Félag sektað vegna brots á lögum um aðgerðir gegn peningaþvætti
Þann 20. september 2023 ákvað ríkisskattstjóri að leggja stjórnvaldssekt á SB bókhald slf. vegna brota gegn ákvæðum laga um aðgerðir gegn peningaþvætti og fjármögnun hryðjuverka.
Ríkisskattstjóri
og félagið höfðu áður gert sátt vegna brota félagsins gegn ákvæðum laganna.
Samhliða sáttinni hafði úrbótakrafa verið lögð fyrir félagið þar sem því var
gert að bæta aðferðir og verklag við framkvæmd áreiðanleikakönnunar og vistun
gagna.
Ákvörðun þessi er tilkomin vegna þess að félagið hafði ekki uppfyllt skilyrði úrbótakröfunnar, þar sem félagið framkvæmdi enn ekki áreiðanleikakannanir með fullnægjandi hætti og varðveitti ekki gögn í samræmi við ákvæði laganna.
Með ákvörðun embættisins hefur ríkisskattstjóri fellt sáttina úr gildi og lagt á félagið stjórnvaldssekt að fjárhæð 4.000.000 kr.
