Úrskurður yfirskattanefndar nr. 570/2012
Úrskurður nr. 570/2012
ÚRSKURÐUR YFIRSKATTANEFNDAR
Ár 2012, miðvikudaginn 14. nóvember, er tekið fyrir mál nr. 168/2012; krafa skattrannsóknarstjóra ríkisins um að A, kt. [...], verði gerð sekt vegna meintra brota á skattalögum. Í málinu úrskurða Ólafur Ólafsson, Anna Dóra Helgadóttir og Sverrir Örn Björnsson. Upp er kveðinn svofelldur
ú r s k u r ð u r :
I.
Með bréfi, dags. 25. apríl 2012, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. [...], fyrir brot á lögum nr. 50/1988, um virðisaukaskatt, framin vegna rekstraráranna 2005, 2006 og 2007.
Í bréfi skattrannsóknarstjóra ríkisins segir:
„A er gefið að sök eftirfarandi:
Vanræksla á skilum á virðisaukaskattsskýrslum. Vanframtalin skattskyld velta og útskattur.
A er gefið að sök, að því er best verður séð af ásetningi, en í það minnsta af stórkostlegu hirðuleysi, að hafa vanrækt að standa skil á virðisaukaskattsskýrslum til skattstjórans í Suðurlandsumdæmi vegna allra uppgjörstímabila rekstrarárin 2005, 2006 og 2007 og vanframtelja með því skattskylda veltu og virðisaukaskatt. Samkvæmt rannsókn skattrannsóknarstjóra ríkisins nemur vanframtalin skattskyld velta samtals kr. 22.653.715 og vanframtalinn útskattur samtals kr. 5.547.804.
Sundurliðast vanframtalin skattskyld velta og virðisaukaskattur svo sem hér greinir:
|
Rekstrarár |
Uppgjörstímabil |
Vanframtalin skattskyld velta | Vanframtalinn útskattur |
| 2005 | jan.– feb. | 1.232.700 | 302.010 |
| 2005 | mars – apríl | 840.340 | 205.882 |
| 2005 | maí – júní | 1.926.380 | 471.962 |
| 2005 | júlí – ágúst | 1.434.480 | 351.447 |
| 2005 | sept. – okt. | 997.200 | 244.314 |
| 2005 | nóv. – des. | 1.123.500 | 275.257 |
| Samtals kr. | 7.554.600 | 1.850.872 | |
| 2006 | jan.– feb. | 1.398.500 | 342.632 |
| 2006 | mars – apríl | 1.205.500 | 295.346 |
| 2006 | maí – júní | 1.358.000 | 332.709 |
| 2006 | júlí – ágúst | 970.568 | 237.788 |
| 2006 | sept. – okt. | 1.040.850 | 255.007 |
| 2006 | nóv. – des. | 1.300.466 | 317.360 |
| Samtals kr. | 7.273.884 | 1.780.842 | |
| 2007 | jan.– feb. | 1.236.453 | 302.236 |
| 2007 | mars – apríl | 1.495.254 | 365.942 |
| 2007 | maí – júní | 1.205.575 | 295.366 |
| 2007 | júlí – ágúst | 973.419 | 238.487 |
| 2007 | sept. – okt. | 1.646.221 | 403.324 |
| 2007 | nóv. – des. | 1.268.309 | 310.735 |
| Samtals kr. | 7.825.231 | 1.916.090 | |
| Samtals öll árin kr. | 22.653.715 | 5.547.804 |
Sú háttsemi A sem hér hefur verið lýst brýtur í bága við ákvæði 1. mgr. 15. gr. og 1. mgr. 24. gr. sbr. aðalreglur 1. gr., 2. gr., 1. tl. 1. mgr. 3. gr., 1. mgr. 11. gr., 1. mgr. 13. gr., 1. mgr. 14. gr. og 19. gr. laga nr. 50/1988, um virðisaukaskatt, með áorðnum breytingum.
Varðar framanlýst háttsemi A sekt samkvæmt 1. mgr. 40. gr. laga nr. 50/1988, um virðisaukaskatt, með áorðnum breytingum.
Við endurákvörðun á virðisaukaskatti vegna rekstraráranna 2006 og 2007 hefur A verið gert að sæta álagi á vangreiddan virðisaukaskatt, kr. 75.928, er komi til frádráttar við ákvörðun sektarfjárhæðar.
Þess er krafist að A verði með úrskurði yfirskattanefndar gert að sæta sekt í samræmi við framangreint.“
Af hálfu skattrannsóknarstjóra ríkisins er málavöxtum lýst í greinargerð, dags. 25. apríl 2012, sem fylgdi kröfugerðinni.
II.
