 14. gr. og 19. gr. laga nr. 50/1988, um virðisaukaskatt, með áorðnum breytingum.
Varðar framanlýst háttsemi A sekt samkvæmt 1. mgr. 40. gr. laga nr. 50/1988, um virðisaukaskatt, með áorðnum breytingum.
Þess er krafist að A verði með úrskurði yfirskattanefndar gert að sæta sekt í samræmi við framangreint.“
Af hálfu skattrannsóknarstjóra ríkisins er málavöxtum lýst í greinargerð, dags. 21. desember 2017, sem fylgdi kröfugerðinni.
II.
Með bréfum yfirskattanefndar, dags. 3. janúar 2018 og 7. febrúar 2018, var gjaldanda veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hann vildi ekki hlíta því að yfirskattanefnd afgreiddi mál hans og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 4. mgr. 41. gr. laga nr. 50/1988, um virðisaukaskatt. Gjaldandi staðfesti móttöku seinna bréfsins með undirritun sinni á skrifstofu yfirskattanefndar hinn 15. febrúar 2018. Engar athugasemdir hafa borist frá gjaldanda.
III.
1. Með bréfi skattrannsóknarstjóra ríkisins, dags. 21. desember 2017, er gerð sú krafa að gjaldanda, A, verði gerð sekt samkvæmt þargreindum ákvæðum 40. gr. laga nr. 50/1988, um virðisaukaskatt, þar sem hann hafi vanrækt að standa skil á virðisaukaskatti vegna sjálfstæðrar starfsemi sinnar tilgreind uppgjörstímabil árin 2012 og 2013. Gjaldandi hefur átt þess kost að koma að vörnum fyrir yfirskattanefnd í tilefni af sektarkröfu skattrannsóknarstjóra ríkisins, en engar athugasemdir hafa borist. Þar sem gjaldandi hefur ekki gert athugasemdir við meðferð máls þessa fyrir yfirskattanefnd verður að líta svo á að hann mæli því ekki í gegn að það sæti sektarmeðferð fyrir nefndinni.
2. Sektarkrafa skattrannsóknarstjóra ríkisins í máli þessu er byggð á niðurstöðum rannsóknar embættisins á bókhaldi og skattskilum gjaldanda vegna rekstraráranna 2012 og 2013, sbr. skýrslu um rannsóknina, dags. 21. september 2017, þar sem fram kom að á rannsóknartímabilinu hefði gjaldandi starfað sjálfstætt sem húsasmiður, aðallega sem verktaki hjá X ehf. Rannsókn skattrannsóknarstjóra ríkisins hófst formlega hinn 30. maí 2017. Vegna rannsóknarinnar kom gjaldandi til skýrslutöku hjá skattrannsóknarstjóra ríkisins þann 2. júní 2017. Með bréfi, dags. 4. september 2017, sendi skattrannsóknarstjóri gjaldanda skýrslu um rannsóknina sem þá lá fyrir, dags. sama dag, og gaf honum kost á að tjá sig um efni hennar. Engar athugasemdir voru gerðar af hálfu gjaldanda og tók skattrannsóknarstjóri ríkisins í framhaldi af þessu saman nýja skýrslu um rannsóknina, dags. 21. september 2017, sem var efnislega samhljóða hinni fyrri að viðbættum kafla um lok rannsóknarinnar.
Í skýrslu skattrannsóknarstjóra ríkisins, dags. 21. september 2017, voru helstu niðurstöður rannsóknarinnar dregnar saman með svofelldum hætti:
„Niðurstöður rannsóknar á bókhaldi og virðisaukaskattsskilum skattaðila vegna rekstraráranna 2012 og 2013 eru:
· Bókhald var ekki fært.
· Kostnaðarfylgiskjöl liggja ekki fyrir.
· Sölureikningar voru gefnir út og liggja fyrir.
· Skattaðili var ekki á virðisaukaskattsskrá.
· Skattskyld velta er vanframtalin.
· Útskattur er vanframtalinn.
· Verkkaupi endurgreiddi innskatt vegna sölureikninga skattaðila.
