Sérstakur vaxtastuðningur ákvarðaður
Við álagningu opinberra gjalda 2024 er framteljendum sem uppfylla ákveðin skilyrði ákvarðaður sérstakur vaxtastuðningur. Lög um hann voru sett í tengslum við kjarasamninga sem undirritaðir voru í mars 2024.
Sérstakur vaxtastuðningur er reiknaður samkvæmt forsendum sem fyrir liggja í skattframtali. Ekki þarf að sækja um hann.
Á álagningarseðli er ábending birt hjá þeim sem eiga möguleika á sérstökum vaxtastuðningi, en niðurstaðan (fjárhæðin) er birt á þjónustusíðu framteljanda, á skattur.is.
Ráðstöfun og val á láni
Ólíkt vaxtabótum er sérstakur vaxtastuðningur ekki greiddur út, heldur er fjárhæðinni ráðstafað inn á lán vegna íbúðarhúsnæðis til eigin nota.
Á þjónustusíðunni skattur.is þarf framteljandi að tilgreina inn á hvaða lán skuli greiða. Það skal gert á tímabilinu 1.-30. júní 2024. Ef ekkert er valið verður fjárhæðin greidd inn á það lán sem er með hæstu eftirstöðvarnar, samkvæmt skattframtali.
