Fyrsta greiðsla barnabóta ársins 2023
Fyrsta greiðsla barnabóta á árinu 2023 verður miðvikudaginn 1. febrúar n.k., forsendur fyrir útreikningi barnabóta hvers og eins er að finna á þjónustusíðu Skattsins undir flipanum samskipti.
Barnabætur eru greiddar inn á reikning sem skráður er á þjónustusíðu Skattsins eða hjá Innheimtumanni. Ef engar upplýsingar um bankareikning eru skráðar, eða breyta þarf fyrirliggjandi reikningsupplýsingum, má skrá nýjan reikning á þjónustusíðu Skattsins.
Forsendur útreiknings barnabóta
Fyrirframgreiðsla barnabóta nemur 50% af áætluðum barnabótum ársins og greiðist með tveimur jöfnum greiðslum, 1. febrúar og 1. maí. Miðað er við fjölskyldustöðu samkvæmt Þjóðskrá eins og hún er 31. desember árið á undan.
Við útreikning á skerðingu er miðað við upplýsingar um tekjur í staðgreiðslu að viðbættum upplýsingum um tekjur utan staðgreiðslu af framtali. Viðmiðunartímabil tekna í staðgreiðslu er frá nóvember til nóvember og tekjur utan staðgreiðslu eru teknar af síðasta skattframtali.
Óska eftir leiðréttingu á fyrirframgreiddum barnabótum
Séu aðstæður einstaklings aðrar en forsendur útreiknings gera ráð fyrir má óska eftir leiðréttingu á fyrirframgreiddum barnabótum. Algengar breytingar á högum sem geta gefið tilefni til leiðréttingar á fjárhæð barnabóta í fyrirframgreiðslu eru m.a.:
- Tekjur
- Skilnaður/samvistarslit
- Óskráð sambúð
- Ný sambúð
- Maki búsettur og/eða starfar erlendis
Þau sem ekki fá barnabætur sjálfkrafa í fyrirframgreiðslu
Þá er einnig hópur fólks sem ekki fær sjálfkrafa útreikning á fyrirframgreiðslu barnabóta en getur sótt um leiðréttingu með eyðublaði RSK 3.18. Ástæður þess geta verið m.a.:
- Námsmenn erlendis
- Framtali fyrra árs ekki skilað inn
- Flutningur milli landa
- Aðsetur skráð erlendis
- Hjón ekki samvistum
- Hjúskaparstaða óþekkt m.v. skráningu í Þjóðskrá
Sækja þarf um leiðréttingu með því að fylla út og skila til Skattsins eyðublaði RSK 3.18 í síðasta lagi 28. febrúar n.k.
Sé óskað eftir leiðréttingu verður leiðrétt fjárhæð barnabóta greidd út þegar beiðni hefur verið tekin til afgreiðslu. Beiðnir eru afgreiddar eins fljótt og auðið er eftir að þær berast.
Barnabætur foreldra barna með skipta búsetu
Foreldrar sem semja um skipta búsetu barna hjá sýslumanni geta hvort um sig átt rétt á barnabótum.
Barnabæturnar reiknast sjálfkrafa til beggja foreldra svo lengi sem samningur um skipta búsetu barns liggi fyrir hjá sýslumanni í árslok. Ekki þarf að sækja um barnabæturnar til Skattsins.
Nánari upplýsingar um barnabætur
Samtímagreiðslur barnabóta koma til framkvæmda á árinu 2024
Breytingar á framkvæmd greiðslu barnabóta voru samþykktar á Alþingi í lok árs 2022. Eftir breytingu verða teknar upp samtímagreiðslur barnabóta þar sem biðtími eftir bótum verður aldrei lengri en 4 mánuðir eftir fæðingu barns.
Þessar breytingar koma ekki til framkvæmda fyrr en á árinu 2024. Fyrirkomulag greiðslu barnabóta á árinu 2023 er óbreytt.
