Úrskurður yfirskattanefndar nr. 120/2018

5.9.2018

ÚRSKURÐUR YFIRSKATTANEFNDAR

Ár 2018, miðvikudaginn 5. september, er tekið fyrir mál nr. 69/2018; krafa skattrannsóknarstjóra ríkisins um að A, kt. […], verði gerð sekt vegna meintra brota á skattalögum. Í málinu úrskurða Ólafur Ólafsson, Þórarinn Egill Þórarinsson og Bjarnveig Eiríksdóttir. Upp er kveðinn svofelldur

ú r s k u r ð u r :

I.

Með bréfi, dags. 26. apríl 2018, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. […], fyrir brot á lögum nr. 50/1988, um virðisaukaskatt, með áorðnum breytingum, framin vegna rekstraráranna 2013 til og með 2016.

Í bréfi skattrannsóknarstjóra ríkisins segir:

„A er gefið að sök eftirfarandi:

Skil á efnislega röngum virðisaukaskattsskýrslum. Vanframtalin skattskyld velta og útskattur.

A er gefið að sök, að því er best verður séð af ásetningi, en í það minnsta af stórkostlegu hirðuleysi, að hafa staðið skattyfirvöldum skil á efnislega röngum virðisaukaskattsskýrslum vegna allra uppgjörstímabila rekstraráranna 2013, 2014 og 2015 og janúar-febrúar til og með september-október rekstrarárið 2016 og vanframtelja með því skattskylda veltu og virðisaukaskatt. Samkvæmt rannsókn skattrannsóknarstjóra ríkisins nemur vanframtalin skattskyld velta samtals kr. 20.305.810 og vanframtalinn útskattur samtals kr. 5.032.857

Sundurliðast vanframtalin skattskyld velta og virðisaukaskattur svo sem hér greinir:

Sú háttsemi A sem hér hefur verið lýst brýtur í bága við ákvæði 1. mgr. 15. gr. og 1. mgr. 24. gr. sbr. aðalreglur 1. gr., 2. gr., 1. tl. 1. mgr. 3. gr., 1. mgr. 11. gr., 1. mgr. 13. gr., 1. mgr. 14. gr. og 19. gr. laga nr. 50/1988, um virðisaukaskatt, með áorðnum breytingum.

Varðar framanlýst háttsemi A sekt samkvæmt 1. mgr. 40. gr. laga nr. 50/1988, um virðisaukaskatt, með áorðnum breytingum.

Þess er krafist að A verði með úrskurði yfirskattanefndar gert að sæta sekt í samræmi við framangreint.“

Af hálfu skattrannsóknarstjóra ríkisins er málavöxtum lýst í greinargerð, dags. 26. apríl 2018, sem fylgdi kröfugerðinni.

II.

Með bréfi yfirskattanefndar, dags. 2. maí 2018, var gjaldanda veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hún vildi ekki hlíta því að yfirskattanefnd afgreiddi mál hennar og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 4. mgr. 41. gr. laga nr. 50/1988, um virðisaukaskatt. Engar athugasemdir hafa borist frá gjaldanda.

III.

1. Með bréfi skattrannsóknarstjóra ríkisins, dags. 26. apríl 2018, er gerð sú krafa að gjaldanda, A, verði gerð sekt samkvæmt þargreindum ákvæðum 40. gr. laga nr. 50/1988, um virðisaukaskatt. Gjaldandi hefur átt þess kost að koma að vörnum fyrir yfirskattanefnd í tilefni af sektarkröfu skattrannsóknarstjóra ríkisins, en engar athugasemdir hafa borist. Þar sem gjaldandi hefur ekki gert athugasemdir við meðferð máls þessa fyrir yfirskattanefnd verður að líta svo á að hún mæli því ekki í gegn að það sæti sektarmeðferð fyrir nefndinni.

2. Sektarkrafa skattrannsóknarstjóra ríkisins í máli þessu er byggð á niðurstöðum rannsóknar embættisins á bókhaldi og skattskilum gjaldanda vegna rekstraráranna 2013 til og með 2016, sbr. skýrslu um rannsóknina, dags. 5. desember 2017, þar sem fram kom að á rannsóknartímabilinu hefði gjaldandi starfað við ræstingar og við verslunarstörf. Rannsókn skattrannsóknarstjóra ríkisins hófst formlega hinn 22. september 2017 og beindist að virðisaukaskattsskilum gjaldanda. Var rannsóknin einkum byggð á upplýsingum sem fram komu við skýrslutöku af gjaldanda 2. nóvember 2017, sölureikningum gjaldanda, bankareikningi gjaldanda og upplýsingum úr upplýsingakerfum ríkisskattstjóra. Með bréfi, dags. 10. nóvember 2017, sendi skattrannsóknarstjóri gjaldanda skýrslu um rannsóknina sem þá lá fyrir, dags. sama dag, og gaf henni kost á að tjá sig um efni hennar. Engar athugasemdir voru gerðar af hálfu gjaldanda. Í framhaldi af þessu tók skattrannsóknarstjóri ríkisins saman nýja skýrslu um rannsóknina, dags. 5. desember 2017, sem var efnislega samhljóða hinni fyrri að viðbættum kafla um lok rannsóknarinnar.

