Úrskurður yfirskattanefndar nr. 7/2014
Úrskurður nr. 7/2014
ÚRSKURÐUR YFIRSKATTANEFNDAR
Ár 2014, miðvikudaginn 5. febrúar, er tekið fyrir mál nr. 144.1/2013; krafa skattrannsóknarstjóra ríkisins um að A, kt. [...], verði gerð sekt vegna meintra brota á skattalögum. Í málinu úrskurða Ólafur Ólafsson, Anna Dóra Helgadóttir og Sverrir Örn Björnsson. Upp er kveðinn svofelldur
ú r s k u r ð u r :
I
Með bréfi, dags. 26. mars 2013, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. [...], fyrir brot á lögum nr. 45/1987, um staðgreiðslu opinberra gjalda, og lögum nr. 50/1988, um virðisaukaskatts, beggja með áorðnum breytingum, framin vegna rekstraráranna 2010 og 2011.
Í bréfi skattrannsóknarstjóra ríkisins segir:
„B, sem stjórnarmanni, framkvæmdastjóra og prókúruhafa X ehf. (nú afskráð) og A, stjórnarmanni og prókúruhafa félagsins, er gefið að sök eftirfarandi:
1. Vangoldin afdregin staðgreiðsla opinberra gjalda launamanna.
A er gefið að sök að hafa vanrækt að standa innheimtumanni ríkissjóðs skil, fyrir hönd skattaðila, á afdreginni staðgreiðslu opinberra gjalda launamanna X ehf. (nú afskráð) vegna greiðslutímabilanna ágúst til og með desember rekstrarárið 2010 og janúar til og með mars rekstrarárið 2011. Þá er B gefið að sök að hafa vanrækt að standa innheimtumanni ríkissjóðs skil á afdreginni staðgreiðslu opinberra gjalda launamanna X ehf. (nú afskráð) vegna greiðslutímabilanna apríl til og með september og nóvember og desember rekstrarárið 2011. Vangoldin afdregin skilaskyld staðgreiðsla opinberra gjalda launamanna X ehf., vegna framangreindra greiðslutímabila, nemur samtals kr. 4.782.389. Fjárhæðin sundurliðast svo sem hér greinir:
| Rekstrarár | Greiðslutímabil | Vangoldin skilaskyld staðgreiðsla kr. |
| 2010 | ágúst | 124.995 |
| 2010 | september | 44.868 |
| 2010 | október | 88.511 |
| 2010 | nóvember | 233.074 |
| 2010 | desember | 167.855 |
| Samtals kr. | 659.303 | |
| 2011 | janúar | 124.987 |
| 2011 | febrúar | 122.475 |
| 2011 | mars | 216.385 |
| 2011 | apríl | 190.640 |
| 2011 | maí | 314.984 |
| 2011 | júní | 415.043 |
| 2011 | júlí | 619.776 |
| 2011 | ágúst | 635.871 |
| 2011 | september | 720.181 |
| 2011 | nóvember | 273.110 |
| 2011 | desember | 489.634 |
| Samtals kr. | 4.123.086 | |
| Samtals bæði árin | 4.782.389 |
Það er mat skattrannsóknarstjóra ríkisins, byggt á gögnum málsins, að þetta hafi B og A gert á saknæman hátt, að því er frekast verður séð af ásetningi eða í það minnsta af stórkostlegu hirðuleysi.
Telst þessi háttsemi B og A brjóta í bága við ákvæði 1. og 2. mgr. 20. gr., sbr. 1. og 2. mgr. 15. gr. og 1. mgr. 16. gr. laga nr. 45/1987, um staðgreiðslu opinberra gjalda, með áorðnum breytingum, sbr. aðalreglur 1.-3. gr., 1. tl. 5. gr., 1. mgr. 7. gr. og 1. og 3. mgr. 8. gr. þeirra laga.
Framangreind háttsemi varðar B og A sekt samkvæmt 2. mgr. 30. gr. laga nr. 45/1987, um staðgreiðslu opinberra gjalda, með áorðnum breytingum.
