Úrskurður yfirskattanefndar nr. 88/2018

16.5.2018

ÚRSKURÐUR YFIRSKATTANEFNDAR

Ár 2018, miðvikudaginn 16. maí, er tekið fyrir mál nr. 23/2018; krafa skattrannsóknarstjóra ríkisins um að A, kt. […], verði gerð sekt vegna meintra brota á skattalögum. Í málinu úrskurða Ólafur Ólafsson, Þórarinn Egill Þórarinsson og Bjarnveig Eiríksdóttir. Upp er kveðinn svofelldur

ú r s k u r ð u r :

I.

Með bréfi, dags. 8. febrúar 2018, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. […], fyrir brot á lögum nr. 50/1988, um virðisaukaskatt, með áorðnum breytingum, framin vegna rekstraráranna 2012, 2013 og 2014.

Í bréfi skattrannsóknarstjóra ríkisins segir:

„A sem fyrrum stjórnarmanni, prókúruhafa og daglegum stjórnanda X ehf. (nú afskráð), kt. […], er gefið að sök eftirfarandi:

Vanræksla á skilum á virðisaukaskattsskýrslum. Vanframtalin skattskyld velta og útskattur.

A er gefið að sök, að því er best verður séð af ásetningi, en í það minnsta af stórkostlegu hirðuleysi, að hafa vanrækt að standa skil á virðisaukaskattsskýrslum til skattyfirvalda vegna uppgjörstímabilanna nóvember–desember rekstrarárið 2012, janúar–febrúar til og með nóvember–desember rekstrarárið 2013 og janúar–febrúar og mars–apríl rekstrarárið 2014, og vanframtelja með því skattskylda veltu og virðisaukaskatt vegna rekstrar X ehf. Samkvæmt rannsókn skattrannsóknarstjóra ríkisins nemur vanframtalin skattskyld velta samtals kr. 21.580.276 og vanframtalinn útskattur samtals kr. 5.502.970.

Sundurliðast vanframtalin skattskyld velta og virðisaukaskattur svo sem hér greinir:

Sú háttsemi A sem hér hefur verið lýst brýtur í bága við ákvæði 1. mgr. 15. gr. og 1. mgr. 24. gr. sbr. aðalreglur 1. gr., 2. gr., 1. tl. 1. mgr. 3. gr., 1. mgr. 11. gr., 1. mgr. 13. gr., 1. mgr. 14. gr. og 19. gr. laga nr. 50/1988, um virðisaukaskatt, með áorðnum breytingum.

Varðar framanlýst háttsemi A sekt samkvæmt 1. mgr. 40. gr. laga nr. 50/1988, um virðisaukaskatt, með áorðnum breytingum.

Þess er krafist að A verði með úrskurði yfirskattanefndar gert að sæta sekt í samræmi við framangreint.“

Af hálfu skattrannsóknarstjóra ríkisins er málavöxtum lýst í greinargerð, dags. 8. febrúar 2018, sem fylgdi kröfugerðinni.

II.

Með bréfi yfirskattanefndar, dags. 12. febrúar 2018, var gjaldanda veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hann vildi ekki hlíta því að yfirskattanefnd afgreiddi mál hans og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 4. mgr. 41. gr. laga nr. 50/1988, um virðisaukaskatt. Engar athugasemdir hafa borist frá gjaldanda.

III.

1. Með bréfi skattrannsóknarstjóra ríkisins, dags. 8. febrúar 2018, er gerð sú krafa að gjaldanda, A, verði gerð sekt samkvæmt þargreindum ákvæðum 40. gr. laga nr. 50/1988, um virðisaukaskatt, þar sem hann hafi sem fyrirsvarsmaður X ehf., kt. […], nú afskráð, vanrækt að standa skil á virðisaukaskatti félagsins þau uppgjörstímabil árin 2012, 2013 og 2014 sem greinir í bréfinu. Gjaldandi hefur átt þess kost að koma að vörnum fyrir yfirskattanefnd í tilefni af sektarkröfu skattrannsóknarstjóra ríkisins, en engar athugasemdir hafa borist. Þar sem gjaldandi hefur ekki gert athugasemdir við meðferð máls þessa fyrir yfirskattanefnd verður að líta svo á að hann mæli því ekki í gegn að það sæti sektarmeðferð fyrir nefndinni.