· Engin gjaldagögn eru fyrirliggjandi.“
Þá gerði skattrannsóknarstjóri ríkisins tölulega grein fyrir niðurstöðum rannsóknarinnar í töflu í niðurlagi skýrslu sinnar. Þar kom fram að skattskyld velta gjaldanda væri vantalin um 2.489.761 kr. rekstrarárið 2012 og um 6.467.930 kr. rekstrarárið 2013. Þá væri útskattur vantalinn um samtals 2.284.211 kr. greind ár.
Af hálfu skattrannsóknarstjóra ríkisins var mál gjaldanda sent ríkisskattstjóra til meðferðar, sbr. 2. mgr. 39. gr. laga nr. 50/1988, um virðisaukaskatt, sbr. bréf skattrannsóknarstjóra ríkisins, dags. 6. nóvember 2017. Í greinargerð skattrannsóknarstjóra ríkisins, dags. 21. desember 2017, kemur fram að endurákvörðunarþætti málsins sé ólokið.
3. Fram kemur í skýrslu skattrannsóknarstjóra ríkisins, dags. 21. september 2017, að gjaldandi hafi verið skráður á virðisaukaskattsskrá frá 1. nóvember 2002 til 30. júní 2011, en þá hafi virðisaukaskattsnúmeri gjaldanda verið lokað. Í skýrslutöku hjá skattrannsóknarstjóra ríkisins hinn 2. júní 2017 kvaðst gjaldandi ekki geta skýrt hvers vegna hann hefði gefið út sölureikninga á árinu 2012 og innheimt virðisaukaskatt vitandi það að virðisaukaskattsnúmeri hans var lokað. Sagði gjaldandi að tiltekinn aðili hefði ætlað að sjá um reikningamál hans fyrir hann því honum hefði verið tilkynnt af verkkaupa að búið væri að loka virðisaukaskattsnúmerinu. Hafði hann talið að það hefði gengið eftir því verkkaupi hefði haldið áfram að taka við sölureikningum hans. Þá sagðist gjaldandi hafa geymt kostnaðarfylgiskjöl í sérstökum möppum sem hann fyndi ekki. Í skýrslunni er rakið að gjaldandi hafi undir rannsókn málsins afhent skattrannsóknarstjóra ríkisins afrit útgefinna sölureikninga. Eru sölureikningarnir allir útgefnir á X ehf. að undanskildum einum sölureikningi sem gefinn var út á Z ehf., en sá sölureikningur er ekki hluti af tölulegum niðurstöðum skýrslunnar. Taldi skattrannsóknarstjóri ríkisins ekki ástæðu til að leggja mat á ætlaðan undandrátt vegna vöntunar sölureikninga.
Í skýrslu skattrannsóknarstjóra ríkisins er gerð grein fyrir rannsókn á skattskyldri veltu og útskatti gjaldanda. Við skýrslutöku 2. júní 2017 voru útgefnir sölureikningar gjaldanda að fjárhæð samtals 11.241.902 kr., þar af skattskyld velta 8.957.691 kr. og útskattur 2.284.211 kr., rekstrarárin 2012 og 2013 lagðir fyrir gjaldanda og staðfesti gjaldandi að hann hefði gefið þá út og að þeir hafi allir fengist greiddir. Tók gjaldandi fram að X ehf. hefði á árinu 2015 endurgreitt ríkissjóði innskattinn vegna sölureikninganna og að félagið hefði nú krafið gjaldanda um endurgreiðslu sem því næmi.
Í kafla um rannsókn á innskatti gjaldanda er greint frá því að engin gögn hafi komið fram um mögulegan innskatt gjaldanda. Er vísað til þeirra skýringa gjaldanda við skýrslutöku að hann hefði orðið fyrir kostnaði vegna starfseminnar en hann fyndi ekki gögnin.