2. Vangoldinn innheimtur virðisaukaskattur.
Rannsókn skattrannsóknarstjóra ríkisins leiddi í ljós að A hefði, fyrir hönd X ehf., vanrækt að standa innheimtumanni ríkissjóðs skil á innheimtum virðisaukaskatti, vegna uppgjörstímabilsins janúar–febrúar 2011. Einnig leiddi rannsóknin í ljós að B hefði, fyrir hönd skattaðila, vanrækt að standa innheimtumanni ríkissjóðs skil á innheimtum virðisaukaskatti vegna uppgjörstímabilsins mars–apríl rekstrarárið 2011. Vangoldinn innheimtur virðisaukaskattur vegna framangreindra uppgjörstímabila nemur samtals kr. 1.710.902
| Rekstrarár | Uppgjörstímabil | Vangoldinn virðisaukaskattur til innheimtumanns ríkissjóðs kr. |
| 2011 | janúar - febrúar | 1.343.916 |
| 2011 | mars - apríl | 366.986 |
| Samtals kr. | 1.710.902 |
Það er mat skattrannsóknarstjóra ríkisins, byggt á gögnum málsins, að þetta hafi B og A gert á saknæman hátt, að því er frekast verður séð af ásetningi eða í það minnsta af stórkostlegu hirðuleysi.
Telst þessi háttsemi B og A brjóta í bága við ákvæði 1. mgr. 15. gr. og 1. og 2. mgr. 24. gr., sbr. aðalreglur 1. gr., 2. gr., 1. tl. 1. mgr. 3. gr., 1. mgr. 11. gr., 1. og 2. mgr. 13. gr., 1. mgr. 14. gr. og 19. gr. laga nr. 50/1988, um virðisaukaskatt, með áorðnum breytingum.
Framangreind háttsemi varðar B og A sekt samkvæmt 1. mgr. 40. gr. laga nr. 50/1988, um virðisaukaskatt, með áorðnum breytingum.
Þess er krafist að B og A verði með úrskurði yfirskattanefndar gert að sæta sekt í samræmi við framangreint.“
Af hálfu skattrannsóknarstjóra ríkisins er málavöxtum lýst í greinargerð, dags. 26. mars 2013, sem fylgdi kröfugerðinni.
II
Með bréfi yfirskattanefndar, dags. 5. apríl 2013, var gjaldanda, A, veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hann vildi ekki hlíta því að yfirskattanefnd afgreiddi mál hans og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 4. mgr. 31. gr. laga nr. 45/1987, um staðgreiðslu opinberra gjalda, og 4. mgr. 41. gr. laga nr. 50/1988, um virðisaukaskatt.
Með bréfi, dags. 18. maí 2013, hefur umboðsmaður gjaldanda lagt fram vörn í málinu. Bréf þetta var stílað á embætti skattrannsóknarstjóra ríkisins sem framsendi það til yfirskattanefndar hinn 27. maí 2013. Í bréfinu er vakin athygli á því að gjaldandi hafi greitt sem nemi 1/3 af höfuðstól staðgreiðslu- og virðisaukaskattsskuldar X ehf., sbr. meðfylgjandi greiðslukvittun frá embætti Tollstjóra. Með hliðsjón af því eigi sektarlágmark 1. mgr. 40. gr. laga nr. 50/1988 og 2. mgr. 30. gr. laga nr. 45/1987 ekki við í málinu. Hafi gjaldandi óskað sérstaklega eftir því við Tollstjóra að greiðslum yrði ráðstafað með þessum hætti og séu því óskiljanleg þau ummæli skattrannsóknarstjóra ríkisins í greinargerð sinni að gjaldandi hafi ekki óskað eftir því að greiðslur gengju inn á sérstök tímabil. Samkvæmt þessu beri við ákvörðun sektar að taka tillit til innborgana gjaldanda og sé rétt fjárhæð sektar vegna staðgreiðslu þannig 695.020 kr. og vegna virðisaukaskatts 895.944 kr. Í niðurlagi bréfsins er gerð krafa um greiðslu hæfilegs málskostnaðar úr ríkissjóði.
III
Með bréfi skattrannsóknarstjóra ríkisins, dags. 26. mars 2013, er þess krafist að gjaldanda, A, verði gerð sekt samkvæmt þargreindum ákvæðum 30. gr. laga nr. 45/1987, um staðgreiðslu opinberra gjalda, og 40. gr. laga nr. 50/1988, um virðisaukaskatt, með því að hann hafi sem fyrrum fyrirsvarsmaður X ehf., nú afskráð, vanrækt að standa skil á afdreginni staðgreiðslu opinberra gjalda launamanna félagsins greiðslutímabilin ágúst til og með desember 2010 og janúar, febrúar og mars 2011 og vanrækt skil á virðisaukaskatti félagsins uppgjörstímabilið janúar-febrúar 2011. Umboðsmaður gjaldanda hefur lagt fram athugasemdir í tilefni af sektarkröfu skattrannsóknarstjóra ríkisins.