Með bréfi yfirskattanefndar, dags. 31. maí 2012, var gjaldanda veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hann vildi ekki hlíta því að yfirskattanefnd afgreiddi mál hans og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 4. mgr. 41. gr. laga nr. 50/1988, um virðisaukaskatt. Var bréf þetta birt gjaldanda eftir ákvæðum b-liðar 1. mgr. 83. gr. laga nr. 91/1991, um meðferð einkamála, í framhaldi af því að hann vitjaði ekki ábyrgðarbréfs yfirskattanefndar, dags. 26. apríl 2012, um sama efni. Engar athugasemdir hafa borist frá gjaldanda.
III.
1. Með bréfi skattrannsóknarstjóra ríkisins, dags. 25. apríl 2012, er gerð sú krafa að gjaldanda, A, verði gerð sekt samkvæmt þargreindum ákvæðum 40. gr. laga nr. 50/1988, um virðisaukaskatt. Gjaldandi hefur átt þess kost að koma að vörnum fyrir yfirskattanefnd í tilefni af sektarkröfu skattrannsóknarstjóra ríkisins, en engar athugasemdir hafa borist. Þar sem gjaldandi hefur ekki gert athugasemdir við meðferð máls þessa fyrir yfirskattanefnd verður að líta svo á að hann mæli því ekki í gegn að það sæti sektarmeðferð fyrir nefndinni.
2. Sektarkrafa skattrannsóknarstjóra ríkisins í máli þessu er byggð á niðurstöðum rannsóknar embættisins á bókhaldi og skattskilum gjaldanda vegna rekstraráranna 2005, 2006 og 2007, sbr. skýrslu um rannsóknina, dags. 18. október 2011, þar sem fram kom að á rannsóknartímabilinu hefði gjaldandi starfað sjálfstætt við vélvirkjun. Rannsókn skattrannsóknarstjóra ríkisins hófst formlega hinn 11. maí 2011 og beindist að virðisaukaskattsskilum gjaldanda. Var rannsóknin einkum byggð á upplýsingum sem fram komu við skýrslutökur af gjaldanda dagana 22. ágúst 2011 og 15. september 2011, á sölureikningum gjaldanda, bankaupplýsingum og upplýsingum úr upplýsingakerfum ríkisskattstjóra. Með bréfi, dags. 29. september 2011, sendi skattrannsóknarstjóri gjaldanda skýrslu um rannsóknina, dags. 28. september 2011, og gaf honum kost á að tjá sig um efni hennar. Athugasemdir voru ekki gerðar af hálfu gjaldanda. Í framhaldi af þessu tók skattrannsóknarstjóri ríkisins saman nýja skýrslu um rannsóknina, dags. 18. október 2011, sem var efnislega samhljóða hinni fyrri að viðbættum kafla um lok rannsóknarinnar.
Í skýrslu skattrannsóknarstjóra ríkisins, dags. 18. október 2011, voru helstu niðurstöður rannsóknarinnar dregnar saman með svofelldum hætti:
„Niðurstöður rannsóknar á bókhaldi og virðisaukaskattsskilum vegna rekstraráranna 2005 til og með 2007 eru:
·1 Ekki hafa verið staðin skil á virðisaukaskattsskýrslum vegna uppgjörstímabila rekstraráranna 2005 til og með 2007.
·2 Bókhald hefur ekki verið fært.
·3 Sölureikningar liggja fyrir.
·4 Skattskyld velta er vanframalin.
·5 Útskattur er vanframtalinn.“
Þá gerði skattrannsóknarstjóri ríkisins tölulega grein fyrir niðurstöðum rannsóknarinnar í töflu í niðurlagi skýrslu sinnar. Þar kom fram að skattskyld velta gjaldanda væri vantalin um 7.554.600 kr. rekstrarárið 2005, um 7.273.884 kr. rekstrarárið 2006 og um 7.825.231 kr. rekstrarárið 2007. Þá væri útskattur vantalinn um samtals 5.547.804 kr. greind ár.
Af hálfu skattrannsóknarstjóra ríkisins var mál gjaldanda sent ríkisskattstjóra til meðferðar, sbr. 5. mgr. 39. gr. laga nr. 50/1988, um virðisaukaskatt, sbr. bréf skattrannsóknarstjóra ríkisins, dags. 20. október 2011. Á grundvelli rannsóknar skattrannsóknarstjóra ríkisins og í framhaldi af bréfi til gjaldanda, dags. 17. janúar 2012, sem gjaldandi svaraði ekki, endurákvarðaði ríkisskattstjóri með úrskurði, dags. 11. apríl 2012, virðisaukaskatt gjaldanda árin 2005, 2006 og 2007. Samkvæmt úrskurðinum var skattskyld velta ákvörðuð 7.554.600 kr. rekstrarárið 2005, 7.273.884 kr. rekstrarárið 2006 og 7.825.231 kr. rekstrarárið 2007, og kom fram að það væri niðurstaða ríkisskattstjóra að vantalin skattskyld velta og útskattur væri sá sem tilgreindur væri í skýrslu skattrannsóknarstjóra ríkisins. Samkvæmt framangreindu varð virðisaukaskattur til greiðslu 1.850.877 kr. árið 2005, 1.782.102 kr. árið 2006 og 1.917.182 kr. árið 2007 auk álags samkvæmt 1. og 2. mgr. 27. gr. laga nr. 50/1988. Gjaldandi nýtti sér ekki heimilaðar málskotsleiðir vegna þessa úrskurðar ríkisskattstjóra.
