Úrskurður yfirskattanefndar nr. 263/2009
Úrskurður nr. 263/2009
ÚRSKURÐUR YFIRSKATTANEFNDAR
Ár 2009, miðvikudaginn 4. nóvember, er tekið fyrir mál nr. 174/2008; krafa skattrannsóknarstjóra ríkisins um að A, kt. [...], verði gerð sekt vegna meintra brota á skattalögum. Í málinu úrskurða Ólafur Ólafsson, Sverrir Örn Björnsson og Kristinn Gestsson. Upp er kveðinn svofelldur
ú r s k u r ð u r :
I.
Með bréfi, dags. 26. júní 2008, hefur skattrannsóknarstjóri ríkisins krafist þess að yfirskattanefnd taki til sektarmeðferðar mál A, kt. [...], fyrir brot á lögum nr. 90/2003, um tekjuskatt, lögum nr. 4/1995, um tekjustofna sveitarfélaga, og lögum nr. 50/1988, um virðisaukaskatt, öll með áorðnum breytingum, framin vegna rekstraráranna 2004 og 2005.
Í bréfi skattrannsóknarstjóra ríkisins segir:
„A er gefið að sök eftirfarandi:
1. Vanræksla á skilum skattframtala. Vanframtaldar rekstrartekjur.
A er gefið að sök að hafa, að því er best verður séð af ásetningi, en í það minnsta af stórkostlegu hirðuleysi, vanrækt að standa skattstjóranum í Reykjavík skil á skattframtölum og fylgigögnum þeirra vegna álagningar opinberra gjalda, gjaldárin 2005 og 2006, vegna rekstraráranna 2004 og 2005. Með því vanrækti hann að gera grein fyrir rekstrartekjum sínum að fjárhæð kr. 2.219.559 vegna rekstrarársins 2004 og kr. 2.614.455 vegna rekstrarársins 2005, sem til eru komnar vegna starfa A sem járnabindingamaður. Skattstjórinn í Reykjavík áætlaði tekjuskatts- og útsvarsstofn A vegna rekstrarársins 2004 kr. 3.300.000, auk álags kr. 495.000 og vegna rekstrarársins 2005 kr. 3.800.000, auk álags kr. 570.000.
Háttsemi A leiddi ekki til ákvörðunar lægri tekjuskatts- og útsvarsstofns hans en vera bar vegna rekstraráranna 2004 og 2005, að teknu tilliti til áætlunar skattstjóra.
Sú háttsemi A sem lýst hefur verið hér að framan brýtur í bága við ákvæði 90. gr., sbr. B lið 7. gr. laga nr. 90/2003, um tekjuskatt, sbr. 22. gr. og 19. gr. og 1. mgr. 21. gr. laga nr. 4/1995, um tekjustofna sveitarfélaga.
Varðar framanlýst háttsemi A sekt samkvæmt 6. mgr. 109. gr. laga nr. 90/2003, um tekjuskatt, sbr. og 2. mgr. 22. gr. laga nr. 4/1995, um tekjustofna sveitarfélaga.
2. Skil á efnislega röngum virðisaukaskattsskýrslum. Vanræksla á skilum á virðisaukaskattsskýrslum. Vanframtalin skattskyld velta og útskattur. Offramtalinn innskattur.
