Ákvarðandi bréf nr. 003/2005
Um gildistöku afnáms eignarskatts á félög sem hafa annað reikningsár
Ríkisskattstjóra hafa borist fyrirspurnir varðandi það hvernig skuli haga álagningu eignarskatts hjá félögum sem hafa annað reikningsár en almanaksárið með hliðsjón af afnámi eignarskatts skv. lögum nr. 129/2004. Ríkisskattstjóri hefur af því tilefni gefið eftirfarandi álit.
Með 17. gr. laga nr. 129/2004, m.a. um breyting á lögum nr. 90/2003, um tekjuskatt og eignarskatt, var felld niður 79. gr. þeirra laga. Samkvæmt gildistökuákvæði 4. mgr. 149. gr. fyrrnefndu breytingalaga tekur niðurfelling 79. gr. laga nr. 90/2003 gildi 31. desember 2005. Það þýðir að eignarskattur á félag sem er með almanaksárið sem reikningsár ákvarðast ekki í árslok 2005 og verður því eignarskattur álagður í síðasta sinn á gjaldárinu 2005 vegna eignaskattsstofns í lok ársins 2004.
Í verklagsreglum ríkisskattstjóra, sem gefnar voru út 31. mars 2004 um heimild til að miða tekjuskatt og eignarskatt félaga við annað reikningsár en almanaksárið, framtalsskil slíkra félaga og álagningu opinberra gjalda á þau svo og samsköttun samstæðna segir að:
þær skattareglur sem voru í gildi við lok reikningsárs þess gilda við álagningu tekjuskatts og eignarskatts. Á þetta m.a. við um skatthlutfall og fyrningar.
Álagningu eignarskatts á félög sem hafa annað reikningsár en almanaksárið skal því haga þannig:
Eignarskattsstofn skal ákvarða við lok reikningsárs viðkomandi félags, sbr. 78. gr. laganna. Afnám eignarskatts tekur ekki gildi fyrr en 31. desember 2005 og tekur því ekki til ákvörðunar skatts á eignir miðað við stöðu þeirra fyrir þann tíma. Álagningu skal því hagað samkvæmt þeim eignarskattsstofni, er ákvarðast í lok reikningsárs sem hefst á árinu 2004 og lýkur á árinu 2005, á grundvelli þágildandi 79. gr. laga nr. 90/2003, hvort heldur sú álagning fer fram á árinu 2005 eða 2006, sbr. auglýsingu ríkisskattstjóra um fresti til að skila framtölum, sbr. 3. gr. auglýsingar nr. 5/2005. Álagning skal fara fram í samræmi við auglýsingu fjármálaráðherra, sbr. 1. gr. auglýsingar nr. 29/2005, sbr. og fyrrnefnt bréf ríkisskattstjóra, dags. 30. mars 2004.
Afnám eignarskatts skv. lögum nr. 129/2004, kemur þannig ekki til framkvæmda hjá þessum félögum fyrr en með skattskilum þeirra vegna reikningsárs sem hefst á árinu 2005 og lýkur á árinu 2006 en í lok þess reikningsárs hafa tekið gildi ákvæði 4. mgr. 149. gr. laga nr. 129/2004 um niðurfellingu 79. gr. laga nr. 90/2003 um ákvörðun eignarskattsstofns.
Ríkisskattstjóri.