Með sama bréfi hefur skattrannsóknarstjóri ríkisins krafist ákvörðunar sektar á hendur B vegna vanrækslu á skilum staðgreiðslu opinberra gjalda vegna launamanna X ehf. greiðslutímabilin apríl, maí, júní, júlí, ágúst, september, nóvember og desember 2011 og virðisaukaskatts uppgjörstímabilið mars-apríl 2011. Af hálfu skattrannsóknarstjóra ríkisins er í þessu sambandi gengið út frá því að hinn 4. maí 2011 hafi gjaldandi, A, hætt störfum hjá félaginu og B tekið að sér stjórn félagsins. Þar sem mál B varðar að öllu leyti önnur greiðslutímabil en mál gjaldanda, A, verður þessi þáttur sektarkröfunnar tekinn til úrlausnar sérstaklega með öðrum úrskurði yfirskattanefndar.
Skattrannsóknarstjóri ríkisins hóf hinn 21. maí 2012 rannsókn á skattskilum X ehf. er beindist að skilum félagsins á afdreginni staðgreiðslu opinberra gjalda vegna launamanna félagsins og virðisaukaskatti árin 2010, 2011 og 2012. Skráður tilgangur X ehf. á þessu tímabili var veitingarekstur hvers konar og skyld starfsemi. Samkvæmt gögnum málsins var bú X ehf. tekið til gjaldþrotaskipta hinn 15. febrúar 2012 og lauk skiptum 14. ágúst 2012. Var félagið afskráð 21. ágúst 2012. Vegna rannsóknarinnar tók skattrannsóknarstjóri ríkisins skýrslu af gjaldanda, A, hinn 29. maí 2012, en skýrsla var einnig tekin af B hinn 6. júní 2012. Með bréfum, dags. 15. júní 2012, sendi skattrannsóknarstjóri ríkisins gjaldanda og skiptastjóra þrotabús X ehf. skýrslu um rannsóknina sem þá lá fyrir, dags. 12. júní 2012, og gaf þeim kost á að tjá sig um efni hennar, en athugasemdir voru ekki gerðar af hálfu þessara aðila. Í framhaldi af þessu tók skattrannsóknarstjóri ríkisins saman nýja skýrslu um rannsóknina, dags. 3. júlí 2012, sem var efnislega samhljóða hinni fyrri að viðbættum kafla um lok rannsóknarinnar.
Í skýrslu skattrannsóknarstjóra ríkisins, dags. 3. júlí 2012, segir að rannsókn á skattskilum X ehf. hafi einkum verið byggð á upplýsingum sem fram hafi komið við fyrrgreindar skýrslutökur, staðgreiðsluskilagreinum X ehf. ásamt sundurliðunum, virðisaukaskattsskýrslum, upplýsingum frá fyrirtækjaskrá ríkisskattstjóra, svo og tekjubókhaldi ríkissjóðs, sbr. fylgiskjöl með skýrslunni, en þar er um að ræða yfirlit um greiðslur X ehf. vegna staðgreiðslu opinberra gjalda, virðisaukaskatts og opinberra gjalda.
Fram kemur í skýrslu skattrannsóknarstjóra ríkisins að rannsókn embættisins á staðgreiðsluskilum X ehf. hafi falist í því að bera fjárhæðir afdreginnar staðgreiðslu samkvæmt staðgreiðsluskilagreinum og sundurliðunum félagsins saman við greiðslur þess til innheimtumanns ríkissjóðs. Í skýrslunni er gerð grein fyrir þeirri niðurstöðu rannsóknarinnar að fyrrum fyrirsvarsmenn X ehf. hafi ekki staðið skil innan lögboðins frests á afdreginni staðgreiðslu opinberra gjalda vegna launamanna félagsins greiðslutímabilin ágúst, september, október, nóvember og desember 2010 og janúar, febrúar, mars, apríl, maí, júní, júlí, ágúst, september, nóvember og desember 2011, samtals að fjárhæð 5.660.632 kr. Fram kemur að greiddar hafi verið 93.040 kr. inn á höfuðstól staðgreiðsluskuldar vegna þeirra tímabila sem rannsóknin tekur til. Tekið er fram í skýrslunni að svo virðist sem ekki hafi verið á valdi fyrrum fyrirsvarsmanns félagsins að standa skil á afdreginni staðgreiðslu opinberra gjalda fyrir tímabilin október 2011 og janúar 2012 vegna töku bús félagsins til gjaldþrotaskipta með úrskurði héraðsdóms 15. febrúar 2012, sbr. áður úrskurð 19. október 2011 sem hafi verið endurupptekinn og réttaráhrif hans felld niður með úrskurði 8. desember 2011.
