Dómur héraðsdóms Reykjaness 9. mars 2020 í máli númer S-1875/2019
Dómur 9. mars 2020
Mál nr. S-1875/2019:
Ákæruvaldið
(Ásmunda Björg Baldursdóttir)
gegn
Bylgju Hauksdóttur
(Garðar G. Gíslason)
Dómur
Mál þetta er höfðað með ákæru héraðssaksóknara, útgefinni 24. október 2019, á hendur Bylgju Hauksdóttur, kt. 000000-0000, […],
„I.
fyrir meiriháttar skattalagabrot með því að hafa staðið skil á efnislega röngum skattframtölum gjaldárin 2011 til og með 2017, vegna tekjuáranna 2010 til og með 2016, með því að láta undir höfuð leggjast að telja fram á skattframtölum sínum vegna fyrrgreindra ára, tekjur samtals að fjárhæð kr. 196.321.514, frá einkahlutafélaginu Sæmark-Sjávarafurðir, sem skattskyldar eru sem tekjur samkvæmt 1. tl. A-liðar 7. gr. laga um tekjuskatt nr. 90/2003, sbr. einnig 19. og 21. gr. laga nr. 4/1995 um tekjustofna sveitarfélaga, en með því komst ákærða hjá að greiða tekjuskatt og útsvar að fjárhæð samtals 89.156.812 krónur, sem sundurliðast sem hér greinir:
II.
Fyrir peningaþvætti með því að hafa nýtt ávinning af brotum skv. 2. tölulið ákæru, samtals að fjárhæð 89.156.812 krónur, í eigin þágu.
III.
Framangreind brot [ákærðu] samkvæmt 1. tölulið ákæru teljast varða við 1. mgr. 262. gr. almennra hegningarlaga nr. 19/1940, sbr. einnig 1. mgr. 109. gr. laga nr. 90/2003 um tekjuskatt, og 2. mgr. 22. gr. laga nr. 4/1995 um tekjustofna sveitarfélaga. Framangreind brot [ákærðu] samkvæmt 2. tölulið ákæru teljast varða við 1. mgr., sbr. 2. mgr. 264. gr. almennra hegningarlaga nr. 19/1940. Þess er krafist að ákærða verði dæmd til refsingar og til greiðslu alls sakarkostnaðar.“
Ákærða kom fyrir dóm og játaði sök samkvæmt ákæru. Ákærða krefst vægustu refsingar sem lög leyfi. Var málið dómtekið 27. janúar.
Með játningu ákærðu, sem fær næga stoð í gögnum málsins og ekki þykir ástæða til að draga í efa, telst ákærða sönn að sök og hefur unnið sér til refsingar en háttsemi hennar er rétt færð til refsiheimilda í ákæru.
Ákærðu hefur samkvæmt sakavottorði ekki verið gerð refsing áður. Hún játar skýlaust. Af hennar hálfu var fyrir dómi lýst mikilli iðrun vegna brotsins.
Í málinu liggur tölvubréf lögmanns brotaþola til skattyfirvalda, sent 1. apríl 2019. Þar segir að ákærða hafi skýlaust játað brot sín við rannsókn málsins og óski hún þess að skattar sínar verði endurákvarðaðir hið fyrsta svo hún geti sem fyrst greitt það sem vangreitt hafi verið.
Í málinu liggja gögn er sýna að ákærða hefur nú greitt skattyfirvöldum þá fjárhæð sem málið varðar.
Þegar horft er á þær fjárhæðir sem málið varðar og allt framanritað verður refsing ákærðu í málinu ákveðin fangelsi í tuttugu mánuði og 178.500.000 króna sekt í ríkissjóð. Fullnustu fangelsisrefsingarinnar skal frestað og niður falli hún að liðnum tveimur árum haldi ákærða almennt skilorð. Greiði ákærða ekki sektina innan fjögurra vikna frá birtingu dómsins skal ákærða sæta fangelsi í tólf mánuði. Verjandi ákærðu, Garðar G. Gíslason lögmaður, afsalaði sér þóknun. Af hálfu ákæruvaldsins fór Ásmunda B. Baldursdóttir saksóknari með málið. Þorsteinn Davíðsson kveður upp dóm þennan.
D Ó M S O R Ð
Ákærða, Bylgja Hauksdóttir, sæti fangelsi í tuttugu mánuði. Fullnustu refsingarinnar skal frestað og niður skal hún falla að liðnum tveimur árum haldi ákærða almennt skilorð 57. gr. laga nr. 19/1940.
Ákærða greiði 178.500.000 króna sekt í ríkissjóð en tólf mánaða fangelsi komi í stað sektarinnar verði hún ekki greidd innan fjögurra vikna frá birtingu dómsins.
Þorsteinn Davíðsson
