Ákvarðandi bréf nr. 007/2002

Borið hefur á fyrirspurnum um túlkun á ákvæðum 1. tölul. B-liðar 1. mgr. 30. gr. laga nr. 75/1981, um tekjuskatt og eignarskatt, með síðari breytingum. Með hliðsjón af því og skírskotun til 101. gr. laga nr. 75/1981, um tekjuskatt og eignarskatt, vill ríkisskattstjóri taka eftirfarandi fram:

Forsenda frádráttar vegna fjárfestingar í hlutabréfum samkvæmt B-lið 1. mgr. 30. gr. laga nr. 75/1981, um tekjuskatt og eignarskatt, er að maður eigi hlutabréfin yfir fimm áramót og geri árlega grein fyrir eignarhaldi þeirra. Séu hlutabréfin seld innan þess tíma færist nýttur frádráttur til tekna á söluári viðkomandi hlutabréfa. Slíkri tekjufærslu skal þó ekki beitt ef maður kaupir á sama ári og eigi síðar en 30 dögum eftir söluna önnur hlutabréf í hlutafélagi sem uppfyllir skilyrði B-liðar 1. mgr. 30. gr. og ríkisskattstjóri hefur staðfest eða hlutabréf í félagi sem skráð er í kauphöll á Evrópska efnahagssvæðinu, fyrir a.m.k. sömu fjárhæð og söluverð hinna seldu hlutabréfa var og félagið uppfylli skilyrði töluliðarins.

Þegar svo háttar sem hér er lýst, þ.e. að keypt eru ný hlutabréf í stað hinna seldu innan 30 daga, telur ríkisskattstjóri að fyrri eignarhaldstími haldi áfram að líða, en ekki stofnist krafa um nýjan eignarhaldstíma. Sem dæmi að ef keypt voru hlutabréf á árinu 1999 og þau seld á árinu 2001. Í stað hinna seldu bréfa voru síðan keypt önnur bréf innan 30 daga frá sölu, þá eru hin nýju bréf bundin kvöð um eignarhald fram á árið 2004. Ef um er að ræða hlutabréf sem keypt voru í tíð laga nr. 137/1996, sem kváðu á um þriggja ára eignarhaldstíma (en ekki fimm áramót eins og gildandi lög), þá gildir sá eignarhaldstími með sama hætti um bréf sem keypt voru innan 30 daga.

Ríkisskattstjóri.