Í skýrslu skattrannsóknarstjóra ríkisins, dags. 5. desember 2017, voru helstu niðurstöður rannsóknarinnar dregnar saman með svofelldum hætti:

„Niðurstöður rannsóknar á bókhaldi og virðisaukaskattsskilum skattaðila vegna rekstraráranna 2013, 2014 og 2015 eru:

·    Staðin voru skil á virðisaukaskattsskýrslum.

·    Virðisaukaskattsskýrslum var ekki skilað af skattaðila, að hans sögn.

·    Bókhald var ekki fært eða listað upp.

·    Sölureikningar liggja fyrir.

·    Skattskyld velta er vanframtalin.

·    Útskattur er vanframtalinn.

·    Engin gjaldagögn eru fyrirliggjandi.“

Þá gerði skattrannsóknarstjóri ríkisins tölulega grein fyrir niðurstöðum rannsóknarinnar í töflu í niðurlagi skýrslu sinnar. Þar kom fram að skattskyld velta gjaldanda væri vantalin um 5.010.810 kr. rekstrarárið 2013, 5.620.000 kr. rekstrarárið 2014, 5.266.000 kr. rekstrarárið 2015 og 4.409.000 kr. rekstrarárið 2016. Þá væri útskattur vantalinn um samtals 5.032.857 kr. greind ár.

Af hálfu skattrannsóknarstjóra ríkisins var mál gjaldanda sent ríkisskattstjóra til meðferðar, sbr. 2. mgr. 39. gr. laga nr. 50/1988, um virðisaukaskatt, sbr. bréf skattrannsóknarstjóra ríkisins, dags. 26. apríl 2018. Í greinargerð skattrannsóknarstjóra ríkisins, dags. 26. apríl 2018, kemur fram að endurákvörðunarþætti málsins sé ólokið.

3. Fram kemur í skýrslu skattrannsóknarstjóra ríkisins, dags. 5. desember 2017, að gjaldandi hafi verið skráð í grunnskrá virðisaukaskatts á rannsóknartímabilinu og hafi skilamáti verið tveggja mánaða skil. Á rannsóknartímabilinu hafi verið staðin skil á núllskýrslum fyrir uppgjörstímabilin nóvember-desember 2013, nóvember-desember 2014, nóvember-desember 2015, júlí-ágúst 2016 og september-október 2016. Við skýrslutöku af gjaldanda 2. nóvember 2017 sagði gjaldandi að hún hefði aldrei skilað virðisaukaskattsskýrslum eða skattframtölum og sagðist ekki vita hver hefði staðið skil á skýrslunum fyrir hennar hönd. Er tekið fram í skýrslunni að skilja megi framburð gjaldanda þannig að hún hafi ekki komið því í verk að halda utan um bókhald og koma skattskilum sínum í rétt horf. Er í þessu sambandi rakinn sá framburður gjaldanda að hún hafi glímt við þunglyndi um langt skeið. Hafi gjaldandi ekki opnað bréfpóst á tímabilinu heldur komið honum fyrir í skáp og síðan hent honum. Kemur fram í skýrslunni að ríkisskattstjóri hafi hafnað innsendum virðisaukaskattsskýrslum gjaldanda og áætlað skattskylda veltu og útskatt. Hafi áætlaðar fjárhæðir verið settar á síðustu uppgjörstímabil hvers árs en ekki yrði annað ráðið af því og orðalagi í tilkynningu ríkisskattstjóra til skattrannsóknarstjóra ríkisins en að litið hafi verið á innsendar virðisaukaskattsskýrslur sem ársskil.

Í skýrslu skattrannsóknarstjóra ríkisins er gerð grein fyrir rannsókn á skattskyldri veltu og útskatti gjaldanda. Við skýrslutöku 2. nóvember 2017 voru útgefnir sölureikningar gjaldanda rekstrarárin 2013, 2014, 2015 og 2016 lagðir fyrir hana og staðfesti gjaldandi að hún hefði gefið þá út. Sagði gjaldandi að hún teldi að hún hefði fengið þá greidda alla að fullu. Samkvæmt þessu hafi vanframtalin skattskyld velta gjaldanda numið 5.010.810 kr. rekstrarárið 2013 (útskattur 1.277.757 kr.), 5.620.000 kr. rekstrarárið 2014 (útskattur 1.433.100 kr.), 5.266.000 kr. rekstrarárið 2015 (útskattur 1.263.840 kr.) og 4.409.000 kr. rekstrarárið 2016 (útskattur 1.058.160 kr.). Við skýrslutökuna kvaðst gjaldandi aðspurð hafa ráðstafað innheimtum virðisaukaskatti í daglegan rekstur.