A er gefið að sök, að því er best verður séð af ásetningi, en í það minnsta af stórkostlegu hirðuleysi, að hafa staðið skil á efnislega röngum virðisaukaskattsskýrslum vegna virðisaukaskattsskyldrar starfsemi sinnar til skattstjórans í Reykjavík vegna uppgjörstímabilanna janúar–febrúar til og með júlí–ágúst rekstrarárið 2004 og að hafa vanrækt að standa skil á virðisaukaskattsskýrslum vegna uppgjörstímabilanna september–október og nóvember–desember rekstrarárið 2004 og allra uppgjörstímabila rekstrarársins 2005. Með því offramtaldi A skattskylda veltu og útskatt vegna starfsemi sinnar uppgjörstímabilin janúar–febrúar, mars–apríl, maí–júní og júlí–ágúst rekstrarárið 2004 og vanframtaldi skattskylda veltu og útskatt vegna uppgjörstímabilanna september–október og nóvember–desember rekstrarárið 2004 og janúar–febrúar til og með nóvember–desember rekstrarárið 2005 og offramtaldi innskatt vegna starfa sinna við járnabindingar. Samkvæmt niðurstöðu skattrannsóknarstjóra ríkisins nemur vanframtalin skattskyld velta samtals kr. 2.999.779 og vanframtalinn útskattur samtals kr. 734.944.
Sundurliðast vantalin skattskyld velta og virðisaukaskattur svo sem hér greinir:
|
Rekstrarár |
Uppgjörstímabil |
Vanframtalin skattskyld velta | Vanframtalinn útskattur |
| 2004 | janúar – febrúar | -167.173 | -40.957 |
| 2004 | mars – apríl | -73.013 | -17.889 |
| 2004 | maí – júní | -150.300 | -36.824 |
| 2004 | júlí - ágúst | -152.659 | -37.402 |
| 2004 | sept. – okt. | 457.831 | 112.169 |
| 2004 | nóv. – des. | 470.638 | 115.306 |
| Samtals kr. | 385.324 | 94.403 | |
| 2005 | janúar – febrúar | 238.671 | 58.474 |
| 2005 | mars - apríl | 297.217 | 72.818 |
| 2005 | maí – júní | 400.239 | 98.059 |
| 2005 | júlí – ágúst | 487.722 | 119.492 |
| 2005 | sept. – okt. | 635.606 | 155.723 |
| 2005 | nóv. – des. | 555.000 | 135.975 |
| Samtals kr. | 2.614.455 | 640.541 | |
| Samtals bæði árin kr. | 2.999.779 | 734.944 |
Sú háttsemi A sem hér hefur verið lýst brýtur í bága við ákvæði 1. mgr. 15. gr. og 1. mgr. 24. gr. sbr. aðalreglur 1. gr., 2. gr., 1. tl. 1. mgr. 3. gr., 1. mgr. 11. gr., 1. mgr. 13. gr., 1. mgr. 14. gr. og 19. gr. laga nr. 50/1988, um virðisaukaskatt, með áorðnum breytingum.
Varðar framanlýst háttsemi A sekt samkvæmt 1. mgr. 40. gr. laga nr. 50/1988, um virðisaukaskatt, með áorðnum breytingum.
Þess er krafist að A verði með úrskurði yfirskattanefndar gert að sæta sekt í samræmi við framangreint.“
Af hálfu skattrannsóknarstjóra ríkisins er málavöxtum lýst í greinargerð, dags. 26. júní 2008, sem fylgdi kröfugerðinni.
II.
Með bréfi yfirskattanefndar, dags. 2. júlí 2008, var gjaldanda veitt færi á að skila vörn í tilefni af framangreindri kröfugerð skattrannsóknarstjóra ríkisins eða tilkynna sérstaklega ef hann vildi ekki hlíta því að yfirskattanefnd afgreiddi mál hans og yrði málið þá endursent skattrannsóknarstjóra ríkisins sem tæki ákvörðun um hvort því yrði vísað til opinberrar rannsóknar, sbr. 2. mgr. 110. gr. laga nr. 90/2003, um tekjuskatt, og 2. mgr. 41. gr. laga nr. 50/1988, um virðisaukaskatt.
Engar athugasemdir hafa borist frá gjaldanda.
III.
