Yfirlýsing ársreikningaskrár vegna birtingar upplýsinga sbr. ákvæði 8. gr. flokkunarreglugerðar Evrópusambandsins
Með lögum nr. 25/2023, um upplýsingagjöf um sjálfbærni á sviði fjármálaþjónustu og flokkunarkerfi fyrir sjálfbærar fjárfestingar, voru ákvæði flokkunarreglugerðar Evrópusambandsins nr. 2020/852 (EU Taxonomy) og reglugerð nr. 2019/2088 (SFDR) innleidd í íslenskan rétt.
Ákvæði 8. gr. flokkunarreglugerðarinnar varðar
upplýsinga sem fyrirtæki skulu birta í yfirliti yfir ófjárhagslegar upplýsingar
sem skal fylgja með skýrslu stjórnar. Ákvæði framangreindrar 8. gr.
flokkunarreglugerðarinnar eru nánar útfærð í framseldri reglugerð
framkvæmdastjórnarinnar (ESB) 2021/2178, sem öðlaðist gildi hér á landi með
reglugerð ráðherra nr. 10/2024.
Notkun sniðmáta
Ekki er hægt að gera kröfu til þess að íslensk fyrirtæki birti upplýsingar í samræmi við kröfur sem eru settar fram í reglugerðum, tilskipunum eða öðrum gerðum Evrópusambandsins sem ekki hafa verið innleiddar hér á landi og eru ekki hluti af samningnum um Evrópska efnahagssvæðið. Þrátt fyrir það vill ársreikningaskrá benda á að birta þarf allar þær línur sem eiga að birtast samkvæmt viðeigandi sniðmáti sem finna má í viðaukum við framselda reglugerð (ESB) 2021/2178, burtséð frá því hvort vísað sé til gerða Evrópusambandsins sem ekki hafa verið innleiddar í íslenskan rétt. Í slíkum tilvikum þarf að vísa til skýringaliðar þar sem fram kemur að viðeigandi liður innihaldi tilvísun í gerð sem ekki hefur verið innleidd í íslenskan rétt og því sé ekki hægt að birta umræddar upplýsingar. Dæmi um slíkt er tilskipun 2010/31/ESB um orkunýtingu bygginga en Íslandi hefur tímabundna undanþágu frá gildissviði framangreindri tilskipun, að því gefnu að undanþágan taki til tilskipunarinnar í heild sinni.
Sérstök undanþága fyrirtækja á fjármálamarkaði
Ársreikningaskrá hefur fallist á að veita fyrirtækjum á fjármálamarkaði takmarkaða undanþágu frá birtingu upplýsinga í viðeigandi sniðmátum fyrir fjármálafyrirtæki að því marki sem ekki eru til staðar viðeigandi og/eða áreiðanlegar upplýsingar. Í slíkum tilvikum skal setja athugasemd við viðeigandi sniðmát. Dæmi um slíkt eru upplýsingar sem afleiddar eru úr ársreikningum fyrirtækja og lúta að lánasöfnum lánastofnana.