Rannsókn á virðisaukaskattsskilum X ehf. var samkvæmt skýrslu skattrannsóknarstjóra ríkisins fólgin í því að bera fjárhæð innheimts virðisaukaskatts samkvæmt virðisaukaskattsskýrslum saman við greiðslur félagsins til innheimtumanns og er rakin sú niðurstaða rannsóknarinnar að fyrrum fyrirsvarsmenn félagsins hafi ekki staðið skil á virðisaukaskatti vegna félagsins innan lögboðins frests uppgjörstímabilin janúar-febrúar og mars-apríl 2011 að fjárhæð samtals 1.710.902 kr.
Gjaldandi, A, greindi frá því við skýrslutöku, sem fram fór hjá skattrannsóknarstjóra ríkisins 29. maí 2012, að hann hefði verið rekstrarstjóri X ehf. hluta þess tímabils sem rannsóknin varðaði og hefði hann séð um daglegan rekstur og fjármál félagsins fram til 4. maí 2011. Þá hefði B tekið við rekstrinum og gjaldandi hætt afskiptum af félaginu. Við skýrslutökuna voru bornar undir gjaldanda fyrirliggjandi staðgreiðsluskilagreinar og virðisaukaskattsskýrslur X ehf. vegna þeirra greiðslu- og uppgjörstímabila sem rannsóknin tók til. Gjaldandi kvaðst ekki hafa séð þessar skýrslur, en sagði félaga sinn hafa annast gerð skilagreinanna. Kvaðst gjaldandi ekki kannast við gögn á fylgiskjölum 4.10-4.18 með skýrslu skattrannsóknarstjóra ríkisins, enda hefði hann þá verið farinn úr stjórn félagsins. Sagði gjaldandi tilgreindan sérkunnáttumann hafa annast gerð virðisaukaskattsskýrslnanna. Taldi gjaldandi að gögnin gæfu rétta mynd af rekstri félagsins. Gjaldanda var kynnt að samkvæmt gögnum málsins hefði staðgreiðsla opinberra gjalda að fjárhæð 5.660.632 kr. vegna launamanna X ehf. tiltekin greiðslutímabil árin 2010 og 2011 ekki verið greidd á lögmæltum tíma og að virðisaukaskattur að fjárhæð 1.710.902 kr. tiltekin uppgjörstímabil árið 2011 hefði ekki verið greiddur á lögmæltum tíma, en gjaldandi vildi ekki tjá sig um þessar fjárhæðir. Fram kom af hálfu gjaldanda að sökum rekstrarerfiðleika hefði afdreginni staðgreiðslu og innheimtum virðisaukaskatti ekki verið skilað á lögmæltum tíma. Sagði gjaldandi að engin sérstök ákvörðun hefði verið tekin um að skila ekki afdreginni staðgreiðslu til ríkissjóðs en hann hefði sjálfur tekið ákvörðun um að skila ekki innheimtum virðisaukaskatti til ríkissjóðs. Af hálfu gjaldanda kom fram að starfsmenn X ehf. hefðu fengið laun sín greidd að fullu á meðan hann hefði verið við stjórnvölinn. Gjaldandi kvaðst ekki hafa óskað eftir því við innheimtumann að greiðslum X ehf. yrði ráðstafað með sérstökum hætti. Tók gjaldandi fram að þegar hann hætti afskiptum af rekstrinum hefði hann talið að B myndi ganga frá skuldunum, en ekki hefði verið gerður neinn samningur um það. Sagðist gjaldandi vita að maður ætti ekki að láta svona skuldir frá sér, maður ætti að klára þær sjálfur.