1. Með bréfi skattrannsóknarstjóra ríkisins, dags. 26. júní 2008, er gerð sú krafa að gjaldanda, A, verði gerð sekt samkvæmt þargreindum ákvæðum 109. gr. laga nr. 90/2003, um tekjuskatt, og 40. gr. laga nr. 50/1988, um virðisaukaskatt. Gjaldandi hefur átt þess kost að koma að vörnum fyrir yfirskattanefnd í tilefni af sektarkröfu skattrannsóknarstjóra ríkisins, en engar athugasemdir hafa borist. Þar sem gjaldandi hefur ekki gert athugasemdir við meðferð máls þessa fyrir yfirskattanefnd verður að líta svo á að hann mæli því ekki í gegn að það sæti sektarmeðferð fyrir nefndinni.
2. Skattrannsóknarstjóri ríkisins hóf hinn 20. september 2006 rannsókn á bókhaldi og skattskilum gjaldanda vegna sjálfstæðrar starfsemi hans rekstrarárin 2004 og 2005 og lauk rannsókninni með skýrslu, dags. 13. ágúst 2007. Vegna rannsóknarinnar voru teknar skýrslur af gjaldanda hjá skattrannsóknarstjóra ríkisins dagana 10. október 2006 og 5. desember 2006 svo og var tekin skýrsla af B vegna málsins. Var rannsóknin m.a. byggð á upplýsingum sem komu fram við þessar skýrslutökur, sölureikningum sem gefnir voru út í nafni gjaldanda, innsendum virðisaukaskattsskýrslum gjaldanda og gögnum um innborganir á bankareikninga gjaldanda. Með bréfi, dags. 13. júlí 2007, sendi skattrannsóknarstjóri gjaldanda skýrslu um rannsóknina, sem dagsett var sama dag, og gaf honum kost á að tjá sig um efni hennar. Engar athugasemdir voru gerðar af hálfu gjaldanda og var lokaskýrsla skattrannsóknarstjóra ríkisins, dags. 13. ágúst 2007, efnislega samhljóða hinni fyrri að viðbættum kafla um lok rannsóknarinnar. Í lokakafla skýrslu skattrannsóknarstjóra ríkisins voru helstu niðurstöður rannsóknarinnar dregnar saman og sagði þar að gjaldandi hefði ekki staðið skil á skattframtölum árin 2005 og 2006 og virðisaukaskattsskýrslum uppgjörstímabilin september-október 2004 til og með nóvember-desember 2005 og ekki staðið skil á skilagreinum vegna staðgreiðslu opinberra gjalda og tryggingagjalds. Bókhald vegna sjálfstæðrar starfsemi gjaldanda hefði ekki verið fært og vörslu bókhaldsfylgiskjala væri ábótavant. Samkvæmt rannsókninni væri um að ræða vantalda skattskylda veltu og útskatt, en oftalinn innskatt, svo og væru rekstrartekjur gjaldanda vantaldar. Reiknað endurgjald væri einnig vanframtalið.