3. Fram kemur í skýrslu skattrannsóknarstjóra ríkisins, dags. 18. október 2011, að gjaldandi hafi ekki staðið skil á virðisaukaskattsskýrslum vegna uppgjörstímabila á árunum 2005, 2006 og 2007. Er í þessu sambandi rakinn sá framburður gjaldanda við skýrslutöku 22. ágúst 2011 að kæruleysi hans hefði valdið vanskilum á skýrslum. Þá kemur fram að gjaldandi hafi ekki fært eða látið færa bókhald vegna starfsemi sinnar. Fyrirliggjandi séu sölureikningar gjaldanda úr tveimur reikningsheftum með númeraröðunum 6-50 og 1-33 og sé númeraröðin samfelld.
Í skýrslu skattrannsóknarstjóra ríkisins er gerð grein fyrir rannsókn á skattskyldri veltu og útskatti gjaldanda. Við skýrslutöku 22. ágúst 2011 voru útgefnir sölureikningar gjaldanda rekstrarárin 2005, 2006 og 2007 lagðir fyrir hann og staðfesti gjaldandi að hann hefði gefið þá út og að þeir hafi allir fengist greiddir nema síðustu reikningarnir frá X ehf., þ.e. reikningar nr. 31, 32 og 33. Í skýrslunni er gerð grein fyrir því að skattrannsóknarstjóri ríkisins hafi aflað bankareikninga skattaðila og samkvæmt þeim, sbr. einnig hreyfingalista frá X ehf., hefðu umræddir reikningar verið greiddir. Væru þeir því meðtaldir í niðurstöðum skýrslunnar. Við skýrslutökuna lagði gjaldandi fram gögn þar sem finna mátti sölureikninga frá Z hf. að fjárhæð 1.036.586 kr. og frá Y ehf. að fjárhæð 93.375 kr. Voru umræddir sölureikningar lagðir fyrir gjaldanda í skýrslutöku hinn 15. september 2011 og staðfesti gjaldandi að hafa gefið reikningana út og fengið þá greidda. Þá er í skýrslu skattrannsóknarstjóra ríkisins gerð grein fyrir fjárhæð skattskyldrar veltu gjaldanda á árunum 2005, 2006 og 2007 samkvæmt fyrirliggjandi sölureikningum gjaldanda. Hafi vanframtalin skattskyld velta gjaldanda numið 7.554.600 kr. rekstrarárið 2005 (útskattur 1.850.872 kr.), 7.273.884 kr. rekstrarárið 2006 (útskattur 1.780.842 kr.) og 7.825.231 kr. rekstrarárið 2007 (útskattur 1.916.090 kr.). Samkvæmt framansögðu hafi skattskyld velta því verið vantalin um samtals 22.653.715 kr. og útskattur um samtals 5.547.804 kr. umrædd ár.
Í kafla um rannsókn á innskatti gjaldanda er greint frá því að engin gögn hafi komið fram um mögulegan innskatt gjaldanda. Í kaflanum er þess getið að bókað hafi verið eftir gjaldanda við skýrslutöku að hann hefði sagst hafa stofnað til kostnaðar vegna sjálfstæðrar starfsemi sinnar en hann gæti ekki afhent nein gögn vegna þess.
4. Gjaldandi hefur sem fyrr segir ekki gert athugasemdir í tilefni af sektarkröfu skattrannsóknarstjóra ríkisins og við skýrslutökur, sem fram fóru hjá skattrannsóknarstjóra vegna rannsóknar málsins, kom fram viðurkenning gjaldanda á því að hann hefði ekki staðið skil á virðisaukaskattsskýrslum og innheimtum virðisaukaskatti árin 2005, 2006 og 2007. Í máli því, sem hér er til meðferðar, er um að tefla kröfugerð um ákvörðun sektar á hendur gjaldanda samkvæmt þar tilgreindum ákvæðum 40. gr. laga nr. 50/1988, um virðisaukaskatt, sem gera ráð fyrir því að sektarákvörðun sé bundin þeirri skattfjárhæð sem undan var dregin. Verður því að taka afstöðu til þess hvort skattrannsóknarstjóri ríkisins hafi með skattrannsókn sinni sýnt fram á hverju skattfjárhæð, sem undan var dregin, hafi að minnsta kosti numið. Allan vafa í því sambandi verður að meta gjaldanda í hag, sbr. grundvallarreglu 108. gr. laga nr. 88/2008, um meðferð sakamála.