2. Sektarkrafa skattrannsóknarstjóra ríkisins í máli þessu er byggð á niðurstöðum rannsóknar embættisins á bókhaldi og skattskilum X ehf. vegna rekstrartímabilsins 1. nóvember 2012 til og með 30. apríl 2014, sbr. skýrslu um rannsóknina, dags. 4. september 2017. Rannsókn þessi hófst formlega hinn 31. mars 2017 og beindist aðallega að virðisaukaskattsskilum félagsins vegna seldrar verktakavinnu við smíðar á rannsóknartímabilinu. Vegna rannsóknarinnar var tekin skýrsla af gjaldanda, A, hjá skattrannsóknarstjóra ríkisins hinn 22. maí 2017 og var rannsóknin byggð á upplýsingum sem þar komu fram, en einnig var byggt á útgefnum sölureikningum X ehf., bankareikningi félagsins og upplýsingum úr upplýsingakerfum ríkisskattstjóra. Með bréfi, dags. 8. ágúst 2017, sendi skattrannsóknarstjóri gjaldanda skýrslu um rannsóknina, sem dagsett var sama dag, og gaf honum kost á að tjá sig um efni hennar áður en ákvörðun yrði tekin um framhald málsins. Engar athugasemdir voru gerðar af hálfu gjaldanda. Í framhaldi af þessu tók skattrannsóknarstjóri ríkisins saman lokaskýrslu sína um rannsókn á máli X ehf. sem var samhljóða hinni fyrri að viðbættum kafla um lok rannsóknarinnar.

Í skýrslu skattrannsóknarstjóra ríkisins, dags. 4. september 2017, voru helstu niðurstöður rannsóknarinnar teknar saman með svofelldum hætti:

„Niðurstöður rannsóknar á bókhaldi og virðisaukaskattsskilum skattaðila vegna rekstrartímabilsins 1. nóvember 2012 til og með 30. apríl 2014 eru:

• Virðisaukaskattsskýrslum fyrir nóvember-desember 2012, allt árið 2013 og janúar-febrúar og mars-apríl 2014 hefur ekki verið skilað.

• Virðisaukaskattsskyld starfsemi skattaðila var hafin áður en skattaðili var komin með virðisaukaskattsnúmer.

• Bókhald hefur ekki verið fært.

• Varðveislu bókhaldsgagna er verulega ábótavant.

• Skattskyld velta og útskattur eru vanframtalin.

• Ekki eru fyrirliggjandi gögn vegna mögulegs innskatts.“

  Þá gerði skattrannsóknarstjóri ríkisins tölulega grein fyrir niðurstöðum rannsóknarinnar í töflu í niðurlagi skýrslu sinnar. Þar kom fram að skattskyld velta X ehf. væri vantalin um 2.608.722 kr. rekstrarárið 2012 (útskattur 665.224 kr.), um 12.327.408 kr. rekstrarárið 2013 (útskattur 3.143.489 kr.) og um 6.644.146 kr. rekstrarárið 2014 (útskattur 1.694.257 kr.).