Í skýrslu skattrannsóknarstjóra ríkisins, dags. 12. júlí 2006, kom fram að gjaldandi hefði starfað sjálfstætt við járnabindingar á árunum 2004 og 2005. Niðurstöður skattrannsóknarstjóra ríkisins um rekstrartekjur og skattskylda veltu gjaldanda rekstrarárin 2004 og 2005 byggðu á upplýsingum um greiðslur til gjaldanda frá X ehf. samkvæmt gögnum um innborganir á bankareikninga gjaldanda og unnustu hans að fjárhæð samtals 2.763.350 kr. á árinu 2004 og 3.254.996 kr. á árinu 2005. Við rannsóknina komu fram sölureikningar, sem gefnir voru út í nafni gjaldanda árin 2004 og 2005 að fjárhæð 711.482 kr. fyrra árið og 6.404.278 kr. síðara árið, auk launamiða vegna verktakagreiðslu til gjaldanda að fjárhæð 7.909.590 kr. árið 2004, en af hálfu skattrannsóknarstjóra var litið svo á að hluti þeirra fjárhæða væri vegna vinnu annarra aðila. Samkvæmt umræddum innborgunum var samkvæmt rannsókninni talið að skattskyld velta og rekstrartekjur gjaldanda næmu 2.219.559 kr. árið 2004 og 2.614.455 kr. árið 2005. Að teknu tilliti til skattskyldrar veltu samkvæmt innsendum virðisaukaskattsskýrslum gjaldanda árið 2004 voru tölulegar niðurstöður rannsóknar skattrannsóknarstjóra þær að skattskyld velta gjaldanda væri vantalin um 385.324 kr. árið 2004 og 2.614.455 kr. árið 2005 svo og væru rekstrartekjur gjaldanda vantaldar um 2.219.559 kr. gjaldárið 2005 og 2.614.455 kr. gjaldárið 2006. Í skýrslu skattrannsóknarstjóra ríkisins kom fram í kafla um rekstrargjöld og innskatt gjaldanda að engin gögn væru fyrirliggjandi um möguleg rekstrargjöld eða mögulegan innskatt og var það niðurstaða rannsóknarinnar um þennan þátt að innskattur væri oftalinn í virðisaukaskattsskilum gjaldanda árið 2004 um 189.722 kr.
Fram kom í skýrslu skattrannsóknarstjóra ríkisins að þar sem gjaldandi hefði ekki talið fram til skatts árin 2005 og 2006 hefði hann sætt áætlun skattstjóra á skattstofnum við almenna álagningu opinberra gjalda þau ár og hefði tekjuskatts- og útsvarsstofn verið áætlaður 3.300.000 kr. gjaldárið 2005 og 3.800.000 kr. gjaldárið 2006 auk álags samkvæmt 1. mgr. 108. gr. laga nr. 90/2003 að fjárhæð 495.000 kr. fyrra árið og 570.000 kr. það síðara. Gjaldandi stóð skil á virðisaukaskattsskýrslum uppgjörstímabilin janúar-febrúar til og með júlí-ágúst 2004 en ekki vegna tímabilanna september-október og nóvember-desember 2004 og uppgjörstímabila á árinu 2005.
Við skýrslutöku hjá skattrannsóknarstjóra ríkisins hinn 10. október 2006 kom fram af hálfu gjaldanda að hann hefði starfað sem verktaki við járnabindingar hjá X ehf. á árunum 2004 og 2005. Hann hefði ekki fært bókhald vegna starfseminnar, enda hefði hann ekki vitað að þess væri þörf. B, fyrirsvarsmaður X ehf., hefði ásamt gjaldanda annast varðveislu bókhaldsgagna gjaldanda á árinu 2004, en á árinu 2005 hefði gjaldandi séð sjálfur um bókhaldsgögn sín. Gjaldandi kvaðst hafa gefið út sölureikninga vegna starfsemi sinnar og hefðu þeir verið fylltir út í samvinnu við B á grundvelli skráningar gjaldanda á vinnustundum. Gjaldandi staðfesti að hafa gefið út sex sölureikninga frá árinu 2005, sem lagðir voru fyrir hann við skýrslutökuna, samtals að fjárhæð 6.404.278 kr., en sagði að einn þeirra væri bæði vegna vinnu gjaldanda og annars aðila sem ekki hefði verið með virðisaukaskattsnúmer. Þá kom fram af hálfu gjaldanda að launamiði vegna verktakagreiðslu að fjárhæð 7.909.590 kr. frá X ehf. væri bæði vegna vinnu gjaldanda og annars aðila. Sá aðili, sem gjaldandi vildi ekki nafngreina, hefði ekki verið með virðisaukaskattsnúmer og því hefði þetta verið gert með þessum hætti. Gjaldandi sagði að kæruleysi hefði valdið því að hann stóð ekki skil á skattframtölum árin 2005 og 2006 svo og tilgreindi gjaldandi sömu ástæðu fyrir því að hann hefði ekki skilað virðisaukaskattsskýrslum vegna tveggja síðustu uppgjörstímabila ársins 2004 og allra tímabila ársins 2005. Gjaldandi var ekki viss um að hafa skrifað undir innsendar virðisaukaskattsskýrslur fyrir janúar-febrúar, mars-apríl og maí-júní 2004. B hefði aðstoðað mætta við að gera skýrslurnar og byggt þær á sölureikningum gjaldanda. Gjaldandi kvaðst ekki hafa verið með starfsmenn í vinnu á rannsóknartímabilinu og ekki borið nein rekstrargjöld. Hann hefði ekki skýringu á innskatti samkvæmt innsendum virðisaukaskattsskýrslum. B hefði skrifað þessar tölur á skýrslurnar og yrði að skýra þær.
