Tekinn með mikið magn stera og lyfja
Mikið magn stera og lyfseðilsskyldra lyfja fannst í fórum íslensks karlmanns nýverið þegar tollverðir stöðvuðu hann við hefðbundið eftirlit í Flugstöð Leifs Eiríkssonar.
Maðurinn, sem er rétt um sjötugt, var að sögn að koma frá Tælandi með millilendingu í Osló. Í ferðatösku hans fundust rúmlega 3500 ambúlur af sterum í vökvaformi auk talsverðs magns af sterum í töfluformi. Einnig var hann með vel á annað þúsund skammta af lyfseðilsskyldum lyfjum.
Tollstjóri kærði málið til lögreglunnar á Suðurnesjum sem fer með rannsókn þess.
Umræddur einstaklingur hefur komið við sögu áður vegna svipaðra mála.
Búið var um sterana og lyfin í ferðatösku.
