Ákvörðun 5/2023 um sátt
Þann 31. maí 2023 gerðu ríkisskattstjóri og Bílasala
Akureyrar ehf., kt. 531294-2469, (hér eftir málsaðili) með sér samkomulag um að
ljúka máli málsaðila með sátt vegna brota á ákvæðum laga nr. 140/2018 um
aðgerðir gegn peningaþvætti og fjármögnun hryðjuverka (hér eftir oftast pþl.)
og vegna brota á ákvæðum laga nr. 64/2019 um frystingu fjármuna og skráningu
aðila á lista yfir þvingunaraðgerðir í tengslum við fjármögnun hryðjuverka og
útbreiðslu gereyðingarvopna (hér eftir oftast frystingarlög).
Meginatriði samkomulagsins eru sem hér segir:
Málsaðili viðurkennir að hafa brotið gegn eftirfarandi ákvæðum laganna:
- Áreiðanleikakannanir voru ekki framkvæmdar á viðskiptamönnum í samræmi við 8. og 10. gr. pþl., sem telst brot gegn 3. og 4. tölul. 1. mgr. 46. gr. pþl.
- Fullnægjandi upplýsinga um raunverulegan eiganda var ekki aflað í samræmi við 10. gr. pþl., sem telst brot gegn 4. tölul. 1. mgr. 46. gr. pþl.
- Stjórnmálaleg tengsl viðskiptamanna voru ekki könnuð samkvæmt 1. mgr. 17. gr. pþl., sem telst brot gegn 11. tölul. 1. mgr. 46. gr. pþl.
- Afrit af gögnum og upplýsingum vegna áreiðanleikakannana, þ. á m. könnun á stjórnmálalegum tengslum viðskiptamanna, sbr. 1. mgr. 17. gr. pþl., voru ekki varðveitt í samræmi við a-lið 1. mgr. 28. gr. pþl., sem telst brot gegn 16. tölul. 1. mgr. 46. gr. pþl.
- Ferlar og aðferðir til að meta hvort viðskiptamenn séu á listum yfir þvingunaraðgerðir voru ekki til staðar í samræmi við 2. mgr. 7. gr. frystingarlaga, sem telst brot gegn 2. tölul. 1. mgr. 20. gr. frystingarlaga.
Með samkomulagi þessu fellst málsaðili á að greiða sekt að fjárhæð 1.500.000 krónur.
Þá skal málsaðili framkvæma fullnægjandi úrbætur innan tilgreindra tímamarka í samræmi við úrbótakröfu ríkisskattstjóra.
Málavextir, málsástæður og lagarök
Með bréfi óskaði ríkisskattstjóri eftir upplýsingum og gögnum frá málsaðila á grundvelli 2. mgr. 38. gr. pþl. og 2. mgr. 16. gr. frystingarlaga.
Málsaðili varð við beiðni ríkisskattstjóra og afhenti umbeðin gögn.
Í framhaldinu boðaði ríkisskattstjóri til vettvangsathugunar á starfsstöð málsaðila.
Við framkvæmd vettvangsathugunar varð meðal annars ljóst að málsaðili hafði framkvæmt áhættumat og peningaþvættisstefna var til staðar. Þá kom í ljós að málsaðili hafði aðeins hafið að framkvæma áreiðanleikakannanir á viðskiptamönnum eftir fyrirspurn ríkisskattstjóra. Af þeim sökum höfðu áreiðanleikakannanir ekki verið framkvæmdar, upplýsinga um raunverulega eigendur lögaðila ekki verið aflað, ekki höfðu verið gerðar athuganir á því hvort viðskiptamenn teldust vera í áhættuhópi vegna stjórnmálalegra tengsla, gögn voru ekki vistuð og ferlar og aðferðir til að meta hvort viðskiptamenn væru á listum yfir þvingunaraðgerðir voru ekki til staðar. Þá kom einnig í ljós að þær áreiðanleikakannanir sem nýlega höfðu verið framkvæmdar voru að mestu leyti framkvæmdar með fullnægjandi hætti. Teljast framangreind brot varða stjórnvaldssekt í samræmi við 46. gr. pþl. og 20. gr. frystingarlaga.