  3. Í skýrslu skattrannsóknarstjóra ríkisins, dags. 23. nóvember 2012, kemur fram að gjaldandi, A, var stjórnarmaður og prókúruhafi X ehf. á því tímabili sem rannsóknin tók til. Að því er varðar skattskilagögn og bókhald félagsins kemur fram að ekki voru gerð skil á virðisaukaskattsskýrslum félagsins vegna uppgjörstímabilanna nóvember-desember 2012, janúar-febrúar til og með nóvember-desember 2013 og janúar-febrúar og mars-apríl 2014. Þá hafi sex sölureikningar verið gefnir út með virðisaukaskatti áður en félagið var komið með virðisaukaskattsnúmer, en við skýrslutöku af gjaldanda kom fram að þetta gæti stafað af því að sölureikningar hefðu verið gefnir út aftur í tímann og að það hefði tekið tíma að stofna virðisaukaskattsnúmerið. Þá hefði bókhald ekki verið fært. Í skýrslunni kemur fram að fyrirliggjandi séu 37 sölureikningar sem gefnir hafi verið út í nafni X ehf. á rannsóknartímabilinu en tvo sölureikninga vanti til að númeraröð sé samfelld. Við skýrslutöku af gjaldanda kom fram að sölureikningarnir hlytu að hafa týnst eða þeir verið gallaðir. Taldi skattrannsóknarstjóri ríkisins ekki ástæðu til að leggja mat á ætlaðan undandrátt vegna vöntunar sölureikninga.

  Í kafla um rannsókn á skattskyldri veltu og útskatti X ehf. kemur fram að sölureikningar X ehf. að fjárhæð samtals 27.083.246 kr. rekstrarárin 2012, 2013 og 2014 hafi verið bornir undir gjaldanda við skýrslutöku hjá skattrannsóknarstjóra ríkisins. Kannaðist gjaldandi við sölureikningana og sagði þá alla hafa verið greidda að fullu. Er tekið fram í skýrslunni að X ehf. hafi verið áætluð skattskyld velta að fjárhæð 28.823.529 kr. (útskattur 7.350.000 kr.) vegna uppgjörstímabila ársins 2012 og 9.607.843 kr. (útskattur 2.450.000 kr.) vegna uppgjörstímabilanna janúar-febrúar og mars-apríl 2014.

  Í kafla um rannsókn á innskatti X ehf. kemur fram að engin gögn liggi fyrir um mögulegan innskatt X ehf., en við skýrslutöku af gjaldanda kom fram að hann hefði hent bókhaldsgögnum félagsins þegar það var úrskurðað gjaldþrota.

  Við skýrslutöku hjá skattrannsóknarstjóra ríkisins 22. maí 2017 staðfesti gjaldandi, A, að hann hefði verið stjórnarmaður og prókúruhafi X ehf. á rannsóknartímabilinu. Kvaðst gjaldandi einn hafa stjórnað daglegum rekstri félagsins. Við skýrslutökuna voru útgefnir sölureikningar X ehf. uppgjörstímabilin nóvember-desember 2012 til og með mars-apríl 2014 sem fyrr segir lagðir fyrir gjaldanda og kannaðist gjaldandi við sölureikningana og sagði að þeir hefðu allir fengist greiddir að fullu. Gjaldandi sagði að trassaskapur hefði valdið því að virðisaukaskattsskýrslum vegna fyrrgreindra uppgjörstímabila árin 2012, 2013 og 2014 var ekki skilað.

  4. Gjaldandi hefur sem fyrr segir ekki gert athugasemdir í tilefni af sektarkröfu skattrannsóknarstjóra ríkisins og við skýrslutöku, sem fram fór hjá skattrannsóknarstjóra vegna rannsóknar málsins, kom fram viðurkenning gjaldanda á því að hann hefði ekki staðið skil á virðisaukaskattsskýrslum X ehf. og innheimtum virðisaukaskatti vegna seldrar þjónustu félagsins uppgjörstímabilin nóvember-desember 2012 til og með mars-apríl 2014. Í máli því, sem hér er til meðferðar, er um að tefla kröfugerð um ákvörðun sektar á hendur gjaldanda samkvæmt þar tilgreindum ákvæðum 40. gr. laga nr. 50/1988, um virðisaukaskatt, sem gera ráð fyrir því að sektarákvörðun sé bundin þeirri skattfjárhæð sem undan var dregin. Verður því að taka afstöðu til þess hvort skattrannsóknarstjóri ríkisins hafi með skattrannsókn sinni sýnt fram á hverju skattfjárhæð, sem undan var dregin, hafi að minnsta kosti numið. Allan vafa í því sambandi verður að meta gjaldanda í hag, sbr. grundvallarreglu 108. gr. laga nr. 88/2008, um meðferð sakamála.