4. Gjaldandi hefur sem fyrr segir ekki gert athugasemdir í tilefni af sektarkröfu skattrannsóknarstjóra ríkisins og við skýrslutökur, sem fram fóru hjá skattrannsóknarstjóra vegna rannsóknar málsins, kom fram viðurkenning gjaldanda á því að hann hefði ekki staðið skil á virðisaukaskattsskýrslum og innheimtum virðisaukaskatti árin 2012 og 2013. Í máli því, sem hér er til meðferðar, er um að tefla kröfugerð um ákvörðun sektar á hendur gjaldanda samkvæmt þar tilgreindum ákvæðum 40. gr. laga nr. 50/1988, um virðisaukaskatt, sem gera ráð fyrir því að sektarákvörðun sé bundin þeirri skattfjárhæð sem undan var dregin. Verður því að taka afstöðu til þess hvort skattrannsóknarstjóri ríkisins hafi með skattrannsókn sinni sýnt fram á hverju skattfjárhæð, sem undan var dregin, hafi að minnsta kosti numið. Allan vafa í því sambandi verður að meta gjaldanda í hag, sbr. grundvallarreglu 108. gr. laga nr. 88/2008, um meðferð sakamála.
Eins og rakið er að framan eru tölulegar niðurstöður samkvæmt rannsókn skattrannsóknarstjóra ríkisins á skattskilum gjaldanda vegna áranna 2012 og 2013 byggðar á útgefnum sölureikningum gjaldanda. Greindir sölureikningar eru að fjárhæð 3.304.650 kr. rekstrarárið 2012 og 8.117.252 kr. rekstrarárið 2013, og reiknaðist skattskyld velta gjaldanda í samræmi við það 2.669.761 kr. (útskattur 634.889 kr.) fyrra árið og 6.467.930 kr. (útskattur 1.649.322 kr.) seinna árið. Umræddir sölureikningar voru lagðir fyrir gjaldanda við skýrslutöku hjá skattrannsóknarstjóra ríkisins 2. júní 2017 og staðfesti gjaldandi að hafa gefið sölureikningana út og að þeir hefðu fengist greiddir. Eins og fram er komið hefur gjaldandi ekki gert athugasemdir í tilefni af sektarkröfu skattrannsóknarstjóra ríkisins. Samkvæmt þessu og að virtum gögnum málsins þykir ekkert komið fram sem gefur tilefni til annars en að miða við niðurstöður í skýrslu skattrannsóknarstjóra ríkisins um fjárhæð skattskyldrar veltu og útskatts gjaldanda. Af hálfu gjaldanda hefur ekkert komið fram um tilefni til frádráttar innskatts. Verður því einnig byggt á niðurstöðum rannsóknarskýrslu um þann þátt málsins.
Fullsannað þykir samkvæmt því sem að framan er rakið og að öðru leyti með stoð í gögnum málsins, m.a. framburði gjaldanda við skýrslutökur hjá skattrannsóknarstjóra ríkisins, að gjaldandi hafi á saknæman hátt vanrækt að standa á tilskildum tíma skil á virðisaukaskattsskýrslum fyrrgreind uppgjörstímabil árin 2012 og 2013, sbr. 1. mgr. 15. gr. og 1. og 2. mgr. 24. gr. laga nr. 50/1988, og þannig vanrækt að gera grein fyrir virðisaukaskatti til greiðslu samtals að fjárhæð 2.284.211 kr. umrædd uppgjörstímabil, sbr. sundurliðun í kröfubréfi skattrannsóknarstjóra ríkisins. Varðar þetta gjaldanda sekt samkvæmt 1. mgr. 40. gr. laga nr. 50/1988, um virðisaukaskatt, sbr. 3. gr. laga nr. 42/1995.
Ákvarða ber gjaldanda, A, sekt samkvæmt framangreindum ákvæðum 1. mgr. 40. gr. laga nr. 50/1988, sbr. 3. gr. laga nr. 42/1995, vegna vanrækslu á skilum virðisaukaskatts og virðisaukaskattsskýrslna sem að framan greinir. Samkvæmt breytingum á refsiákvæðum skattalaga, sem gerðar voru með lögum nr. 42/1995 og tóku gildi 9. mars 1995, skal sekt aldrei vera lægri en sem nemur tvöfaldri þeirri skattfjárhæð sem undan var dregin, þó að teknu tilliti til álags. Líta ber til þess að gjaldandi gekkst greiðlega við brotum sínum. Að þessu virtu og að teknu tilliti til álags samkvæmt 2. mgr. 27. gr. laga nr. 50/1988 þykir sekt gjaldanda hæfilega ákveðin 4.400.000 kr. til ríkissjóðs.
Úrskurðarorð:
Gjaldandi, A, greiði sekt að fjárhæð 4.400.000 kr. til ríkissjóðs.
