Gjalddagi gistináttaskatts 5. apríl – ertu örugglega skráður?
Skráning á gistináttaskattsskrá
Gistináttaskattur kom aftur til framkvæmda þann 1. janúar 2024 og ber því að innheimta gistináttaskatt og standa skil á honum í ríkissjóð vegna sölu á gistiaðstöðu samkvæmt ákvæðum laga um gistináttaskatt.
Endurskráning
Þeir aðilar sem voru á gistináttaskattsskrá áður en hann var afnuminn tímabundið þurfa að skrá sig á skrána á nýjan leik.
Skráning fer fram með rafrænum hætti á þjónustuvef Skattsins undir vefskil.
Nýskráning
Allir rekstraraðilar sem skattskyldir eru samkvæmt lögum um gistináttaskatt skulu senda Skattinum tilkynningu um starfsemi sína og öðlast þannig skráningu á gistináttaskattsskrá.
Skráning fer fram með rafrænum hætti á þjónustuvef Skattsins undir vefskil.
Upplýsingar sem þarf að gefa upp við skráningu
Á tilkynningu um gistináttaskattsskylda starfsemi skal tilgreina:
- upphafsdag starfsemi
- lokadag starfsemi (ef við á)
- fjölda gistirýma sundurliðað eftir tegund gistiaðstöðu
Gjalddagi gistináttaskatts 5. apríl 2024
Fyrsti gjalddagi gistináttaskatts á árinu 2024 er 5. apríl næstkomandi. Vakin er sérstök athygli á að hverjum þeim sem skattskyldur er samkvæmt lögum um gistináttaskatt ber að tilkynna starfsemi sína til skráningar á gistináttaskattsskrá. Ekki hefur verið opnað fyrir skilin.