Eins og rakið er að framan eru tölulegar niðurstöður samkvæmt rannsókn skattrannsóknarstjóra ríkisins á skattskilum gjaldanda vegna áranna 2005, 2006 og 2007 byggðar á útgefnum sölureikningum gjaldanda sem hann afhenti skattrannsóknarstjóra vegna rannsóknar málsins. Greindir sölureikningar eru að fjárhæð 9.405.472 kr. rekstrarárið 2005, 9.055.980 kr. rekstrarárið 2006 og 9.742.408 kr. rekstrarárið 2007 og reiknaðist skattskyld velta gjaldanda í samræmi við það 7.554.600 kr. rekstrarárið 2005, 7.273.884 kr. rekstrarárið 2006 og 7.825.231 kr. rekstrarárið 2007 og útskattur 1.850.872 kr. árið 2005, 1.780.842 kr. árið 2006 og 1.916.090 kr. árið 2007. Eru þetta þær fjárhæðir sem tilgreindar eru sem tölulegar niðurstöður rannsóknarinnar um vantalda skattskylda veltu og virðisaukaskatt (útskatt). Umræddir sölureikningar voru lagðir fyrir gjaldanda við skýrslutökur hjá skattrannsóknarstjóra ríkisins 22. ágúst 2011 og 15. september 2011 og staðfesti gjaldandi að hafa gefið sölureikningana út og að þeir hefðu fengist greiddir að undanskildum þremur reikningum frá X ehf. Við rannsókn á bankareikningum gjaldanda upplýstist að umræddir þrír reikningar hefðu fengist greiddir. Þá voru reikningarnir einnig bókaðir greiddir í hreyfingalistum frá X ehf. Samkvæmt þessu og að virtum gögnum málsins þykir ekkert komið fram sem gefur tilefni til annars en að miða við þær fjárhæðir innheimts virðisaukaskatts sem sölureikningar gjaldanda bera með sér. Af hálfu gjaldanda hefur ekkert komið fram um tilefni til frádráttar innskatts. Verður því byggt á niðurstöðum rannsóknarskýrslu um þann þátt málsins.
Fullsannað þykir samkvæmt því sem að framan er rakið og að öðru leyti með stoð í gögnum málsins, m.a. framburði gjaldanda við skýrslutökur hjá skattrannsóknarstjóra ríkisins, að gjaldandi, sem skyldur var til þess að standa skil á virðisaukaskatti, sbr. 1. mgr. 15. gr. og 1. og 2. mgr. 24. gr. laga nr. 50/1988, hafi á saknæman hátt vanrækt að standa skil á virðisaukaskattsskýrslum öll uppgjörstímabil áranna 2005, 2006 og 2007 og þannig vanrækt að gera grein fyrir virðisaukaskatti til greiðslu samtals að fjárhæð 5.547.804 kr. umrædd uppgjörstímabil, sbr. sundurliðun í kröfubréfi skattrannsóknarstjóra ríkisins. Varðar þetta gjaldanda sekt samkvæmt 1. mgr. 40. gr. laga nr. 50/1988, um virðisaukaskatt, sbr. 3. gr. laga nr. 42/1995.
Ákvarða ber gjaldanda, A, sekt samkvæmt framangreindum ákvæðum 1. mgr. 40. gr. laga nr. 50/1988, sbr. 3. gr. laga nr. 42/1995, vegna vanrækslu á skilum virðisaukaskatts og virðisaukaskattsskýrslna sem að framan greinir. Samkvæmt breytingum á refsiákvæðum skattalaga, sem gerðar voru með lögum nr. 42/1995 og tóku gildi 9. mars 1995, skal sekt aldrei vera lægri en sem nemur tvöfaldri þeirri skattfjárhæð sem undan var dregin, þó að teknu tilliti til álags. Líta ber til þess að gjaldandi gekkst greiðlega við brotum sínum. Að þessu virtu og að teknu tilliti til álags samkvæmt 2. mgr. 27. gr. laga nr. 50/1988 þykir sekt gjaldanda hæfilega ákveðin 10.500.000 kr. til ríkissjóðs.
Úrskurðarorð:
Gjaldandi, A, greiði sekt að fjárhæð 10.500.000 kr. til ríkissjóðs.