  Eins og fram er komið eru tölulegar niðurstöður samkvæmt rannsókn skattrannsóknarstjóra ríkisins að því er varðar skattskylda veltu X ehf. uppgjörstímabilin nóvember-desember 2012 til og með mars-apríl 2014 byggðar á sölureikningum félagsins að fjárhæð 27.083.246 kr. sem gefnir voru út á tímabilinu 15. nóvember 2012 til og með 1. apríl 2014. Á þessum grundvelli er í skýrslu skattrannsóknarstjóra ríkisins gerð grein fyrir meintri vantalinni skattskyldri veltu að fjárhæð 21.580.276 kr. greind uppgjörstímabil. Af hálfu gjaldanda, A, er viðurkennt að tekjur félagsins hafi numið þeirri fjárhæð sem sölureikningar þessir bera með sér, sbr. framburð gjaldanda við skýrslutöku hjá skattrannsóknarstjóra ríkisins. Samkvæmt þessu verður miðað við greinda fjárhæð skattskyldrar veltu.

  Samkvæmt framansögðu telst hafa verið leitt í ljós með rannsókn skattrannsóknarstjóra ríkisins að skil voru ekki gerð á virðisaukaskattsskýrslum og virðisaukaskatti X ehf. uppgjörstímabilin nóvember-desember 2012 til og með mars-apríl 2014 þrátt fyrir skattskylda veltu í rekstri félagsins samkvæmt því sem rakið er að framan.

  Gjaldandi, A, var stjórnarmaður og prókúruhafi X ehf. á þeim tíma sem málið varðar. Við skýrslutöku hjá skattrannsóknarstjóra ríkisins kom fram af hálfu gjaldanda að hann hefði stjórnað daglegum rekstri félagsins. Bar gjaldandi ábyrgð á daglegum rekstri félagsins, þar á meðal fjárreiðum, sbr. 44. gr. laga nr. 138/1994, um einkahlutafélög, og að skil væru gerð á virðisaukaskattsskýrslum félagsins og virðisaukaskatti í samræmi við ákvæði 1. mgr. 15. gr. og 1. og 2. mgr. 24. gr. laga nr. 50/1988, um virðisaukaskatt. Samkvæmt því sem hér hefur verið rakið og að öðru leyti með stoð í gögnum málsins þykir bera að fallast á ályktun skattrannsóknarstjóra ríkisins um að gjaldandi hafi með saknæmum hætti vanrækt þessar skyldur sínar umrædd uppgjörstímabil árin 2012, 2013 og 2014, en virðisaukaskattur sem ekki var greiddur á lögmæltum tíma nam 5.502.970 kr. Af þessum sökum ber að ákvarða gjaldanda sekt samkvæmt 6. mgr., sbr. 1. mgr. 40. gr. laga nr. 50/1988, um virðisaukaskatt, sbr. 3. gr. laga nr. 42/1995.

  Eins og lög nr. 50/1988 hljóða eftir breytingar, sem á þeim voru gerðar með lögum nr. 42/1995, skal sekt aldrei vera lægri en sem nemur tvöfaldri þeirri skattfjárhæð sem undan var dregin eða vanrækt var greiðsla á, þó að teknu tilliti til álags. Samkvæmt þessu, málsatvikum að öðru leyti og að teknu tilliti til álags samkvæmt 2. mgr. 27. gr. laga nr. 50/1988 þykir sekt gjaldanda hæfilega ákveðin 10.500.000 kr. til ríkissjóðs.

  Úrskurðarorð:

• Gjaldandi, A, greiði sekt að fjárhæð 10.500.000 kr. til ríkissjóðs.