Í kafla um rannsókn á innskatti gjaldanda kemur fram að engin gögn séu fyrirliggjandi um rekstrargjöld gjaldanda eða mögulegan innskatt. Við skýrslutöku hafi gjaldandi sagt að hún ætti ekki nein gögn vegna kostnaðar.

4. Gjaldandi hefur sem fyrr segir ekki gert athugasemdir í tilefni af sektarkröfu skattrannsóknarstjóra ríkisins og við skýrslutöku, sem fram fór hjá skattrannsóknarstjóra vegna rannsóknar málsins, kom fram viðurkenning gjaldanda á því að hún hefði ekki staðið skil á innheimtum virðisaukaskatti árin 2013, 2014, 2015 og 2016. Í máli því, sem hér er til meðferðar, er um að tefla kröfugerð um ákvörðun sektar á hendur gjaldanda samkvæmt þar tilgreindum ákvæðum 40. gr. laga nr. 50/1988, um virðisaukaskatt, sem gera ráð fyrir því að sektarákvörðun sé bundin þeirri skattfjárhæð sem undan var dregin. Verður því að taka afstöðu til þess hvort skattrannsóknarstjóri ríkisins hafi með skattrannsókn sinni sýnt fram á hverju skattfjárhæð, sem undan var dregin, hafi að minnsta kosti numið. Allan vafa í því sambandi verður að meta gjaldanda í hag, sbr. grundvallarreglu 108. gr. laga nr. 88/2008, um meðferð sakamála.

Eins og rakið er að framan eru tölulegar niðurstöður samkvæmt rannsókn skattrannsóknarstjóra ríkisins á skattskilum gjaldanda vegna áranna 2013, 2014, 2015 og 2016 byggðar á útgefnum sölureikningum gjaldanda. Á þessum grundvelli er í skýrslu skattrannsóknarstjóra ríkisins gerð grein fyrir meintri vantalinni skattskyldri veltu að fjárhæð 5.010.810 kr. rekstrarárið 2013, 5.620.000 kr. rekstrarárið 2014, 5.266.000 kr. rekstrarárið 2015 og 4.409.000 kr. rekstrarárið 2016, eða samtals 20.305.810 kr. Af hálfu gjaldanda, A, hefur ekki verið vefengt að tekjur hennar hafi numið þeim fjárhæðum sem sölureikningar þessir bera með sér, sbr. framburð gjaldanda við skýrslutöku hjá skattrannsóknarstjóra ríkisins 2. nóvember 2017. Samkvæmt þessu og að virtum gögnum málsins þykir ekkert komið fram sem gefur tilefni til annars en að miða við þær fjárhæðir innheimts virðisaukaskatts sem gögn málsins bera með sér.

Af hálfu gjaldanda hefur ekkert komið fram um tilefni til frádráttar innskatts. Verður því byggt á niðurstöðum rannsóknarskýrslu um þann þátt málsins.

Svo sem fram er komið stóð gjaldandi skil á núllskýrslum fyrir uppgjörstímabilin nóvember-desember 2013, nóvember-desember 2014, nóvember-desember 2015, júlí-ágúst 2016 og september-október 2016, en svo virðist sem litið hafi verið á innsendar virðisaukaskattsskýrslur sem ársskil þrátt fyrir skráningu gjaldanda í grunnskrá virðisaukaskatts með skilamáta tveggja mánaða skil. Með rannsókn skattrannsóknarstjóra ríkisins telst hafa verið leitt í ljós að innsendar virðisaukaskattsskýrslur gjaldanda vegna rekstraráranna 2013, 2014, 2015 og 2016 hafi verið rangar og að ekki voru gerð skil á virðisaukaskatti gjaldanda í samræmi við ákvæði 1. mgr. 15. gr. og 1. og 2. mgr. 24. gr. laga nr. 50/1988. Með stoð í gögnum málsins, m.a. framburði gjaldanda við skýrslutökur hjá skattrannsóknarstjóra ríkisins, þykir því fullsannað að gjaldandi hafi með saknæmum hætti vanrækt greinda skyldu sína. Af þessum sökum ber að ákvarða gjaldanda sekt samkvæmt 1. mgr. 40. gr. laga nr. 50/1988, sbr. 3. gr. laga nr. 42/1995.

Samkvæmt breytingum á refsiákvæðum skattalaga, sem gerðar voru með lögum nr. 42/1995 og tóku gildi 9. mars 1995, skal sekt aldrei vera lægri en sem nemur tvöfaldri þeirri skattfjárhæð sem undan var dregin, þó að teknu tilliti til álags. Að þessu gættu, málsatvikum að öðru leyti og að teknu tilliti til álags samkvæmt 2. mgr. 27. gr. laga nr. 50/1988 þykir sekt gjaldanda hæfilega ákveðin 9.600.000 kr. til ríkissjóðs.

Ú r s k u r ð a r o r ð :

Gjaldandi, A, greiði sekt að fjárhæð 9.600.000 kr. til ríkissjóðs.