Við skýrslutöku af B, sem fram fór hjá skattrannsóknarstjóra ríkisins hinn 6. júní 2012, kom fram að B hefði yfirtekið rekstur X. ehf. hinn 4. maí 2011 og setið í stjórn félagsins frá þeim tíma. Hefði hann verið daglegur stjórnandi félagsins frá þeim tíma og séð um fjármál þess. B kvaðst kannast við staðgreiðsluskilagreinar og virðisaukaskattsskýrslur X ehf., sem bornar voru undir hann við skýrslutökuna, og sagði tilgreinda bókhaldsþjónustu hafa annast gerð þeirra. B var kynnt að samkvæmt gögnum málsins hefði staðgreiðsla opinberra gjalda að fjárhæð 5.660.632 kr. vegna launamanna X ehf. tiltekin greiðslutímabil árin 2010 og 2011 ekki verið greidd á lögmæltum tíma og að virðisaukaskattur að fjárhæð 1.710.902 kr. tiltekin uppgjörstímabil árið 2011 hefði ekki verið greiddur á lögmæltum tíma, en B vildi ekki tjá sig um þessar fjárhæðir. Sagði hann að sökum rekstrarerfiðleika hefði afdreginni staðgreiðslu og innheimtum virðisaukaskatti ekki verið skilað á lögmæltum tíma og að hann hefði tekið ákvörðun um að skila ekki afdreginni staðgreiðslu og innheimtum virðisaukaskatti til ríkissjóðs. Sagði B laun hafa verið greidd að fullu þrátt fyrir að staðgreiðslu hefði ekki verið skilað en ekki hefði verið óskað eftir því við innheimtumann að greiðslum X ehf. yrði ráðstafað með sérstökum hætti.
Samkvæmt 1. mgr. 40. gr. laga nr. 50/1988, um virðisaukaskatt, sbr. 3. gr. laga nr. 42/1995, er refsivert ef skattskyldur maður afhendir eigi á lögmæltum tíma virðisaukaskattsskýrslu eða virðisaukaskatt sem hann hefur innheimt eða honum borið að innheimta. Í 2. mgr. 30. gr. laga nr. 45/1987, um staðgreiðslu opinberra gjalda, sbr. 2. gr. laga nr. 42/1995, er með samsvarandi hætti lýst refsivert ef launagreiðandi innir ekki af hendi þær greiðslur vegna launamanna sem hann hefur haldið eftir eða honum borið að halda eftir. Samkvæmt fortakslausum ákvæðum nefndra laga og með stoð í dómaframkvæmd Hæstaréttar Íslands, sbr. m.a. dóma Hæstaréttar 27. febrúar 1997 (H 1997:789), 25. september 1997 (H 1997:2446), 14. janúar 1999 (H 1999:79), 18. febrúar 1999 (H 1999:544 og 550), 10. júní 1999 (H 1999:2645) og 30. mars 2000 (H 2000:1422), geta fyrirsvarsmenn lögaðila unnið til refsingar með því einu að láta ógert að skila umræddum gjöldum í ríkissjóð á tilskildum tíma, enda sé huglægum refsiskilyrðum fullnægt.
Samkvæmt upplýsingum úr fyrirtækjaskrá ríkisskattstjóra (hlutafélagaskrá), sbr. fskj. nr. 3.1 - 3.10 með skýrslu skattrannsóknarstjóra ríkisins, var gjaldandi, A, stjórnarmaður X ehf. frá 16. október 2009 til 4 maí 2011, ásamt því að hafa prókúruumboð fyrir félagið, og er komið fram, m.a. samkvæmt framburði gjaldanda hjá skattrannsóknarstjóra ríkisins, að gjaldandi sá um daglegan rekstur og fjármál félagsins á því tímabili. Samkvæmt framangreindu telst gjaldandi hafa borið ábyrgð á skilum staðgreiðslu opinberra gjalda og virðisaukaskatti X ehf. fram til 4. maí 2011 og er sektarkröfu skattrannsóknarstjóra ríkisins því réttilega beint að gjaldanda vegna meintra brota á skattalögum fyrir það tímamark.
