Úrskurður yfirskattanefndar nr. 288/2007
Skattaðili: X ehf. og Y ehf.
Verknaðarlýsing: A, sem stjórnarmanni og prókúruhafa X ehf., og sem stjórnarmanni og prókúruhafa Y ehf. var gefið að sök eftirfarandi:
Brot vegna rekstrar X ehf.:
A var gefið að sök að hafa vanrækt að standa innheimtumanni ríkissjóðs skil á afdreginni staðgreiðslu opinberra gjalda launamanna X ehf., vegna greiðslutímabilanna september, október, nóvember og desember rekstrarárið 2002 og janúar rekstrarárið 2003. Þá var A gefið að sök að hafa vanrækt að standa skil á skilagreinum vegna staðgreiðslu opinberra gjalda vegna framangreindra greiðslutímabila á lögmæltum tíma. Nam fjárhæðin samtals kr. 239.231.
Eins var A gefið að sök að hafa vanrækt að standa innheimtumanni ríkissjóðs skil á virðisaukaskatti sem innheimtur var í rekstri X ehf., vegna uppgjörstímabilanna júlí-ágúst, september-október og nóvember-desember rekstrarárið 2002. Þá var A gefið að sök að hafa vanrækt að standa innheimtumanni ríkissjóðs skil á virðisaukaskattsskýrslum vegna uppgjörstímabilanna júlí-ágúst og nóvember-desember rekstrarárið 2002 á lögmæltum tíma. Nam fjárhæðin samtals kr. 1.286.706.
Brot vegna rekstrar Y ehf.:
A, sem stjórnarmanni og prókúruhafa Y ehf., var gefið að sök að hafa vanrækt að standa innheimtumanni ríkissjóðs skil á afdreginni staðgreiðslu opinberra gjalda launamanna Y ehf., vegna greiðslutímabilanna janúar til og með desember rekstrarárið 2003 og júní, júlí, ágúst og september rekstrarárið 2004. Þá var A gefið að sök að hafa vanrækt að standa innheimtumanni ríkissjóðs skil á skilagreinum vegna staðgreiðslu opinberra gjalda vegna framangreindra greiðslutímabila á lögmæltum tíma. Nam fjárhæðin samtals kr. 372.076.
Eins var A gefið að sök að hafa vanrækt að standa innheimtumanni ríkissjóðs skil á virðisaukaskatti sem innheimtur var í rekstri Y ehf., vegna uppgjörstímabilanna september-október og nóvember-desember rekstrarárið 2002, janúar-febrúar til og með nóvember desember rekstrarárið 2003 og janúar-febrúar, mars-apríl og maí-júní rekstrarárið 2004. Þá var A gefið að sök að hafa vanrækt að standa innheimtumanni ríkissjóðs skil á virðisaukaskattsskýrslum vegna framangreindra uppgjörstímabila á lögmæltum tíma. Nam fjárhæðin samtals kr. 2.950.554.
Niðurstaða: Háttsemin þótti sönnuð. Undantekning Lækkunarákvæði laga nr. 134/2005 þóttu eiga við að hluta.
Brotin varða við: 1. og 2. mgr. 20. gr., sbr. 1. og 2. mgr. 15. gr. og 1. mgr. 16. gr. laga nr. 45/1987, um staðgreiðslu opinberra gjalda, með áorðnum breytingum, sbr. 2. mgr. 30. gr. sömu laga. 1. mgr. 15. gr. og 1. og 2. mgr. 24. gr. laga nr. 50/1988, um virðisaukaskatt, sbr. 1. mgr. 40. gr. sömu laga.
Úrskurðuð sekt: A gert að greiða sekt að fjárhæð kr. 6.600.000 til ríkissjóðs.