Við skýrslutöku 5. desember 2006 var gjaldandi spurður um virðisaukaskattsskýrslu uppgjörstímabilið júlí-ágúst 2005 og kom þá fram af hálfu gjaldanda að þeir B hefðu gert skýrsluna í sameiningu. Skýrslan væri byggð á útgefnum sölureikningum í nafni gjaldanda og væru fjárhæðir í samræmi við skattskylda veltu gjaldanda á tímabilinu. Ekki væri um undirritun gjaldanda að ræða á skýrslunni, en það stafaði af því að skýrslur, sem þeir B hefðu útbúið í sameiningu vegna janúar-febrúar til og með júlí-ágúst 2004, hefðu týnst og hefði B þá gert nýjar skýrslur með sömu fjárhæðum og skrifað undir þær fyrir hönd gjaldanda. Við skýrslutökuna var lagt fyrir gjaldanda yfirlit um innborganir á bankareikning gjaldanda að fjárhæð 2.563.350 kr. árið 2004 og 3.254.996 kr. árið 2005 og hann jafnframt spurður um framburð B við skýrslutöku 4. desember 2006 um að greiðslur til gjaldanda hafi einnig verið lagðar inn á aðra bankareikninga. Gjaldandi kvað innborganirnar lýsandi fyrir vinnuframlag sitt í þágu X ehf. á umræddum árum og staðfesti þann framburð B að 200.000 kr. hefðu verið lagðar inn á bankareikning unnustu gjaldanda árið 2004, en kvaðst ekki muna eftir greiðslum inn á bankareikninga annarra á árinu 2005. Gjaldandi var einnig beðinn um að tjá sig um framburð B þess efnis að sannanlega hefði verið um rekstrargjöld að ræða í starfsemi gjaldanda og að gjaldandi hefði gefið honum upp fjárhæðir innskatts til að færa á virðisaukaskattsskýrslur. Í svari gjaldanda kom fram að hann hefði keypt smáverkfæri og handáhöld á árinu 2004 svo og hefði hann notað gsm-síma bæði vegna einkanota og í þágu sjálfstæðrar starfsemi sinnar, en hann ætti ekki neina reikninga vegna rekstrargjalda sinna.