Til grundvallar niðurstöðu skattrannsóknarstjóra ríkisins um fjárhæð vangreiddrar staðgreiðslu opinberra gjalda og virðisaukaskatts X ehf. árin 2010 og 2011, liggja staðgreiðsluskilagreinar og virðisaukaskattsskýrslur sem ekki hefur verið vefengt að varði rekstur einkahlutafélagsins, sbr. skýrslutöku af gjaldanda 29. maí 2012, þar sem einnig kom fram það álit gjaldanda að gögnin gæfu rétta mynd af rekstrinum. Verður samkvæmt þessu byggt á því að staðgreiðsla opinberra gjalda greiðslutímabilin ágúst til og með desember 2010 og janúar, febrúar og mars 2011 svo og virðisaukaskattur uppgjörstímabilið janúar-febrúar 2011, sem gjaldanda bar að standa skil á vegna X ehf., hafi numið þeim fjárhæðum sem greinir í skýrslu skattrannsóknarstjóra ríkisins, þ.e. staðgreiðsla samtals 1.123.150 kr. og virðisaukaskattur 1.343.916 kr., enda þykir ekkert hafa komið fram sem gefur tilefni til annars.
Í skýrslu skattrannsóknarstjóra ríkisins og greinargerð með kröfugerð embættisins til yfirskattanefndar er gerð grein fyrir greiðslum X ehf. til innheimtumanns vegna staðgreiðslu, virðisaukaskatts og opinberra gjalda frá því að skuldir sem um ræðir í máli þessu vegna skilaskyldrar staðgreiðslu og virðisaukaskatts byrjuðu að myndast 15. september 2010. Fram kemur að á tímabilinu 15. september 2010 til og með 18. mars 2013 voru alls greiddar 1.115.560 kr. vegna höfuðstóls skilaskyldrar staðgreiðslu félagsins og var þar að öllu leyti um að ræða greiðslur vegna greiðslutímabila sem mál þetta varðar. Þá voru á sama tímabili greiddar 2.356.916 kr. vegna höfuðstóls virðisaukaskatts X ehf. og þar af 1.343.916 kr. vegna uppgjörstímabils þess sem mál þetta varðar. Greiðslur X ehf. vegna álags, dráttarvaxta og kostnaðar voru á sama tíma 7.500 kr. vegna staðgreiðslu og 8.984 kr. vegna virðisaukaskatts. Samkvæmt þessu höfðu að fullu verið staðin skil á höfuðstól staðgreiðslu opinberra gjalda og virðisaukaskatts X ehf., sem talinn er vangoldinn samkvæmt kröfugerð skattrannsóknarstjóra ríkisins, hvað gjaldanda varðar, áður en mál hans var sent yfirskattanefnd til meðferðar. Ekki verður þó talið að um fullnaðarskil hafi verið að ræða, enda verður ekki séð að innborganir hafi tekið til þáttar álags og dráttarvaxta vegna hinna síðbúnu skila, og er því heldur ekki haldið fram í bréfi umboðsmanns gjaldanda, dags. 18. maí 2013.
Samkvæmt framansögðu og í samræmi við dómaframkvæmd Hæstaréttar Íslands, sbr. dóma frá 30. mars 2006 í málunum nr. 428/2005 og 469/2005, verður talið að sú undantekning frá fésektarlágmarki, sem mælt er fyrir um í lögum nr. 134/2005, taki að öllu leyti til vanskila á staðgreiðslu opinberra gjalda og virðisaukaskatti sem í máli þessu greinir. Samkvæmt framansögðu og að teknu tilliti til álags samkvæmt 1. tölul. 2. mgr. 28. gr. laga nr. 45/1987 og 2. mgr. 27. gr. laga nr. 50/1988 þykir sekt gjaldanda hæfilega ákveðin 200.000 kr. til ríkissjóðs.
Gjaldandi hefur gert kröfu um að sér verði úrskurðaður málskostnaður úr ríkissjóði samkvæmt 2. mgr. 8. gr. laga nr. 30/1992, sbr. 4. gr. laga nr. 96/1998, um breyting á þeim lögum. Samkvæmt úrslitum máls þessa þykja ekki vera til staðar lagaskilyrði til þess að ákvarða gjaldanda málskostnað. Kröfu þess efnis er því hafnað.
Ú r s k u r ð a r o r ð :
Gjaldandi, A, greiði sekt að fjárhæð 200.000 kr. til ríkissjóðs. Málskostnaðarkröfu gjaldanda er hafnað.
