Skemmtiferðaskip í innanlandssiglingum eru VSK-skyld
Ríkisskattstjóri vekur athygli á ákvarðandi bréfi nr. 2/2025 er varðar virðisaukaskattsskyldu rekstraraðila skemmtiferðaskipa vegna starfsemi þeirra við innanlandssiglingar við Ísland.
Rekstraraðilar skemmtiferðaskipa sem sigla innanlands við Ísland þurfa að skrá sig hjá Skattinum og innheimta virðisaukaskatt (VSK) af þjónustu sem veitt er í innanlandssiglingum. Þetta á við um bæði innlenda og erlenda rekstraraðila.
Að gefnu tilefni hefur verið gefið út ákvarðandi bréf 2/2025. Bréfið er einnig aðgengilegt á ensku.
Skilgreining á innanlandssiglingum
Með skemmtiferðaskipi í innanlandssiglingum er átt við skemmtiferðaskip sem tekur farþega um borð hér á landi, siglir með þá á milli hafna hér á landi (venjulega í kringum landið) og skilar þeim síðan aftur í land hér á landi. Farþegarnir fara ekki með skipinu til útlanda.
VSK-skylda í innanlandssiglingum
Rekstraraðilar þurfa að innheimta virðisaukaskatt af allri sölu á vöru og þjónustu sem veitt er í innanlandssiglingum, þar á meðal:
fólksflutningum
gistiþjónustu
sölu á mat og drykk
þjónustu eins og heilsulindum, afþreyingu og dagsferðum
sölu á vörum um borð
Erlendir rekstraraðilar
Erlendir rekstraraðilar sem ekki hafa fasta starfsstöð hér á landi þurfa að tilnefna umboðsmann með heimilisfesti á Íslandi. Umboðsmaðurinn skráir starfsemina fyrir hönd rekstraraðilans, rekstraraðilinn og umboðsmaður bera sameiginlega ábyrgð á skilum og greiðslu VSK.
Skráning á VSK-skrá
-
Innlendir rekstraraðilar: Skráning fer fram á þjónustuvef Skattsins
-
Erlendir aðilar með umboðsmann: Skrá þarf með því að senda eyðublað RSK 5.02 ásamt samningi og viðeigandi skjölum á skatturinn@skatturinn.is
Sé sótt um afturvirka skráningu þarf einnig að senda inn VSK-skýrslur á eyðublaði RSK 10.01 fyrir gjaldfallin uppgjörstímabil.