Af hálfu skattrannsóknarstjóra ríkisins var mál gjaldanda sent ríkisskattstjóra til meðferðar, sbr. m.a. 6. mgr. 103. gr., sbr. 3. mgr. 101. gr. laga nr. 90/2003, um tekjuskatt, og 5. mgr. 39. gr. laga nr. 50/1988, um virðisaukaskatt, sbr. bréf skattrannsóknarstjóra, dags. 13. ágúst 2007. Á grundvelli rannsóknar skattrannsóknarstjóra ríkisins og í framhaldi af boðunarbréfi, dags. 29. febrúar 2008, sem gjaldandi gerði ekki athugasemdir við, tók ríkisskattstjóri áður álögð opinber gjöld gjaldanda gjaldárin 2005 og 2006 og virðisaukaskatt árin 2004 og 2005 til endurákvörðunar með úrskurði um endurákvörðun, dags. 20. maí 2008. Samkvæmt úrskurði ríkisskattstjóra var virðisaukaskattsskyld velta gjaldanda ákvörðuð 2.219.559 kr. árið 2004 og 2.614.455 kr. árið 2005. Þá var gjaldanda ákvarðað reiknað endurgjald að fjárhæð 2.050.000 kr. gjaldárið 2005 og 2.318.000 kr. gjaldárið 2006 og stofn til tryggingagjalds umrætt ár í samræmi við það, svo og ákvarðaði ríkisskattstjóri álag vegna vangreiddrar skilaskyldrar staðgreiðslu staðgreiðsluárin 2004 og 2005. Ekki kom til breytinga á tekjuskatts- og útsvarsstofnum gjaldanda umrædd gjaldár. Gjaldandi hefur ekki nýtt sér heimilaðar málskotsleiðir til að fá ákvörðunum ríkisskattstjóra hnekkt.
3. Í máli því, sem hér er til meðferðar, er um að tefla kröfugerð um ákvörðun sektar á hendur gjaldanda m.a. samkvæmt þar tilgreindum ákvæðum 40. gr. laga nr. 50/1988, um virðisaukaskatt, sem gera ráð fyrir því að sektarákvörðun sé bundin þeirri skattfjárhæð sem undan var dregin. Verður því að taka afstöðu til þess hvort skattrannsóknarstjóri ríkisins hafi með skattrannsókn sinni sýnt fram á hverju skattfjárhæð, sem undan var dregin, hafi að minnsta kosti numið. Allan vafa í því sambandi verður að meta gjaldanda í hag, sbr. grundvallarreglu 45. gr. laga nr. 19/1991, um meðferð opinberra mála.
Eins og fram er komið eru tölulegar niðurstöður samkvæmt rannsókn skattrannsóknarstjóra ríkisins að því er varðar rekstrartekjur og skattskylda veltu gjaldanda aðallega byggðar á gögnum um innborganir á bankareikning gjaldanda árin 2004 og 2005 auk innborgunar á bankareikning unnustu gjaldanda sem taldar voru vegna sjálfstæðrar starfsemi gjaldanda við járnabindingar fyrir X ehf. Á hinn bóginn leit skattrannsóknarstjóri ríkisins framhjá fjárhæð útgefinna sölureikninga gjaldanda árið 2005, sem var hærri en fjárhæð innborgana frá X ehf. á árinu, og á sama hátt tók skattrannsóknarstjóri ríkisins ekki mið af innsendum launamiða X ehf. vegna rekstrarársins 2004. Innborganir sem hér um ræðir voru að fjárhæð 2.763.350 kr. árið 2004 og 3.254.996 kr. árið 2005 og taldi skattrannsóknarstjóri ríkisins samkvæmt því að rekstrartekjur og skattskyld velta gjaldanda hefði numið 2.219.559 kr. árið 2004 og 2.614.455 árið 2005. Af hálfu gjaldanda er viðurkennt að tekjur hans af sjálfstæðri starfsemi hafi numið þeim fjárhæðum sem umrædd gögn um innborganir bera með sér, sbr. framburð gjaldanda við skýrslutöku hjá skattrannsóknarstjóra ríkisins 5. desember 2006, og er óumdeilt að um sé að ræða tekjur af sjálfstæðri starfsemi, svo sem byggt er á í skýrslu skattrannsóknarstjóra ríkisins. Samkvæmt þessu og að virtum gögnum málsins þykir ekkert komið fram sem gefur tilefni til annars en að miða við þær fjárhæðir rekstrartekna og skattskyldrar veltu sem gögn um innborganir bera með sér. Samkvæmt rannsókninni gat gjaldandi ekki lagt fram gögn um innskatt og rekstrarkostnað sem hann taldi sig þó hafa stofnað til vegna öflunar rekstrartekna sinna og hefur gjaldandi enga frekari grein gert fyrir slíkum útgjöldum. Verður samkvæmt þessu ekki talið að neitt hafi komið fram í málinu um frádráttarliði sem taka beri tillit til við mat á undandreginni skattfjárhæð.