Sektarfjárhæð
Sektarfjárhæð er ákvörðuð í samræmi við reglur ríkisskattstjóra nr. 1132/2020, um sáttagerðir samkvæmt lögum nr. 140/2018. Samkvæmt reglunum er miðað við að sektarfjárhæð sé hlutfallslega lægri en sem ætla má að fjárhæð stjórnvaldssektar gæti numið að teknu tilliti til mögulegra þyngingar- og mildunarsjónarmiða auk þess sem litið er til þess á hvaða stigi meðferð máls er þegar því er lokið með sátt.
Samkvæmt 1. mgr. 44. gr. a pþl., sbr. einnig 2. mgr. 20. gr. frystingarlaga, skal, við ákvörðun um tegund og umfang viðurlaga, tekið tillit til allra atvika sem máli skipta, þ.m.t. alvarleika brots, hvað brotið hefur staðið yfir lengi, ábyrgðar hins brotlega hjá lögaðilanum, fjárhagsstöðu hins brotlega, ávinnings af broti eða taps sem forðað er með broti, hvort brot hafi leitt til taps þriðja aðila, hvers konar mögulegra kerfislegra áhrifa brotsins, samstarfsvilja hins brotlega, fyrri brota og hvort um ítrekað brot er að ræða.
Við mat á fjárhæð sektar hefur ríkisskattstjóri litið til þess að félaginu var ekki kunnugt um skyldur sínar samkvæmt pþl. fram að fyrirspurn ríkisskattstjóra til félagsins og starfaði því ekki í samræmi við kröfur sem gerðar eru samkvæmt lögunum fram að því. Einnig er litið til þess að þær fáu áreiðanleikakannanir sem höfðu verið framkvæmdar af hálfu félagsins eftir fyrirspurn ríkisskattstjóra voru að mestu leyti fullnægjandi. Þá hefur félagið sýnt samstarfsvilja og veitt ríkisskattstjóra greiðan aðgang að öllum umbeðnum upplýsingum. Auk framangreinds hefur ríkisskattstjóri einnig litið til fjárhagsstöðu félagsins eins og hún birtist í ársreikningum félagsins. Málsaðila var tilkynnt að ríkisskattstjóri hygðist leggja á málsaðila stjórnvaldssekt og að sektarfjárhæð, að öllu framangreindu virtu, teldist hæfilega ákveðin 3.000.000 kr. Með vísan til 2. mgr. 3. gr. reglna ríkisskattstjóra nr. 1132/2020 nemur fjárhæð sáttar 50% af boðaðri sektarfjárhæð, eða alls að fjárhæð 1.500.000 kr.
Réttaráhrif
Samkomulag þetta er gert á grundvelli 47. gr. pþl., 21. gr. frystingarlaga og reglna ríkisskattstjóra nr. 1132/2020, um sáttagerðir samkvæmt lögum nr. 140/2018.
Málsaðili telst uppfylla sáttina við greiðslu sektarfjárhæðar og staðfestingu á að úrbótum sé lokið.
Með vísan til 53. gr. pþl., 25. gr. frystingarlaga og reglna ríkisskattstjóra nr. 1131/2020, um opinbera birtingu stjórnsýsluviðurlaga samkvæmt lögum nr. 140/2018, um aðgerðir gegn peningaþvætti og fjármögnun hryðjuverka og lögum nr. 64/2019, um frystingu fjármuna og skráningu aðila á lista yfir þvingunaraðgerðir í tengslum við fjármögnun hryðjuverka og útbreiðslu gereyðingarvopna, um aðgerðir gegn peningaþvætti og fjármögnun hryðjuverka, er meginreglan sú að birta skuli opinberlega öll stjórnsýsluviðurlög sem ákveðin eru í samræmi við 46.–47. og 50.–51. gr. pþl. og 20. og 21. gr. frystingarlaga.
