Úrskurður yfirskattanefndar nr. 123/2016
Úrskurður nr. 123/2016
ÚRSKURÐUR YFIRSKATTANEFNDAR
Ár 2016, miðvikudaginn 8. júní, er tekið fyrir mál nr. 70/2016; krafa skattrannsóknarstjóra ríkisins um að A, kt. [...], verði gerð sekt vegna meintra brota á skattalögum. Í málinu úrskurða Ólafur Ólafsson, Þórarinn Egill Þórarinsson og Bjarnveig Eiríksdóttir. Upp er kveðinn svofelldur
ú r s k u r ð u r :
I.
Með bréfi, dags. 14. mars 2016, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. [...], fyrir brot á lögum nr. 45/1987, um staðgreiðslu opinberra gjalda, og lögum nr. 50/1988, um virðisaukaskatt, beggja með áorðnum breytingum, framin vegna rekstraráranna 2013 og 2014.
Með bréfi yfirskattanefndar, dags. 14. mars 2016, var gjaldanda veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hann vildi ekki hlíta því að yfirskattanefnd afgreiddi mál hans og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 4. mgr. 31. gr. laga nr. 45/1987, um staðgreiðslu opinberra gjalda, og 4. mgr. 41. gr. laga nr. 50/1988, um virðisaukaskatt.
Með tölvupósti, dags. 4. maí 2016, tilkynnti umboðsmaður gjaldanda að gjaldandi hlíti því ekki að yfirskattanefnd taki mál hans til umfjöllunar eða afgreiðslu.
II.
Af hálfu gjaldanda, A, hefur því verið lýst yfir að hann vilji ekki hlíta því að yfirskattanefnd afgreiði mál hans. Vegna þessarar afstöðu gjaldanda eru ekki skilyrði til þess að fjalla um málið fyrir yfirskattanefnd og er málinu því vísað frá og það endursent skattrannsóknarstjóra ríkisins.
Úrskurðarorð:
Máli þessu er vísað frá yfirskattanefnd og það sent skattrannsóknarstjóra ríkisins.