Fyrir liggur í málinu að gjaldandi vanrækti að standa skil á skattframtölum sínum árin 2005 og 2006, sbr. 1. mgr. 90. gr. laga nr. 90/2003, innan tilskilins framtalsfrests samkvæmt 93. gr. laganna. Við skýrslutöku hjá skattrannsóknarstjóra ríkisins var gjaldandi spurður um ástæður fyrir því að hann hefði ekki staðið skattstjóra skil á skattframtali sínu og gaf gjaldandi ekki aðra skýringu en að um kæruleysi hefði verið að ræða. Í 6. mgr. 109. gr. laga nr. 90/2003 segir svo: „Hafi maður af ásetningi eða stórkostlegu hirðuleysi vanrækt að gegna skyldu sinni samkvæmt ákvæðum 90., 92. eða 94. gr. skal hann sæta sektum eða fangelsi allt að 2 árum.“ Með stoð í gögnum málsins, m.a. framburði gjaldanda í skýrslutöku hjá skattrannsóknarstjóra ríkisins, verður talið að nægilega sé fullnægt þeim huglægu refsiskilyrðum sem að framan greinir. Að þessu athuguðu þykir bera að gera gjaldanda sekt eftir nefndu lagaákvæði.
Þá þykir fullsannað með stoð í gögnum málsins, m.a. framburði gjaldanda við skýrslutöku hjá skattrannsóknarstjóra ríkisins, að gjaldandi, sem skyldur var til þess að standa skil á virðisaukaskatti, sbr. 1. mgr. 15. gr. og 1. og 2. mgr. 24. gr. laga nr. 50/1988, um virðisaukaskatt, hafi á saknæman hátt vanrækt að standa skil á virðisaukaskatti og virðisaukaskattsskýrslum fyrir uppgjörstímabilin september–október 2004 til og með nóvember–desember 2005. Að teknu tilliti til ofgreidds virðisaukaskatts uppgjörstímabilin janúar–febrúar til og með júlí–ágúst 2004 telst gjaldandi hafa vanrækt að gera grein fyrir skattskyldri veltu að fjárhæð 2.999.779 kr. umrædd uppgjörstímabil og virðisaukaskatti til greiðslu að fjárhæð 734.944 kr. Varðar þetta gjaldanda sekt samkvæmt 1. mgr. 40. gr. laga nr. 50/1988, um virðisaukaskatt, sbr. 3. gr. laga nr. 42/1995.
4. Ákvarða ber gjaldanda, A, sekt samkvæmt framangreindum ákvæðum 6. mgr. 109. gr. laga nr. 90/2003 og 1. mgr. 40. gr. laga nr. 50/1988, sbr. 3. gr. laga nr. 42/1995. Samkvæmt breytingum á refsiákvæðum skattalaga, sem gerðar voru með lögum nr. 42/1995 og tóku gildi 9. mars 1995, skal sekt aldrei vera lægri en sem nemur tvöfaldri þeirri skattfjárhæð sem undan var dregin, þó að teknu tilliti til álags. Við ákvörðun sektar ber að taka tillit til álags samkvæmt 2. mgr. 27. gr. laga nr. 50/1988. Gjaldandi gekkst greiðlega við brotum sínum. Þá þykir bera að taka tillit til þess að nokkur dráttur hefur orðið á meðferð málsins án þess að gjaldanda verði um kennt. Að þessu virtu og málsatvikum að öðru leyti þykir sekt gjaldanda hæfilega ákveðin 1.400.000 kr. til ríkissjóðs.
Úrskurðarorð:
Gjaldandi, A, greiði sekt að fjárhæð 1.400.000 kr. til ríkissjóðs.
